Ezekiyele 43:1-27
43 Hiloko a ndzi yisa egedeni leyi languteke evuxeni.+
2 Ndzi fika ndzi vona ku vangama ka Xikwembu xa Israyele ku huma hi le vuxeni+ naswona rito ra xona a ri fana ni mpfumawulo wa mati lama khulukaka;+ kutani misava yi voningeriwa hi ku vangama ka xona.+
3 Leswi ndzi swi voneke a swi fana ni xivono lexi ndzi xi voneke loko ndzi* tela ku ta lovisa muti, a swi fana ni leswi ndzi swi voneke ekusuhi ni nambu wa Kebari;+ kutani ndzi wa hi xikandza.
4 Hiloko ku vangama ka Yehovha ku nghena etempeleni* hi gede leyi languteke evuxeni.+
5 Kutani moya wu ndzi yimisa wu ndzi yisa exivaveni* xa vaprista, hiloko ndzi vona leswaku tempele a yi tele hi ku vangama ka Yehovha.+
6 Hiloko ndzi twa munhu a vulavula na mina a ri etempeleni, kutani munhu yoloye a ta a fika a yima etlhelo ka mina.+
7 A ku eka mina:
“N’wana wa munhu, leyi i ndhawu ya xiluvelo+ xa mina ni ndhawu ya mikondzo ya mina,+ laha ndzi nga ta tshama kona exikarhi ka Vaisrayele hilaha ku nga heriki.+ Vaisrayele a va nge he ri thyakisi vito ra mina ro kwetsima,+ vona ni tihosi ta vona, hi vunghwavava* bya vona ni hi mitsumbu ya tihosi ta vona.
8 Hi ku veka nyangwa ya vona ekusuhi ni nyangwa ya mina ni fureme ya rivanti ra vona etlhelo ka fureme ya rivanti ra mina, hi hambanisiwa hi khumbi ntsena,+ va thyakise vito ra mina ro kwetsima hi swilo swo nyenyetsa leswi va swi endleke, kutani ndzi va lovisile ndzi hlundzukile.+
9 A va tshike vunghwavava* bya vona va susa ni mitsumbu ya tihosi ta vona yi ya ekule na mina, kutani ndzi ta tshama exikarhi ka vona hilaha ku nga heriki.+
10 “Wena n’wana wa munhu, hlamusela Vaisrayele+ hi tempele leyi leswaku va ta khomiwa hi tingana hikwalaho ka swihoxo+ swa vona naswona va fanele va kambisisa pulani ya yona.
11 Loko va khomiwa hi tingana hikwalaho ka swilo hinkwaswo leswi va swi endleke, u fanele u va komba pulani ya tempele, ndlela leyi yi hleriweke ha yona, tindhawu ta yona to huma ni to nghena ha tona.+ Va kombe pulani ya yona hinkwayo ni milawu ya yona, u swi tsala ehansi va ku langutile leswaku va ta yingisa milawu ya yona.+
12 Lowu i nawu wa tempele. Ndhawu hinkwayo leyi nga le henhla ka ntshava yi kwetsima ngopfu.+ Waswivo! Lowu i nawu wa tempele.
13 “Leyi i mimpimo ya altari hi swisungunu+ (xisungunu ha xin’we a ku engeteriwa ku anama ka xandla).* Tshaku ra yona a ri lehe xisungunu xin’we* ri anama xisungunu xin’we. Emakumu ka rona a ri ri ni bandhi leri a ri aname ku anama ka xandla.* Leri i tshaku ra altari.
14 Ku sukela etshakwini ku ya exitupini xa le hansi lexi rhendzelaka altari a ku ri swisungunu swimbirhi* ku anama xisungunu xin’we. Ku sukela exitupini lexitsongo lexi rhendzelaka altari ku ya exitupini lexikulu lexi rhendzelaka altari a ku ri swisungunu swa mune* xi anama xisungunu xin’we.
15 Xitiko xa altari xi tlakuke swisungunu swa mune naswona ehenhla ka xitiko xa altari ku ni timhondzo ta mune.+
16 Xitiko xa altari xi ni matlhelo ya mune lama ringanaka, xi lehe swisungunu swa 12* xi anama swisungunu swa 12.+
17 Matlhelo ya mune ya xitupu lexi rhendzelaka altari ma lehe swisungunu swa 14* ma anama swisungunu swa 14; ndhawu leyi nga emakumu leyi rhendzelaka altari i hafu ya xisungunu* naswona tshaku ra yona i xisungunu xin’we matlhelo hinkwawo.
“Switepisi swa yona swi langute evuxeni.”
18 Hiloko a ku eka mina, “N’wana wa munhu, Yehovha Hosi Leyi Tlakukeke u ri: ‘Leswi i swiletelo leswi nga ta landzeriwa loko ku endliwa altari, leswaku ku nyikeriwa magandzelo yo hisiwa ku tlhela ku n’wan’waseriwa ngati ehenhla ka yona.’+
19 “‘U fanele u va nyika xinkuzana lexi nga gandzelo ra xidyoho+ vaprista lava nga Valevhi, lava nga vana va Sadoki,+ lava tshinelaka eka mina va ndzi tirhela,’ ku vula Yehovha Hosi Leyi Tlakukeke.
20 ‘U fanele u teka ngati yin’wana ya xona u yi tota etimhondzweni ta yona ta mune, etikhonweni ta mune ta xitupu lexi rhendzelaka altari ni ndhawu leyi nga emakumu leyi rhendzelaka altari, leswaku u yi basisa exidyohweni naswona u yi kombelela ku rivaleriwa.+
21 Endzhaku ka sweswo u ta teka xinkuzana lexi nga gandzelo ra xidyoho leswaku xi hisiwa endhawini leyi hlawuriweke ya tempele, ehandle ka ndhawu yo kwetsima.+
22 Hi siku ra vumbirhi u ta nyikela xiphongo lexi hanyeke kahle, xi va gandzelo ra xidyoho; kutani va ta basisa altari exidyohweni hilaha va yi basiseke hakona exidyohweni hi xinkuzana.’
23 “‘Loko u heta ku yi basisa exidyohweni, u ta nyikela xinkuzana lexi hanyeke kahle ni khuna leri hanyeke kahle.
24 U ta swi nyikela eka Yehovha naswona vaprista va fanele va swi chela hi munyu+ kutani va swi nyikela swi va gandzelo ro hisiwa eka Yehovha.
25 U ta nyikela xiphongo xi va gandzelo ra xidyoho+ ra siku ni siku ku ringana masiku ya nkombo, swin’we ni xinkuzana ni khuna; u ta nyikela swifuwo leswi hanyeke kahle.
26 Va ta kombelela altari ku rivaleriwa ku ringana masiku ya nkombo, kutani va fanele va yi basisa va yi veka leswaku yi ta tlhela yi tirhisiwa.
27 Hi siku ra vunhungu,+ loko masiku wolawo ma herile ni le ndzhaku ka wona, vaprista va ta nyikela magandzelo ya n’wina* yo hisiwa ni magandzelo yo kombela ku rhula ealtarini; kutani ndzi ta mi tsakela,’+ ku vula Yehovha Hosi Leyi Tlakukeke.”
Tinhlamuselo ta le hansi
^ Kumbexana “a.”
^ Hi Xiheveru, “endlwini.”
^ Vona Tinhlamuselo.
^ Ku nga vunghwavava lebyi fambisanaka ni vugandzeri.
^ Ku nga vunghwadla lebyi fambisanaka ni vugandzeri.
^ Laha ku vulavuriwa hi swisungunu swo leha. Vona Xiengetelo B14.
^ Kumbe “kwalomu ka 51,8 wa tisentimitara.”
^ Loku i ku anama ka xandla, kwalomu ka 22,2 wa tisentimitara. Vona Xiengetelo B14.
^ Kumbe “kwalomu ka mitara.”
^ Kumbe “timitara timbirhi.”
^ Kumbe “6,2 wa timitara.”
^ Kumbe “7,3 wa timitara.”
^ Kumbe “kwalomu ka kotara ya mitara.”
^ Ku nga ya vanhu.
