Ezekiyele 45:1-25
45 “‘Loko mi ava tiko tanihi ndzhaka,+ mi fanele mi nyika Yehovha xiphemu xo karhi xa tiko tanihi lexi kwetsimaka.+ Xi fanele xi leha swisungunu swa 25 000,* xi anama swisungunu swa 10 000.*+ Ndhawu hinkwayo ya xona yi ta va xiphemu xo kwetsima.
2 Endzeni ka xiphemu lexi ku ta va ni ndhawu yo kwetsima leyi nga ni matlhelo ya mune lama ringanaka, laha tlhelo ha rin’we ri nga swisungunu swa 500 swi andzisiwe hi 500*+ naswona ri ta va ni madyelo ya swifuwo lawa matlhelo ya wona ma leheke swisungunu swa 50*+ matlhelo hinkwawo ya mune.
3 Eka mpimo lowu mi fanele mi pima ndhawu leyi leheke 25 000 yi anama 10 000 naswona endzeni ka yona ku ta va ni ndhawu yo kwetsima, ku nga nchumu wo kwetsima ngopfu.
4 Yi ta va xiphemu xo kwetsima xa tiko xa vaprista+ lava tirhaka endhawini yo kwetsima, lava tshinelaka leswaku va tirhela Yehovha.+ Yi ta va ndhawu ya tiyindlu ta vona ni ndhawu yo kwetsima ya tempele.
5 “‘Ndhawu leyi leheke swisungunu swa 25 000 yi anama swisungunu swa 10 000 yi ta va ya Valevhi lava tirhaka etempeleni+ naswona va ta va ni makamara ya 20 yo dyela eka wona.+
6 “‘Mi fanele mi nyika muti ndhawu leyi anameke swisungunu swa 25 000 (leyi ringanaka ni munyikelo wo kwetsima) naswona yi anama swisungunu swa 5 000.*+ Yi ta va ya vanhu hinkwavo va Israyele.
7 “‘Ndhawu ya ndhuna yi ta va eka matlhelo hamambirhi ya munyikelo wo kwetsima ni ya ndhawu leyi nyikiweke muti. Yi ta va etlhelo ka ndhawu leyi nga munyikelo wo kwetsima ni ndhawu leyi nyikiweke muti. Yi ta va etlhelweni ra le vupeladyambu ni ra le vuxeni. Ku leha ka ndhawu leyi ku sukela endzilakaneni wa le vupeladyambu ku ya endzilakaneni wa le vuxeni ku ta ringana ni yin’wana ya tindhawu leti averiweke tinxaka letin’wana.+
8 Ndhawu leyi yi ta va ya yona eIsrayele. Tindhuna ta mina a ti nge he va khomi hi ndlela yo biha vanhu va mina+ naswona ti ta nyika vanhu va Israyele ndhawu hi ku ya hi tinyimba ta vona.’+
9 “Yehovha Hosi Leyi Tlakukeke u ri: ‘Mi dyohile swi ringene, n’wina tindhuna ta Israyele!’
“‘Tshikani madzolonga ni ku tshikilela vanhu, mi endla leswinene.+ Tshikani ku phanga ndhawu ya vanhu va mina,’+ ku vula Yehovha Hosi Leyi Tlakukeke.
10 ‘Mi fanele mi tirhisa swikalo leswi pimaka kahle, mi pima mpimo lowu nga wona wa efa* ni mpimo lowu nga wona wa bati.*+
11 Ku fanele ku va ni mpimo lowu nga cincacinciki wa efa ni wa bati. Tibati ta khume ti ringana ni homere* yin’we ni tiefa ta khume ti ringana ni homere yin’we. Ku fanele ku tirhisiwa homere ku pima.
12 Xikele*+ yi fanele yi ringana ni tigera* ta 20. Tixikele ta 20 ti hlanganisiwa ni tixikele ta 25 ti hlanganisiwa ni tixikele ta 15 ti ta ringana ni mane* yin’we leyi mi yi tirhisaka.’
13 “‘Lowu i munyikelo lowu mi faneleke mi wu humesa: hafu ya seya* eka mpimo wun’wana ni wun’wana wa homere wa koroni ni hafu ya seya eka mpimo wun’wana ni wun’wana wa homere wa maxalana.
14 Mpimo wa mafurha wu fanele wu pimiwa hi tibati. Tibati ta khume ti ringana ni koro* yin’we naswona tibati ta khume i homere yin’we, hikuva tibati ta khume ti ringana ni homere.
15 Eka ntlhambi wa tinyimpfu ta Israyele, ku fanele ku tekiwa nyimpfu yin’we eka ta 200 yi va gandzelo. Magandzelo lawa ma ta va ya gandzelo ra mavele,+ gandzelo ro hisiwa+ ni magandzelo yo kombela ku rhula+ leswaku mi kombelela vanhu ku rivaleriwa,’+ ku vula Yehovha Hosi Leyi Tlakukeke.
16 “‘Vanhu hinkwavo va tiko va ta nyikela hi swilo leswi+ eka ndhuna ya Israyele.
17 Ndhuna hi yona yi nga ta nyikela hi gandzelo ro hisiwa,+ gandzelo ra mavele,+ gandzelo ra swakunwa hi nkarhi wa mikhuvo,+ hi nkarhi wa ku thwasa ka n’weti, hi nkarhi wa Tisavata+ ni hi mikarhi ya mikhuvo hinkwayo ya vanhu va Israyele.+ Hi yona leyi nga ta nyikela hi gandzelo ra xidyoho, gandzelo ra mavele, gandzelo ro hisiwa ni magandzelo ya ku kombela ku rhula leswaku yi kombelela vanhu va Israyele ku rivaleriwa.’
18 “Yehovha Hosi Leyi Tlakukeke u ri: ‘Hi n’hweti yo sungula hi siku ro sungula ra n’hweti, u fanele u teka xinkuzana lexi hanyeke kahle kutani u tengisa ndhawu yo kwetsima exidyohweni.+
19 Muprista u ta teka ngati yin’wana ya gandzelo ra xidyoho, a yi tota eka fureme ya rivanti ra tempele,+ tikhona ta mune ta xitupu lexi rhendzelaka altari ni le ka fureme ya rivanti ra gede ya xivava* xa vaprista.
20 Sweswo hi leswi u nga ta swi endla hi siku ra vunkombo ra n’hweti loko munhu a dyoha hi xihoxo kumbe handle ko swi xiya;+ naswona u fanele u kombelela tempele ku rivaleriwa.+
21 “‘Hi n’hweti yo sungula, hi siku ra vu-14 ra n’hweti, mi ta tlangela nkhuvo wa Paseka.+ Ku fanele ku dyiwa xinkwa lexi nga riki na comela ku ringana masiku ya nkombo.+
22 Hi siku rero, ndhuna yi ta nyikela hi xinkuzana xi va gandzelo ra xidyoho ra yona n’wini ni ra vanhu hinkwavo va tiko.+
23 Eka masiku ya nkombo ya nkhuvo yi ta nyikela swinkuzana swa nkombo leswi hanyeke kahle ni makhuna ya nkombo lama hanyeke kahle swi va gandzelo ro hisiwa eka Yehovha siku ni siku ku ringana masiku ya nkombo+ naswona yi ta tlhela yi nyikela ni hi xiphongo xi va gandzelo ra xidyoho siku rin’wana ni rin’wana.
24 Yi fanele yi tlhela yi nyikela hi mpimo wa efa wa mapa eka xinkuzana xin’wana ni xin’wana ni mpimo wa efa wa mapa eka khuna rin’wana ni rin’wana swi va gandzelo ra mavele, ni hini* ya mafurha eka mpimo wun’wana ni wun’wana wa efa.
25 “‘Hi n’hweti ya vunkombo, hi siku ra vu-15 ra n’hweti,+ yi fanele yi humesa gandzelo leri fanaka ra xidyoho, gandzelo ro hisiwa, gandzelo ra mavele ni mafurha ku ringana masiku ya nkombo hi nkarhi wa nkhuvo.’”
Tinhlamuselo ta le hansi
^ Kumbe “5,2 wa tikhilomitara.”
^ Kumbe “13 wa tikhilomitara.” Laha ku kombeteriwa eka swisungunu swo leha. Vona Xiengetelo B14.
^ Kumbe “259 wa timitara.”
^ Kumbe “25,9 wa timitara.”
^ Kumbe “2,6 wa tikhilomitara.”
^ Vona Xiengetelo B14.
^ Vona Xiengetelo B14.
^ Vona Xiengetelo B14.
^ Kumbe “mayina.” Vona Xiengetelo B14.
^ Vona Xiengetelo B14.
^ Vona Xiengetelo B14.
^ Hi Xiheveru, “1/6 ya efa.” Vona Xiengetelo B14.
^ Vona Xiengetelo B14.
^ Vona Tinhlamuselo.
^ Vona Xiengetelo B14.
