Ezekiyele 7:1-27
7 Yehovha a tlhela a vulavula na mina a ku:
2 “Wena n’wana wa munhu, Yehovha Hosi Leyi Tlakukeke u vule leswi mayelana ni tiko ra Israyele: ‘Makumu! Makumu ma fikele tiko hinkwaro.
3 Sweswi makumu ma ku fikerile, kutani ndzi ta humesela vukarhi bya mina ehenhla ka wena naswona ndzi ta ku avanyisa hi ku ya hi tindlela ta wena ndzi tlhela ndzi ku xupula hikwalaho ka swiendlo swa wena leswi nyenyetsaka.
4 A ndzi nge ku tweli vusiwana naswona a ndzi nge ku tsetseleli,+ hikuva ndzi ta ku hakela hi ku ya hi swiendlo swa wena naswona u ta xaniseka hikwalaho ka swiendlo swa wena leswi nyenyetsaka.+ U ta swi tiva leswaku hi mina Yehovha.’+
5 “Yehovha Hosi Leyi Tlakukeke u ri: ‘Waswivo! Khombo, khombo leri nga tolovelekangiki ra ta.+
6 Makumu ma le ku teni; makumu ma ta fika; ma ta fika u nga ma langutelanga. Waswivo! Ma le ku teni.
7 Khombo ri ku fikerile wena loyi a tshamaka etikweni. Nkarhi wa ta, siku ra kona ri tshinele.+ Etintshaveni ku ni mpfilumpfilu ku nga ri ku huwelela ka ku tsaka.
8 “‘Ku nga ri khale ndzi ta chulula vukarhi bya mina ehenhla ka wena,+ kutani ndzi ta humesela vukarhi bya mina hinkwabyo ehenhla ka wena+ naswona ndzi ta ku avanyisa hi ku ya hi tindlela ta wena ndzi tlhela ndzi ku xupula hikwalaho ka swiendlo swa wena leswi nyenyetsaka.
9 A ndzi nge ku tweli vusiwana; naswona a ndzi nge ku tsetseleli.+ Ndzi ta ku hakela hi ku ya hi swiendlo swa wena naswona u ta xaniseka hikwalaho ka swiendlo swa wena leswi nyenyetsaka. U ta swi tiva leswaku hi mina Yehovha loyi a ku baka.+
10 “‘Siku ri le ku teni! Ri tshinele!+ Khombo ri ku fikerile; nhonga yo xupula ha yona yi lunghekele leswaku ndzi yi tirhisa naswona nala u ye a tikukumuxa swinene.
11 Madzolonga ma hundzuke nhonga ya vuhomboloki.+ Vona kumbe rifuwo ra vona kumbe vanhu va vona kumbe ndhuma ya vona a swi nge poni.
12 Nkarhi wu ta ta, siku ri ta fika. Muxavi a nga tsaki ni muxavisi a nga rili hikuva vanhu hinkwavo va ta weriwa hi vukarhi.*+
13 Hikuva muxavisi a nge he swi kumi leswi xaviweke, hambiloko a ha hanya, hikuva xivono xi khumba vanhu hinkwavo. A nga kona loyi a nga ta pona khombo. A nga kona loyi a endlaka swilo swo biha loyi a nga ta pona.
14 “‘Va chaye mhalamhala+ naswona vanhu hinkwavo va lunghekile, kambe a ku na munhu loyi a yaka enyimpini hikuva ndzi karihele vanhu hinkwavo.+
15 Banga ri le handle+ naswona ntungu ni ndlala swi le ndzeni. Un’wana ni un’wana loyi a nga le handle ka muti u ta dlayiwa hi banga, kasi lava nga endzeni ka muti va ta dlayiwa hi ndlala ni ntungu.+
16 Lava poneke exikarhi ka vona va ta balekela etintshaveni naswona ku fana ni matuva, un’wana ni un’wana wa vona u ta rila hikwalaho ka xihoxo xakwe.+
17 Mavoko ya vona hinkwawo ma ta lengalenga, kasi matsolo ya vona hinkwawo ma ta huma mati.*+
18 Va funengele nguvu yo khwaxa+ naswona va rhurhumela hikwalaho ko chava. Vanhu hinkwavo va ta khomiwa hi tingana naswona nhloko yin’wana ni yin’wana yi ta va ni mpandlha.*+
19 “‘Va ta cukumeta silivhere ya vona eswitarateni naswona va ta venga nsuku wa vona. Silivhere ni nsuku wa vona a swi nge va ponisi esikwini ra ku hlundzuka ka Yehovha.+ A va nge eneriseki kumbe ku xurha hikuva silivhere ni nsuku wa vona swi endle leswaku va dyoha.
20 Va tikukumuxile hi ku saseka ka swin’wetsin’wetsi swa vona naswona va tirhise silivhere ni nsuku ku endla swifaniso leswi nyenyetsaka, swikwembu swa vona leswi nyenyetsaka.+ Hi yona mhaka leyi ndzi nga ta swi endla swi va nchumu lowu va wu vengaka.
21 Ndzi ta swi* nyika vanhu lava humaka ematikweni man’wana ni vanhu vo homboloka leswaku va swi phanga, va ta swi nyamisa.
22 “‘Ndzi ta va fularhela+ naswona ndhawu* ya mina leyi tumbeleke va ta yi thyakisa, swigevenga swi ta nghena eka yona swi yi thyakisa.+
23 “‘Endla nketana,*+ hikuva ngati ya lava gweviwaka+ swi nga fanelanga yi le ku halatiweni etikweni hinkwaro naswona muti wu tele hi madzolonga.+
24 Ndzi ta tisa vanhu vo biha vamatiko+ naswona va ta teka tiyindlu ta vona,+ ndzi ta herisa ku tikukumuxa ka lava nga ni matimba naswona tindhawu ta vona to kwetsima ti ta nyamisiwa.+
25 Loko va xaniseka va ta lava ku rhula kambe a va nge ku kumi.+
26 Va ta weriwa hi khombo ehenhla ka khombo naswona va ta twa swiviko swo hambanahambana. A swi nge va pfuni nchumu ku lava xivono xa muprofeta.+ Tidyondzo ta vaprista ni xitsundzuxo xa vakulukumba a swi nge va pfuni nchumu.+
27 Hosi yi ta rila+ ni ndhuna yi ta va ni gome naswona mavoko ya vanhu va tiko ma ta rhurhumela hikwalaho ko chava. Ndzi ta va khoma hi ku ya hi tindlela ta vona naswona ndzi ta va avanyisa hilaha va avanyiseke van’wana hakona. Va ta swi tiva leswaku hi mina Yehovha.’”+
Tinhlamuselo ta le hansi
^ Leswi vulaka leswaku lava xavaka ndhawu ni lava va yi xavisaka a va nge vuyeriwi, hikuva hinkwavo ka vona va ta lovisiwa.
^ Leswi vulaka ku titsakamisela hikwalaho ko chava.
^ Leswi vulaka leswaku tinhloko ta vona ti ta tsemetiwa misisi hikwalaho ka gome.
^ Ku nga silivhere ni nsuku wa vona, leswi tirhisiweke ku endla swifaniso.
^ Swi tikomba ku kombeteriwa eka kamara ro kwetsima ngopfu ra ndhawu yo kwetsima ya Yehovha.
^ Ku nga tinketana ta vuhlonga.
