Genesa 44:1-34
44 Endzhakunyana Yosefa a lerisa nandza loyi a a khathalela yindlu yakwe a ku: “Tata masaka ya vanhu lava hi swakudya leswi va nga kotaka ku swi rhwala u tlhela u veka ni mali ya un’wana ni un’wana wa vona enon’wini wa saka rakwe.+
2 Kambe u fanele u veka xinwelo xa mina xa silivhere enon’wini wa saka ra lontsongo eka vona, u tlhela u hoxa ni mali leyi a nga xava koroni ha yona.” Hiloko nandza a endla hilaha Yosefa a n’wi leriseke hakona.
3 Nimixo loko ri xile, vavanuna lava va famba ni timbhongolo ta vona.
4 Loko va nga si ya ekule Yosefa a byela nandza loyi a khathalelaka yindlu yakwe a ku: “Va hlongorise! Loko u va kuma u fika u ku, ‘Hikwalaho ka yini mi tlherisele leswinene hi leswo biha?
5 Hikwalaho ka yini mi teke xinwelo xa n’wini wanga lexi a nwaka ni ku hlahluva ha xona? Leswi mi nga swi endla swi bihe ngopfu.’”
6 Hiloko a va kuma, a fika a va byela marito lawa.
7 Kambe va n’wi hlamula va ku: “Hikwalaho ka yini hosi ya hina yi vula sweswo? Malandza ya wena a ma nge pfuki ma endle nchumu wo tano.
8 Phela, mali leyi hi yi kumeke emilon’wini ya masaka ya hina hi vuye na yona hi le tikweni ra Kanana hi yi tlherisela eka wena.+ Kutani, xana hi nga yivisa ku yini silivhere kumbe nsuku endlwini ya n’wini wa wena?
9 Loko yo kumeka eka un’wana wa malandza ya wena, a a dlayiwe kutani hina van’wana hi ta va mahlonga ya n’wini wa mina.”
10 Kutani nandza wa Yosefa a ku: “A swi endleke hilaha mi vulaka hakona: Loyi yi nga ta kumeka eka yena u ta va hlonga ra mina, kambe n’wina van’wana a mi nge vi na nandzu.”
11 Hiloko hinkwavo va hatla va chicha masaka ya vona va ma pfula.
12 A sungula ku secha hi vukheta, ku sukela eka lonkulu ku ya eka lontsongo. Hiloko xinwelo xi ya kumeka esakeni ra Benjamini.+
13 Kutani va handzula swiambalo swa vona hi le xikarhi, va rhwexa timbhongolo mindzhwalo ya vona va tlhelela emutini.
14 Loko Yuda+ ni vamakwavo va nghena endlwini ya Yosefa, a a ha ri kwalaho; hiloko va fika va khinsama emahlweni ka yena.+
15 Kutani Yosefa a ku: “Hikwalaho ka yini mi endle leswi? Xana a mi nga swi tivi leswaku munhu wo fana na mina u kota ku hlahluva?”+
16 Hiloko Yuda a hlamula a ku: “Hi nga ku yini hosi yanga? Xana hi ta ku byela yini? Hi nga swi kombisa njhani leswaku a hi na nandzu? Xikwembu xa ntiyiso xi kume xidyoho xa mahlonga ya wena.+ Sweswi hi mahlonga ya n’wini wanga, hina ni loyi xinwelo xi kumiweke evokweni rakwe!”
17 Hiloko Yosefa a ku: “A ndzi nge mi endli mahlonga hinkwenu ka n’wina! Loyi xinwelo xi kumiweke eka yena, hi yena a nga ta va hlonga ra mina.+ N’wina van’wana fambani hi ku rhula mi ya eka tata wa n’wina.”
18 Kutani Yuda a n’wi tshinelela a ku: “N’wini wanga, ndza ku kombela, ndzi kombela u ndzi lomba tindleve, u nga hlundzukeli nandza wa wena hikuva wena u ni matimba ku fana na Faro.+
19 N’wini wanga u vutise malandza ya yena a ku, ‘Xana mi ni tatana kumbe makwenu?’
20 Hi hlamule n’wini wanga hi ku, ‘Hi ni tatana loyi se a kuleke, ni makwerhu lontsongo+ loyi a velekiweke loko tatana se a dyuharile. Kambe makwavo se u file,+ ku lo sala yena ntsena eka vana va mana wakwe+ naswona tata wakwe wa n’wi rhandza.’
21 Endzhaku ka sweswo u hi byele u ku: ‘N’wi tiseni ndzi ta n’wi vona.’+
22 Kambe hi byele n’wini wanga hi ku, ‘A swi nge koteki leswaku mufana a siya tata wakwe. Loko o n’wi siya, kunene tata wakwe u ta fa.’+
23 Kutani u byele malandza ya wena u ku, ‘Mi nga ha tlheli mi vuya laha loko mi nga ri na yena makwenu lontsongo.’+
24 “Kutani hi yile eka tatana nandza wa wena, hi fika hi n’wi byela leswi u nga hi byela swona n’wini wanga.
25 Endzhakunyana tatana u te, ‘Tlhelelani mi ya hi xavela swakudyanyana.’+
26 Kambe hi te, ‘Hi ta ya ntsena loko makwerhu lontsongo a ri na hina, hikuva a hi nge swi koti ku tlhelela eka wanuna luya hi nga ri na yena.’+
27 Kutani tatana nandza wa wena, a ku, ‘Mi swi tiva kahle leswaku nsati wa mina u ndzi tswalele vana vambirhi ntsena va majaha.+
28 Kambe un’wana wa vona u ndzi siyile ivi ndzi ku: “U fanele a phatluleriwile!”+ a ndzi si n’wi vona ku ta fikela sweswi.
29 Loko mo ndzi tekela ni loyi kutani a ya humeleriwa hi khombo a fa, mi ta endla leswaku ndzi fa ndzi ya eSirheni*+ ndzi ri ni gome+ eku dyuhaleni ka mina.’
30 “Loko ndzo tlhelela eka tatana nandza wa wena ndzi nga ri na yena mufana loyi, leswi a n’wi rhandzaka ngopfu,
31 loko o vona mufana a nga ri kona u ta fa, kutani hina malandza ya wena hi ta va hi dlaye tatana, u ta nghena eSirheni* hi mbitsi evudyuharini byakwe.
32 Mina nandza wa wena, ndzi tshembise tatana ndzi ku, ‘Loko ndzo tsandzeka ku vuya na yena, ndzi ta va ndzi ku dyoherile hilaha ku nga heriki.’+
33 Kutani ndzi kombela leswaku ku sala mina, ndzi va hlonga ra wena ematshan’weni ya mufana loyi, leswaku a muka ni vamakwavo.
34 Ndzi ta tlhelela njhani eka tatana ndzi nga ri na yena mufana loyi? A ndzi nge swi tiyiseli ku vona tatana a weriwa hi khombo leri!”
