Hosiya 11:1-12
11 “Loko Israyele a ha ri mufana a ndzi n’wi rhandza,+Ndzi vitane n’wananga a huma eEgipta.+
2 Loko va* va vitana,A va tshamela ku ala.+
Va ya emahlweni va endlela Bali magandzelo,+A va endlela swikwembu leswi vatliweke magandzelo.+
3 Kambe hi mina loyi ndzi nga deyisa Efrayimi,+ ndzi n’wi tlakula;+Kambe a va swi lemukanga leswaku ndzi va horisile.
4 Ndzi tirhise rirhandzu ni musa ku fana ni tintambu leswaku ndzi va kokela eka mina;+A ndzi fana ni loyi a susaka joko etinhan’wini ta vona,Naswona ndzi va tisele swakudya hi musa.
5 A va nge tlheleli etikweni ra Egipta kambe Asiriya u ta va hosi ya vona,+Hikuva va arile ku tlhelela eka mina.+
6 Banga ri ta rhendzeleka ni miti ya yena+Ri n’wi herisa swin’we ni swo goga swa tinyangwa ta muti hikwalaho ka makungu ya vona yo biha.+
7 Vanhu va mina va tolovele ku ka va nga tshembeki eka mina.+
Hambiloko va vitaniwa leswaku va tlhelela eka loyi a tlakukeke,* a nga kona ni un’we loyi a yingisaka.
8 Xana ndzi nga ku tshikisa ku yini, wena Efrayimi?+
Xana ndzi nga ku nyiketisa ku yini eka valala va wena, wena Israyele?
Xana ndzi nga ku khoma ku fana na Adima hi ndlela yihi?
Xana ndzi nga ku endla u fana na Seboyima hi ndlela yihi?+
Mbilu ya mina se yi hundzukile;Ndzi ni ntwelavusiwana.+
9 Ndzi ta tikhoma eka vukarhi bya mina lebyi pfurhaka.
A ndzi nge he n’wi lovisi Efrayimi,+Hikuva mina ndzi Xikwembu a ndzi munhu,Ndzi Mukwetsimi exikarhi ka wena;A ndzi nge lwi na wena ndzi hlundzukile.
10 Va ta landzela Yehovha, kutani u ta vomba kukota nghala;+Loko a vomba, vana va yena va ta ta va ri karhi va rhurhumela va huma evupeladyambu.+
11 Loko va huma eEgipta va ta rhurhumela ku fana ni xinyenyana,Ku fana ni tuva loko va huma etikweni ra Asiriya;+Kutani ndzi ta va tshamisisa etindlwini ta vona,” ku vula Yehovha.+
12 “Efrayimi u tshamela ku ndzi xisa,Hinkwako laha ndzi yaka kona ndzi vona vuxisi bya yindlu ya Israyele.+
Kambe Yuda wa ha famba ni Xikwembu,Naswona wa tshembeka eka La Kwetsimaka Ngopfu.”+
Tinhlamuselo ta le hansi
^ Ku nga vaprofeta ni van’wana lava rhumiweke ku dyondzisa Vaisrayele.
^ Ku nga vugandzeri bya ntiyiso.
