Hosiya 12:1-14
12 “Efrayimi u tshemba leswi nga pfuniki nchumu.*
U hlongorisa moya wa le vuxeni siku hinkwaro.
U tshamela ku hemba ni ku endla madzolonga.
Va endla ntwanano na Asiriya+ kutani va teka mafurha va ma yisa eEgipta.+
2 Yehovha u ni mhaka leyi a lavaka ku yi tenga na Yuda;+U lava leswaku Yakobo a tihlamulela hikwalaho ka swiendlo swakwe,U ta endla leswaku a kuma hakelo ya swiendlo swakwe.+
3 U khome makwavo hi xirhendze loko a ha ri ekhwirini,+U lwe ni Xikwembu hi matimba yakwe hinkwawo.+
4 A nga tshikanga ku lwa ni ntsumi kukondza a yi hlula.
U ririle a kombela ku katekisiwa.”+
Xi n’wi kume eBethele kutani xi vulavula na hina,+
5 Yehovha Xikwembu xa mavuthu,+Yehovha i vito leri a tiviwaka ha rona.*+
6 “Tlhelela eka Xikwembu xa wena,+Tshama u ri ni rirhandzu ra ntiyiso ni vululami,+U tshemba Xikwembu xa wena mikarhi hinkwayo.
7 Kambe n’wamabindzu* u khome swikalo swa vuxisi;U rhandza ku kanganyisa.+
8 Efrayimi u tshamela ku vula a ku, ‘Mina ndzi fuwile;+Ndzi tikumele swilo swa nkoka.+
Eka hinkwaswo leswi ndzi swi endlaka a va nge kumi xihoxo kumbe xidyoho.’
9 Kambe hi mina Yehovha Xikwembu xa wena ku sukela loko wa ha ri etikweni ra Egipta.+
Ndzi ta tlhela ndzi endla leswaku u tshama ematendeniKu fana ni le masikwini ya nkhuvo.
10 Ndzi vulavule ni vaprofeta,+Ndzi andzise swivono swa vona,Ndzi vulavule hi swifananisi hi ku tirhisa vaprofeta.
11 Vanhu va le Giliyadi va ni vukanganyisi*+ naswona a va na ntiyiso.
EGiligala va endle magandzelo hi tinkuzi.+Tialtari ta vona ti fana ni tinhulu ta maribye enhoveni.+
12 Yakobo u balekile a ya etikweni ra Aramu;*+Israyele+ u tirhe kwale leswaku a ta kuma nsati,+U rise tinyimpfu leswaku a ta kuma nsati.+
13 Yehovha u humese Israyele eEgipta hi ku tirhisa muprofeta,+Israyele a a sirheleriwa hi muprofeta.+
14 Efrayimi u khunguvanyise Xikwembu swinene;+Wa ha ri ni nandzu wa ngati;Hosi yakwe yi ta n’wi xupula hikwalaho ka ndzhukano wa yena.”+
Tinhlamuselo ta le hansi
^ Hi Xiheveru, “Efrayimi u dya moya.”
^ Kumbe “i vito leri a tsundzukiwaka ha rona.”
^ Kumbe “muxavisi.”
^ Kumbe “va endla masalamusi.”
^ Kumbe “Siriya.”
