Hosiya 3:1-5
3 Kutani Yehovha a ku eka mina: “Famba u ya tlhela u rhandza nsati wa wena loyi a endlaka vuoswi,+ la rhandziwaka hi wanuna un’wana, hilaha Yehovha a rhandzaka vanhu va Israyele+ hakona hambileswi va gandzelaka swikwembu+ swin’wana ni ku rhandza makhekhe* lama endliweke hi madiriva lama omisiweke.”
2 Ndzi tixavele yena hi swiphemu swa silivhere swa 15 ni mpimo wa homere* ni hafu ya maxalana.
3 Kutani ndzi ku eka yena: “U ta va wa mina ku ringana nkarhi wo leha. U nga tshuki u endla vunghwavava, u nga tshuki u etlela ni wanuna un’wana, na mina a ndzi nge etleli na wena.”
4 Hikuva vanhu va Israyele va ta tshama nkarhi wo leha* va nga ri na hosi,+ va nga ri na hosana, va nga endli magandzelo, va nga ri na timhandzi ta swikwembu swa mavunwa, va nga ri na efodi*+ ni swifaniso swa terafimi.*+
5 Endzhaku ka sweswo vanhu va Israyele va ta vuya va ta lava Yehovha Xikwembu xa vona,+ na Davhida hosi ya vona+ naswona emasikwini yo hetelela va ta ta eka Yehovha va ri karhi va rhurhumela hikwalaho ka vunene bya yena.+
Tinhlamuselo ta le hansi
^ Ku nga lawa a ma tirhisiwa evugandzerini bya mavunwa.
^ Homere a yi ringana na 220 wa tilitara. Vona Xiengetelo B14.
^ Hi Xiheveru, “masiku yo tala.”
^ Vona Tinhlamuselo.
^ Kumbe “swikwembu swa ndyangu; swifaniso swa mavunwa.”
