Vaavanyisi 7:1-25
7 Hiloko Yerubali, ku nga Gidiyoni+ ni vanhu hinkwavo lava nga na yena, va pfuka nimpundzu swinene va ya dzima mixaxa eXihlobyeni xa Haroda, loko hi hala tlhelo Vamidiyani va dzime mixaxa ya vona en’walungwini, erivaleni leri nga ehansi ka xintshabyana xa More.
2 Kutani Yehovha a byela Gidiyoni a ku: “Vanhu lava u nga na vona va tele ngopfu, a ndzi nge va nyiketi Vamidiyani eka vona,+ hikuva va nga ha tikukumuxa va ku, ‘Hi hlule hi matimba ya hina.’+
3 Ndzi kombela u va byela u ku: ‘Loyi a chavaka a tlhela a rhurhumela a muke.’”+ Hiloko Gidiyoni a va kambela. Ku tlhele vanhu va 22 000, ku sala 10 000 ntsena.
4 Yehovha a tlhela a ku eka Gidiyoni: “Vanhu lava u nga na vona va ha tele ngopfu. Famba na vona exinambyanini leswaku ndzi ta ku kambelela vona. Loko ndzi ku eka wena, ‘Loyi u ta famba na wena,’ u ta famba na wena, kambe loko ndzi ku byela ndzi ku, ‘Loyi a nge fambi na wena,’ a nge fambi na wena.”
5 Hiloko a famba na vona exinambyanini.
Kutani Yehovha a ku eka Gidiyoni: “Hambanisa lava nwaka mati hi xandla ku fana ni timbyana eka lava nwaka mati va khinsamile.”
6 Nhlayo ya lava nweke mati hi xandla ku ve 300. Lavan’wana hinkwavo va nwe mati va khinsamile.
7 Yehovha a ku eka Gidiyoni: “Ndzi ta endla leswaku u hlula hi vavanuna lava va 300 lava nweke mati hi xandla naswona ndzi ta nyiketa Vamidiyani eka n’wina.+ Kambe tshika vavanuna lavan’wana va muka.”
8 Endzhaku ka loko vavanuna va 300 va teke timbuva ni tinanga ta vavanuna lavan’wana, Gidiyoni a tlherisela vavanuna lavan’wana hinkwavo va Israyele emakaya, a sala ni lava 300 ntsena. Vamidiyani a va dzime mixaxa erivaleni leri nga ehansi ka xintshabyana.+
9 Hi vusiku byebyo Yehovha a byela Gidiyoni a ku: “Pfuka u ya hlasela Vamidiyani hikuva ndzi va nyikete eka wena.+
10 Kambe loko u chava ku ya va hlasela, famba ni nandza wa wena Pura enxaxeni.
11 Yingisela leswi va swi vulaka naswona endzhaku ka sweswo u ta va ni xivindzi xo va hlasela.” Hiloko Gidiyoni na Pura nandza wakwe va ya emakumu ka nxaxa wa Vamidiyani.
12 Vamidiyani, Vaamaleke ni vanhu hinkwavo va le Vuxeni+ a va tele erivaleni leri nga ehansi ka xintshabyana ku fana ni tinjiya naswona tikamela ta vona a ti tele+ ku fana ni sava ra lwandle.
13 Gidiyoni a fika a kuma wanuna un’wana a ri karhi a hlamusela munghana wakwe norho lowu a wu lorheke, a ku: “Ndzi lorhe leswi. A ku ri ni xinkwa xa xirhendzevutana lexi endliweke hi maxalana lexi a xi ri karhi xi khunguluka xi ya enxaxeni wa Vamidiyani. Xi fika xi ba tende ri wa.+ Xi ri hundzuluxa ri yima hi nhloko kutani ri pfutama.”
14 Hiloko munghana wakwe a ku: “Leri i banga ra Gidiyoni+ n’wana wa Yowasi, wanuna wa Muisrayele. Xikwembu xi nyikete Vamidiyani ni vanhu lavan’wana eka yena.”+
15 Loko Gidiyoni a twa wanuna yoloye a hlamusela norho ni nhlamuselo ya wona,+ a khinsama a dzunisa Xikwembu. Endzhaku ka sweswo a tlhelela enxaxeni wa Vaisrayele a fika a ku: “Pfukani hikuva Yehovha u nyikete Vamidiyani eka n’wina.”
16 Hiloko a ava vavanuna lava va 300 va va mitlawa yinharhu kutani hinkwavo ka vona a va nyika tinanga+ ni makhuwana lama nga ni swisana endzeni ka wona.
17 Kutani a ku eka vona: “Ndzi languteni naswona mi endla leswi ndzi nga ta swi endla. Loko ndzi fika emakumu ka nxaxa, mi fanele mi endla leswi ndzi nga ta swi endla.
18 Loko mina ni hinkwavo lava nga na mina hi ba tinanga na n’wina mi fanele mi ba tinanga ta n’wina ematlhelweni hinkwawo ya nxaxa kutani mi huwelela mi ku, ‘Nyimpi i ya Yehovha na Gidiyoni!’”
19 Gidiyoni ni vavanuna va 100 lava a a ri na vona va ya emakumu ka nxaxa wa valala va vona nivusiku* loko masocha ma ha ku sungula ku rindza. Va ba tinanga+ va tlhela va fayetela makhuwana lawa a va ma khomile.+
20 Hiloko mitlawa leyinharhu yi ba tinanga kutani yi fayetela makhuwana. Kutani yi huwelela yi khome swisana hi mavoko ya ximatsi naswona yi ba tinanga hi mavoko ya xinene yi ku: “Banga ra Yehovha ni ra Gidiyoni!”
21 Vavanuna lava va yima etindhawini ta vona va rhendzela nxaxa, hiloko vanhu hinkwavo lava a va ri enxaxeni va baleka va ri karhi va huwelela.+
22 Vavanuna lava va 300 va ya emahlweni va ba tinanga ta vona kutani Yehovha a endla leswaku Vamidiyani va lwa hi xivona;+ hiloko va tsutsumela eBeta-xita, va ya eSerera, ku ya fika emakumu ka Avele-mehola+ eTabata.
23 Hiloko ku hlengeletiwa vavanuna va Vaisrayele lava humaka eka nyimba ya Neftali, Axere na Manase+ kutani va hlongorisa Vamidiyani.
24 Gidiyoni a rhumela vanhu etindhawini hinkwato leti nga ni tintshava leti ku tshamaka nyimba ya Efrayimi, a ku: “Fambani mi ya hlasela Vamidiyani, mi va rhangela leswaku va nga tsemakanyi Nambu wa Yordani ni milambu leyi nga eBeta-bara.” Hiloko vavanuna hinkwavo va Efrayimi va hlengeletana, va va sivela leswaku va nga tsemakanyi milambu leyi nga eBeta-bara ni Nambu wa Yordani.
25 Va tlhela va khoma ni tihosana timbirhi ta Vamidiyani, ku nga Orebe na Zebe; va dlaya Orebe eribyeni ra Orebe,+ kasi Zebe va n’wi dlayela endhawini yo kamela madiriva ya Zebe. Va ya emahlweni va hlongorisa Vamidiyani+ kutani va tisa nhloko ya Orebe na Zebe eka Gidiyoni exifundzheni xa Yordani.
Tinhlamuselo ta le hansi
^ Ku sukela kwalomu ka 10:00 nivusiku ku ya fikela kwalomu ka 2:00 nimixo.
