Varhoma 5:1-21
5 Hikwalaho, leswi se hi vuriweke lava lulameke hikwalaho ka ripfumelo,+ a hi veni ni ku rhula* ni Xikwembu hi Hosi ya hina Yesu Kreste,+
2 hikuva hikwalaho ka ripfumelo leri hi nga na rona eka yena, hi pfuleriwe ndlela leswaku hi kuma musa lowukulu wa Xikwembu lowu hi nga eka wona sweswi;+ a hi tsakeni* hikuva hi ni ntshembo wo kuma ku vangama ka Xikwembu.
3 Ku nga ri sweswo ntsena kambe a hi tsakeni* loko hi ri emaxangwini+ tanihi leswi hi swi tivaka leswaku maxangu ma tswala ku tiyisela;+
4 ku tiyisela ku endla leswaku hi amukeleka eka Xikwembu,+ ku amukeleka eka Xikwembu ku endla leswaku hi va ni ntshembo,+
5 naswona ntshembo a wu endli leswaku munhu a khomiwa hi tingana;+ hikuva Xikwembu xi chululele rirhandzu ra xona etimbilwini ta hina hi ku tirhisa moya lowo kwetsima lowu xi hi nyikeke wona.+
6 Hikuva loko ha ha tsanile+ Kreste u fele vadyohi hi nkarhi lowu vekiweke.
7 Hikuva a nga kona loyi a nga felaka munhu loyi a lulameke; hambileswi kumbexana munhu un’wana a nga ha xinyataka a fela munhu lonene.
8 Kambe Xikwembu xi kombise rirhandzu ra xona eka hina, hileswi Kreste a hi feleke loko ha ha ri vadyohi.+
9 Kutani leswi se hi vuriweke lava lulameke hikwalaho ka ngati ya Yesu,+ hi ta pona eka vukarhi bya Xikwembu.+
10 Hikuva loko hi vuyelelane ni Xikwembu hikwalaho ka rifu ra N’wana wa xona+ enkarhini lowu a hi ri valala va xona, swi le rivaleni leswaku hi ta ponisiwa hi vutomi bya yena hikuva se hi vuyelelane na xona.
11 Ku nga ri sweswo ntsena, kambe hi tlhela hi tsaka eka Xikwembu hikwalaho ka Hosi ya hina Yesu Kreste loyi ha yena hi koteke ku tlhela hi vuyelelana ni Xikwembu.+
12 Hikwalaho, tanihi leswi xidyoho xi ngheneke emisaveni hi munhu un’we, ni rifu ri ngheneke hikwalaho ka xidyoho,+ kutani rifu ri tlulele vanhu hinkwavo hikuva hinkwavo va dyohile.+
13 Hikuva xidyoho a xi ri kona emisaveni Nawu wu nga si va kona, kambe vanhu a va nge vi na xidyoho loko ku nga ri na nawu.+
14 Nilokoswiritano, rifu ri ve hosi ku sukela eka Adamu ku ya fika eka Muxe hambi ku ri eka lava nga dyohangiki hi ndlela leyi Adamu a nga dyoha ha yona, yena loyi a a fanekisela loyi a a ta ta.+
15 Kambe nyiko a yi fani ni xidyoho. Hikuva loko vanhu vo tala va fa hikwalaho ka xidyoho xa munhu un’we, swi le rivaleni leswaku musa lowukulu wa Xikwembu ni nyiko ya xona ya mahala hikwalaho ka musa lowukulu wa munhu un’we,+ Yesu Kreste, swi ta tisela vanhu vo tala mikateko leyi nga pimanisiwiki na nchumu!+
16 Nakambe, vuyelo bya nyiko ya mahala a byi fani ni vuyelo bya xidyoho xa munhu un’we.+ Hikuva xidyoho xin’we xi endle leswaku vanhu va voniwa nandzu+ kambe nyiko leyi tisiweke endzhaku ka loko vanhu vo tala va dyohile yi endle leswaku vanhu va vuriwa lava lulameke.+
17 Loko rifu ri ve hosi hikwalaho ka xidyoho xa munhu un’we,+ a hi kanakani leswaku lava nga ta kuma ndzalo ya musa lowukulu ni nyiko ya mahala ya ku lulama+ va ta hanya va tlhela va va tihosi+ hikwalaho ka munhu un’we, ku nga Yesu Kreste!+
18 Hikwalaho, leswi vanhu va mixaka hinkwayo va voniweke nandzu+ hikwalaho ka xidyoho xin’we, hilaha ku fanaka, vanhu va mixaka hinkwayo+ va vuriwa lava lulameleke vutomi+ hikwalaho ka xiendlo xin’we lexinene.
19 Hikuva tanihi leswi vo tala va veke vadyohi+ hikwalaho ka leswi munhu un’we a nga yingisangiki, vanhu vo tala va ta va lava lulameke hikwalaho ka ku yingisa ka munhu un’we.+
20 Nawu wu ve kona leswaku vanhu va ta swi vona leswaku va endla swidyoho swo tala.+ Kambe laha xidyoho xi nga andza, musa lowukulu wa Xikwembu na wona wa tala swinene.
21 Hi xikongomelo xihi? Leswi xidyoho xi veke hosi swin’we ni rifu,+ hilaha ku fanaka musa lowukulu wu va hosi hikwalaho ka ku lulama loku yisaka evuton’wini lebyi nga heriki ha Yesu Kreste Hosi ya hina.+
Tinhlamuselo ta le hansi
^ Kumbexana “hi ni ku rhula.”
^ Kumbexana “ha tsaka.”
^ Kumbexana “ha tsaka.”
