Yeremiya 11:1-23
11 Yehovha a vulavula na Yeremiya a ku:
2 “Twanani marito ya ntwanano lowu, n’wina vanhu!
“Ma byele* vanhu va le Yuda ni vaaki va le Yerusalema
3 u ku eka vona, ‘Yehovha Xikwembu xa Israyele u ri: “A ku rhukaniwe munhu loyi a nga ma yingisiki marito ya ntwanano lowu,+
4 lawa ndzi ma leriseke vakokwa wa n’wina hi siku leri ndzi va humeseke ha rona etikweni ra Egipta,+ exitikweni xo n’okisa nsimbhi+ ndzi ku, ‘Yingisani rito ra mina mi endla swilo hinkwaswo leswi ndzi mi lerisaka swona; kutani mi ta va vanhu va mina naswona mina ndzi ta va Xikwembu xa n’wina,+
5 leswaku ndzi endla leswi ndzi nga hlambanyela vakokwa wa n’wina, ku nga ku va nyika tiko leri khulukaka ntswamba ni vulombe,+ ku fana ni le sikwini leri.’”’”
Hiloko ndzi ku: “Amen,* Yehovha.”
6 Kutani Yehovha a ku eka mina: “Vula marito lawa hinkwawo emitini ya Yuda ni le switarateni swa Yerusalema u ku: ‘Twanani marito ya ntwanano lowu, mi ma endla.
7 Hikuva ndzi tshinye vakokwa wa n’wina hi siku leri ndzi va humeseke ha rona etikweni ra Egipta ku ta fikela esikwini leri, ndzi va tshinye hi ku phindhaphindha* ndzi ku: “Yingisani rito ra mina.”+
8 Kambe a va yingisanga kumbe ku rhiya ndleve; ku ri na sweswo, un’wana ni un’wana u ye emahlweni a tiomisa nhloko a landzela mbilu yakwe yo homboloka.+ Kutani ndzi va xupule hi ku ya hi leswi ntwanano wu vulaka swona. Ndzi va lerise leswaku va wu yingisa naswona va arile ku wu yingisa.’”
9 Yehovha a ku eka mina: “Vanhu va le Yuda ni va le Yerusalema va bohe makungu yo biha.
10 Va tlhelele eka swihoxo swa vakokwa wa vona, lava aleke ku yingisa marito ya mina.+ Na vona va landzelele swikwembu swin’wana va tlhela va swi tirhela.+ Vanhu va tiko ra Israyele ni ra Yuda ma tlule ntwanano wa mina lowu ndzi wu endleke ni vakokwa wa wona.+
11 Hikwalaho Yehovha u ri, ‘Ndzi va tisela khombo+ leri va nga ta ka va nga swi koti ku ri balekela. Loko va kombela mpfuno eka mina, a ndzi nge va yingisi.+
12 Kutani vanhu va miti ya Yuda ni vaaki va le Yerusalema va ta ya eka swikwembu leswi va swi endlelaka magandzelo va kombela leswaku swi va pfuna,+ kambe a swi nge swi koti ku va ponisa loko va weriwa hi khombo.
13 Hikuva swikwembu swa wena swi tele ku fana ni miti ya wena, wena Yuda, naswona u endlele nchumu lowu nyumisaka* tialtari to tala ku fana ni switarata swa Yerusalema, tialtari to endlela Bali magandzelo.’+
14 “Loko ku ri wena,* u nga va khongeleli vanhu lava. U nga huweleli hikwalaho ka vona kumbe u va khongelela+ hikuva a ndzi nge va yingisi loko va huwelela eka mina hikwalaho ka khombo ra vona.
15 Hi yihi mfanelo leyi vanhu va mina lava ndzi va rhandzaka va nga na yona yo va endlwini ya mina,Loko vo tala va vona va endla makungu yo biha?
Xana va nga sivela khombo hi nyama yo kwetsima* loko ri va tela?
Xana u ta tsaka hi nkarhi wolowo?
16 Yehovha u tshame a ku vitana murhi lowukulu wa mutlhwari,Wo saseka lowu tswalaka mihandzu leyinene.
Kambe ku twakale huwa leyikulu kutani a n’wi hisa hi ndzilo,Naswona va tshove marhavi ya wona.
17 “Yehovha wa mavuthu, Mubyari wa wena,+ u vule leswaku u ta weriwa hi khombo hikwalaho ka vubihi lebyi endliweke hi tiko ra Israyele ni ra Yuda, lama ndzi hlundzukiseke hi ku endlela Bali magandzelo.”+
18 Yehovha u ndzi byerile leswaku ndzi ta swi tiva;Hi nkarhi wolowo u ndzi endle ndzi vona leswi a va ri eku swi endleni.
19 A ndzi fana ni xinyimpfana xo rhula lexi yisiwaka eku tlhaviweni.
A ndzi nga ma tivi makungu lawa a va ndzi bohela wona va ku:+
“A hi loviseni murhi ni mihandzu ya wona,A hi n’wi dlayeni etikweni ra lava hanyaka,Leswaku vito rakwe ri nga ha tsundzukiwi.”
20 Kambe Yehovha wa mavuthu u avanyisa hi ndlela yo lulama;U kambisisa mianakanyo leyi dzikeke* ni mbilu.+
Ndzi pfumelele ndzi vona loko u tirihisela eka vona,Hikuva ndzi ku byele mhaka ya mina leyi lavaka ku tengiwa.
21 Hikwalaho Yehovha u vula leswi eka vavanuna va le Anathoti+ lava lavaka ku ku dlaya ni lava va nge: “U nga tshuki u profeta hi vito ra Yehovha,+ handle ka sweswo hi ta ku dlaya”;
22 hikwalaho Yehovha wa mavuthu u ri: “Ndzi ta lava leswaku va tihlamulela. Majaha ma ta dlayiwa hi banga+ naswona vana va vona va ta dlayiwa hi ndlala.+
23 A ku nge poni munhu hikuva ndzi ta tisa khombo eka vavanuna va le Anathoti,+ hi lembe leri va nga ta tihlamulela ha rona.”
Tinhlamuselo ta le hansi
^ Swi tikomba ku byeriwa Yeremiya.
^ Kumbe “A swi ve tano.”
^ Hi Xiheveru, “pfuke nimpundzu ndzi va tshinya.”
^ Kumbe “xikwembu lexi nyumisaka.”
^ Ku nga Yeremiya.
^ Ku nga magandzelo lama endliwaka etempeleni.
^ Hi Xiheveru, “tinso.”
