Yeremiya 5:1-31
5 Rhendzelekani eswitarateni swa Yerusalema.
Lavisisani mi xiyisisa.
Lavisisani exikarhi ka muti mi vonaLoko mi ta kuma munhu loyi a lulameke,+Loyi a rhandzaka ku tshembeka,Kutani ndzi ta wu rivalela.
2 Hambiloko va ku: “Leswi Yehovha a hanyaka!”
Va ha ta va va hlambanya mavunwa.+
3 Yehovha Xikwembu xanga, xana matihlo ya wena a ma languti lava tshembekaka?+
U va bile kambe a swi pfunanga nchumu.*
U va lovisile kambe va arile ku yingisa ndzayo.+
Va endle swikandza swa vona swi tiya ku tlula ribye,+Va arile ku hundzuka.+
4 Kambe mina ndzi te: “Hakunene vanhu lava i va xiyimo xa le hansi.
Va endla vuphukuphuku hikuva a va yi tivi ndlela ya Yehovha,A va byi tivi vuavanyisi bya Xikwembu xa vona.
5 Ndzi ta ya eka vavanuna lava dumeke ndzi ya vulavula na vona,Hikuva va fanele va yi tiva ndlela ya Yehovha,Va tiva vuavanyisi bya Xikwembu xa vona.+
Kambe hinkwavo va tshove jokoNaswona va tseme matomu.”
6 Hi yona mhaka leyi nghala ya le khwatini yi va hlaselaka,Mhisi ya le mananga yi tshamela ku va lovisa,Yingwe yi tshama yi rhamerile emitini ya vona.
Un’wana ni un’wana loyi a humaka eka yona wa phatluleriwa.
Hikuva swidyoho swa vona swi tele;Swiendlo swa vona swa ku ka va nga tshembeki swi tele.+
7 Xana ndzi nga mi rivalela njhani eka leswi?
Vana va n’wina va ndzi fularherile,Va hlambanya hi lexi nga riki Xikwembu.+
Ndzi va nyike leswi va swi pfumalaka,Kambe va ye emahlweni va endla vuoswi,Va khitikanele endlwini ya nghwavava.
8 Va fana ni tihanci leti swi navelaka swinene ku endla timhaka ta masangu,Un’wana ni un’wana u rilela nsati wa wanuna un’wana.+
9 “Xana a ndzi fanelanga ndzi lava leswaku va tihlamulela eka mina hikwalaho ka swilo leswi?” ku vula Yehovha.
“Xana a ndzi fanelanga ndzi tirihisela eka tiko ro tano?”+
10 “Tanani mi ta hlasela masimu ya rona ya madiriva mi ma herisa,Kambe mi nga ma herisi hi ku helela.+
Tsemani marhavi ya rona lamatsongo,Hikuva a hi ya Yehovha.
11 Tiko ra Israyele ni tiko ra YudaMa ndzi kanganyise ngopfu,” ku vula Yehovha.+
12 “Ma landzule Yehovha naswona ma tshamela ku vula ma ku,‘A nge endli nchumu.*+
A ku na khombo leri nga ta hi wela;A hi nge dlayiwi hi banga kumbe ndlala.’+
13 Vaprofeta va vulavula swilo leswi nga pfuniki nchumu,Rito ra Xikwembu a ri kona eka vona.
Va ta herisiwa ku fana ni marito ya vona.”
14 Hikwalaho Yehovha Xikwembu xa mavuthu u ri:
“Leswi vanhu lava va vulaka leswi,Sweswi ndzi endla leswaku marito ya mina ma va ndzilo enon’wini wa wena,+Vanhu lava i tihunyi,Kutani wu ta va lovisa.”+
15 “Sweswi ndzi mi tisela tiko leri humaka ekule, n’wina Vaisrayele,”+ ku vula Yehovha.
“I tiko leri nga ta tshama nkarhi wo leha.
I tiko ra khale swinene,Tiko leri mi nga ri tiviki ririmi ra rona,I tiko leri ririmi ra rona mi nga ta ka mi nga ri twisisi.+
16 Nkotloto wa vona wu fana ni sirha leri pfulekeke;Hinkwavo i tinhenha.
17 Va ta dya ntshovelo wa n’wina ni xinkwa xa n’wina.+
Va ta dlaya vana va n’wina va majaha ni vanhwanyana.
Va ta dya mitlhambi ya n’wina ya tinyimpfu ni ya tihomu.
Va ta dya mirhi ya n’wina ya madiriva ni ya mikuwa.
Va ta yi lovisa hi banga miti ya n’wina leyi biyeleriweke leyi mi yi tshembaka.”
18 “Kambe emasikwini wolawo,” ku vula Yehovha, “a ndzi nge mi herisi hi ku helela.+
19 Loko va vutisa va ku, ‘Hikwalaho ka yini Yehovha Xikwembu xa hina a endle swilo leswi eka hina?’ u fanele u ku, ‘Hilaha mi ndzi fularheleke hakona mi ya tirhela xikwembu xin’wana etikweni ra n’wina, kutani mi ta tirhela vafambi etikweni leri nga riki ra n’wina.’”+
20 Vula leswi eka vatukulu va Yakobo,Kutani u swi twarisa eYuda, u ku:
21 “Twanani leswi n’wina vanhu lava nga swiphukuphuku:*+
Va ni matihlo kambe a va voni;+Va ni tindleve kambe a va twi.+
22 ‘Xana a mi ndzi chavi?’ ku vula Yehovha,‘Xana a mi fanelanga mi rhurhumela emahlweni ka mina?
Hi mina loyi a vekeke sava leswaku ri va ndzilakano wa lwandle,Nawu wa hilaha ku nga heriki wa leswaku ri nga wu hundzi.
Hambiloko magandlati ya rona ma ya hala ni hala, a ma nge endli nchumu;Hambiloko ma kariha, a ma nge wu hundzi.+
23 Kambe vanhu lava va ni mbilu yo sihalala ni yo xandzuka;Va hambukile naswona va fambe endleleni ya vona.+
24 A va vuli embilwini ya vona va ku:
“Sweswi a hi chaveni Yehovha Xikwembu xa hina,Loyi a nisaka mpfula hi nguva ya yona,Mpfula ya xixikana ni mpfula ya ximun’wana,Loyi a hi rindzelaka mavhiki lama vekiweke ya ntshovelo.”+
25 Swihoxo swa n’wina swi sivele swilo leswi leswaku swi ta;Swidyoho swa n’wina swi mi tsonise swilo leswinene.+
26 Hikuva exikarhi ka vanhu va mina ku ni vanhu vo homboloka.
Va tshamela ku langutisisa, ku fana ni loko vaphasi va swinyenyana va nyandlamela.
Va rhiya xirimbana lexi dlayaka.
Va phasa vanhu.
27 Ku fana ni hoko leyi taleke hi swinyenyana,Tiyindlu ta vona na tona ti tele vukanganyisi.+
Hi yona mhaka leyi va veke ni matimba va tlhela va fuwa.
28 Va nonile naswona nhlonge ya vona ya hatima;Swiendlo swa vona swo biha swi tele ngopfu.
A va wu kambisisi nandzu wa n’wana loyi a nga riki na tatana,+Leswaku va humelela;Va ala ku kombisa xisiwana vululami.’”+
29 “Xana a ndzi fanelanga ndzi lava leswaku va tihlamulela eka mina hikwalaho ka swilo leswi?” ku vula Yehovha.
“Xana a ndzi fanelanga ndzi tirihisela eka tiko ro tano?
30 Etikweni ku humelele nchumu wo chavisa ni lowu tsemaka nhlana:
31 Vaprofeta va profeta mavunwa,+Vaprista va tirhisa matimba lawa va nyikiweke wona leswaku va lawula vanhu van’wana.
Naswona vanhu va mina va rhandza sweswo.+
Kambe mi ta endla yini loko makumu ma fika?”
Tinhlamuselo ta le hansi
^ Hi Xiheveru, “a va tsananga.”
^ Kumbexana “A nga hanyi.”
^ Hi Xiheveru, “n’wina swiphukuphuku leswi nga riki na mbilu.”
