Vanhu vo tala a va ha ri na xona xichavo. Vavabyi lava nga riki na mahanyelo va holovisa madokodela, lava va dyaka etirhesiturente a va va xiximi vatirhi va kwalaho, vakhandziyi lava nga lawulekiki va lwisana ni vatirhi va le ka swihahampfhuka, vana lava nga yingisiki va hlekula vadyondzisi, va va chavisa ni ku va hlasela, van’watipolitiki van’wana va katseka eka vukungundzwana kasi van’wana va ringeta ku kombisa leswaku va na xona xichavo.

 Bibele yi ni nkongomiso lowunene lowu nga hi pfunaka leswaku hi va ni xichavo. Nakambe yi hlamusela leswaku hikwalahokayini vanhu va nga ri na xichavo.

 Ku hohloka ka mahanyelo lamanene lama katsaka xichavo, swi vonaka emisaveni hinkwayo.

•   Hi ku ya hi ndzavisiso wa sweswinyana wa le Amerika, ku kumiwe leswaku nhlayo ya vanhu lava nga ni mahanyelo lamanene eUnited States yi ye ehansi loko yi pimanisiwa ni ya malembe ya 22 lama hundzeke.

•   Eka ndzavisiso wun’wana lowu endliweke hi vanhu vo tlula 32 000 ematikweni ya 28, vanhu lava ringanaka 65 wa tiphesente va vule leswaku ku pfumaleka ka xichavo namuntlha ku nyanye no tlurisa.

 Bibele yi profete ka ha ri emahlweni hi mahanyelo lawa hi ma vonaka namuntlha.

•   “Emasikwini ya makumu ku ta humelela mikarhi yo nonon’hwa. Vanhu va ta va lava tikurisaka, lava nga yingisiki vatswari, va nga tivi ku khensa, . . .  lava nga tiviki musa [ni] vakarihi.”—2 Timotiya 3:1-3, Bibele Ya Mahungu Lamanene.

 Leswaku u kuma vuxokoxoko lebyi engetelekeke bya ndlela leyi vuprofeta lebyi byi hetisekeke hayona, hlaya nhlokomhaka leyi nge “Xana Bibele Yi Profetile Hi Ndlela Leyi Vanhu Va Ehleketaka Ni Ku Hanya Hayona Namuntlha?”

 Emisaveni leyi, leyi pfumalaka xichavo, vanhu va timiliyoni va kume leswaku Bibele yi ni nkongomiso lowunene lowu va pfunaka leswaku va va ni mahanyelo lamanene. Nkongomiso wa yona wa mahanyelo wu ‘ta tshama wu tshembekile, sweswi ni hilaha ku nga heriki.’ (Pisalema 111:8) Xiya swikombiso swi nga ri swingani leswi landzelaka:

•   Leswi Bibele yi swi vulaka: “Swilo hinkwaswo . . . leswi mi lavaka van’wana va mi endlela swona na n’wina mi fanele mi va endlela swona.”—Matewu 7:12.

   Nhlamuselo: Hi fanele hi khoma van’wana hi musa ni hi xichavo, hilaha na hina hi lavaka hakona.

•   Leswi Bibele yi swi vulaka: “Leswi se mi cukumeteke mavunwa, un’wana ni un’wana wa n’wina a a vulavule ntiyiso eka munhukulobye.”—Vaefesa 4:25.

   Nhlamuselo: Hi fanele hi tshembeka eka hinkwaswo leswi hi swi vulaka ni ku swi endla.

 Leswaku u kuma vuxokoxoko lebyi engetelekeke hi nhlokomhaka leyi, hi kombela u hlaya:

•   Xihondzo Xo Rindza lexi nga ni nhlokomhaka leyi nge, “Leswinene Ni Leswi Hoxeke—Nkongomiso Lowu U Nga Wu Tshembaka.”

•   Nhlokomhaka leyi nge, “Tolerance—How the Bible Can Help.”