Hi July 2022, ku vikiwe maxelo lama hisaka swinene emisaveni hinkwayo:

•   “Se i ra vumbirhi n’wheti leyi eChina va ri karhi va lemukisiwa leswaku emadorobeni ya kwalomu ka 70 ku ta va ni maxelo lama hisaka swinene.”—July 25, 2022, CNN Wire Service..

•   “Hikwalaho ka leswi ku nga ni maxelo lama hisaka swinene eYuropa, swi endla leswaku ematikweni yo tala ku va na ritshwa enhoveni.”—July 17, 2022, The Guardian.

•   “Hi Sonto, dyambu a ri vavula swinene emadorobeni ya le United States hikwalaho ka leswi maxelo lama hisaka swinene ma hlaseleke tindhawu ta le Vuxeni ni tindhawu tin’wana ta le Vupeladyambu ni le Midwest.”—July 24, 2022, phephahungu ra The New York Times.

 Xana sweswo hinkwaswo swi vula yini? Xana misava ku ta hetelela ku va ndhawu leyi swi nga ha kotekiki ku hanya eka yona? Xana Bibele yi ri yini hi mhaka leyi?

 Ina. Maxelo lama hisaka swinene emisaveni hinkwayo ma hetisisa vuprofeta bya le Bibeleni lebyi hetisekaka emikarhini ya hina. Hi xikombiso, Yesu u profete leswaku hi ta vona “swilo leswi nga ta [hi] chavisa.” (Luka 21:11) Ku tlakuka ka maxelo lama hisaka swinene emisaveni hinkwayo, swi endla vo tala va chava leswaku swiendlo swa vanhu swi ta endla leswaku emisaveni leyi swi nga ha koteki ku hanya eka yona.

 Doo! Xikwembu xi tumbuluxe misava leswaku yi va kaya ra vanhu ra hilaha ku nga heriki. (Pisalema 115:16; Eklesiasta 1:4) Ku ri na ku va xi pfumelela vanhu va onha misava, xi ta “lovisa lava onhaka misava,” hilaha xi tshembiseke hakona.—Nhlavutelo 11:18.

 Kambisisa vuprofeta byimbirhi lebyi kombisaka swin’wana leswi Xikwembu xi hi tshembiseke swona.

•   “Mananga ni ndhawu leyi nga riki na mati swi ta tsaka, ni ndhawu leyi nga mananga yi ta tsaka, yi rhumbuka kukota safroni.” (Esaya 35:1) Xikwembu a xi nge pfumeli leswaku misava leyi ku va ndhawu leyi swi nga kotekiki ku hanya eka yona, kambe xi ta lunghisa hinkwako laha yi onhiweke kona.

•   “U hlayisa misava, u endla leswaku yi nona yi tlhela yi va ni swakudya swo tala.” (Pisalema 65:9) Xikwembu xi ta hi katekisa hi ku endla misava yi va Paradeyisi.

 Leswaku u dyondza swo tala mayelana ni ndlela leyi ku cinca ka maxelo swi hetisisaka vuprofeta bya le Bibeleni hayona, hlaya nhloko mhaka leyi nge, “Xana Bibele Yi Ri Yini Hi Vumundzuku Bya Hina Ni Ku Cinca Ka Maxelo?”

 Leswaku u dyondza swo tala mayelana ni xitshembiso xa le Bibeleni xa ku vuyeteriwa ka Misava, hlaya nhlokomhaka leyi nge, “Who Will Save the Earth?”