Dyondzo 69

Xinhwanyatana Xi Pfuna Nhenha

XANA wa swi tiva leswaku xinhwanyatana lexi xi ri yini? A xi byela wansati loyi hi ta Elixa muprofeta wa Yehovha, ni hi ta swilo swo hlamarisa leswi Yehovha a n’wi pfuneke ku swi endla. Wansati loyi a a nga n’wi tivi Yehovha hikuva a hi Muisrayele. A hi voneni leswaku ha yini xinhwanyatana lexi xi ri endlwini ya wansati loyi.

Wansati loyi a a ri Musiriya. Nuna wa yena i Namani, ndhuna ya vuthu ra Siriya. Vasiriya a va tise xinhwanyatana lexi xa Muisrayele evuhlongeni leswaku xi ta va nandza wa nkata Namani.

Namani a a ri ni vuvabyi byo chavisa bya nhlokonho. Vuvabyi lebyi byi nga ha endla leswaku nyama ya munhu yi wa. Kutani xinhwanyatana lexi xi byele nkata Namani xi ku: ‘Ndzi navela onge hosi yanga yi nga ya eka muprofeta wa Yehovha eIsrayele. A a ta yi hanyisa eka nhlokonho yakwe.’ Endzhakunyana hiloko va byela nuna wa wansati loyi.

Namani a a swi lava hi mbilu yakwe hinkwayo ku hanyisiwa; kutani u ye eIsrayele. Loko a fika kwalaho, u ye endlwini ya Elixa. Elixa u rhume nandza wakwe ku byela Namani leswaku a ya hlamba eNambyeni wa Yordani ka nkombo. Sweswo swi hlundzukise Namani swinene kutani a ku: ‘Milambu ya laha ndzi humaka kona yi yi tlula ekule milambu hinkwayo ya le Israyele!’ Endzhaku ko vula sweswo, Namani u suke a famba.

Kambe un’wana wa malandza ya yena u n’wi byele a ku: ‘Nkulukumba, loko Elixa a a ku byele ku endla nchumu wo nonon’hwa, a wu ta wu endla. Kutani, ha yini u nga hlambi hilaha a vuleke hakona?’ Namani u yingise nandza wakwe kutani a ya hlamba eNambyeni wa Yordani ka nkombo. Loko a hlamba, nyama yakwe yi tlhele yi tiya naswona a hola!

Namani u tsake ngopfu. U tlhelele eka Elixa, a ku eka yena: ‘Sweswi ndza swi tiva leswaku Xikwembu lexi nga eIsrayele hi xona Xikwembu xa ntiyiso emisaveni hinkwayo. Xisweswo, ndzi kombela u teka nyiko leyi.’ Kambe Elixa u hlamule a ku: ‘E-e, a ndzi nge yi teki.’ Elixa u swi vonile leswaku a swi ta va swi hoxile ku teka nyiko ya kona, hikuva i Yehovha a hanyiseke Namani. Kambe Gehazi nandza wa Elixa a a tilavela nyiko yoleyo.

Kutani Gehazi u endle leswi. Endzhaku ka loko Namani a fambile, Gehazi u tsutsumile a n’wi landza. Gehazi u fike a ku: ‘Elixa u te ndzi ta ku byela leswaku u kombela tin’wana ta tinyiko teto leswaku a ta ti nyika vanghana lava n’wi endzeleke.’ Lawa a ku ri mavunwa. Kambe Namani a a nga swi tivi leswaku wo hemba; kutani u nyike Gehazi tin’wana ta tinyiko teto.

Loko Gehazi a fika ekaya, Elixa u swi tivile leswi a swi endleke. Yehovha u n’wi byerile. Kutani u te: ‘Leswi u endleke swilo leswi swo biha, nhlokonho ya Namani yi ta ta eka wena.’ Xikan’we-kan’we, hiloko yi n’wi khoma!

Xana hi dyondza yini eka leswi? Xo sungula, hi fanele ku fana ni xinhwanyatana lexiya hi byela vanhu hi Yehovha. Hi nga vuyeriwa. Xa vumbirhi, a hi fanelanga hi tikurisa hilaha Namani a tikuriseke hakona eku sunguleni, kambe hi fanele ku yingisa malandza ya Xikwembu. Xa vunharhu, a hi fanelanga hi hemba ku fana na Gehazi. Xana a hi nge dyondzi swo tala hi ku hlaya Bibele?

2 Tihosi 5:1-27.