Yakobe U Ya eHarani
Dyondzo 18
Yakobe U Ya eHarani
XANA wa va tiva vavanuna lava Yakobe a vulavulaka na vona? Endzhaku ko famba masiku yo tala, Yakobe u hlangane na vona exihlobyeni. A va khathalela tinyimpfu ta vona. Yakobe u va vutisile a ku: ‘Xana mi huma kwihi?’
Va hlamule va ku: ‘Hi huma eHarani.’
Yakobe u vutise a ku: ‘Xana ma n’wi tiva Labani?’
Va hlamule va ku: ‘Ina. Waswivo, hi loyi n’wana wakwe Rahele a taka ni ntlhambi wa tinyimpfu.’ Hi luya Rahele a taka, xana wa n’wi vona?
Loko Yakobe a vona Rahele a ta ni tinyimpfu ta malume wakwe Labani, u ye a ya khunguluxa ribye ri suka exihlobyeni leswaku tinyimpfu ti ta nwa mati. Hiloko Yakobe a tswontswa Rahele kutani a titivisa eka yena. A a tsake ngopfu, kutani u mukile a ya byela tata wakwe Labani.
Labani a a tsake ngopfu ku va Yakobe a ta tshama na yena. Kutani loko Yakobe a kombela ku teka Rahele, Labani u tsakile. Hambiswiritano, u kombele Yakobe leswaku a tirha emasin’wini yakwe ku ringana malembe ya nkombo, a tirhela ku teka Rahele. Leswi a a rhandza Rahele swinene, Yakobe u endle tano. Kambe, xana wa swi tiva leswi humeleleke loko ku fika nkarhi wa leswaku va tekana?
Labani u nyike Yakobe mativula yakwe, ku nga Leya, ematshan’weni yo n’wi nyika Rahele. Loko Yakobe a pfumele ku tlhela a tirhela Labani malembe man’wana ya nkombo, Labani u tlhele a n’wi nyika Rahele leswaku a va nsati wakwe. Eminkarhini yoleyo, Xikwembu a xi va pfumelela vavanuna leswaku va teka vasati vo tala. Kambe sweswi, hilaha Bibele yi kombisaka hakona, wanuna u fanele a va ni nsati un’we.
