Xiphemu 7

Ku Suka Eku Pfuxiweni Ka Yesu Ku Ya Eku Khotsiweni Ka Pawulo

Yesu u pfuxiwe hi siku ra vunharhu endzhaku ka ku fa kakwe. Hi siku rero u humelele eka valandzeri vakwe ka ntlhanu. Yesu u hambete a humelela eka vona ku ringana masiku ya 40. Kutani, Yesu u tlhandlukele etilweni van’wana va vadyondzisiwa vakwe va n’wi langutile. Endzhaku ka masiku ya khume, Xikwembu xi chululele moya lowo kwetsima eka valandzeri va Yesu lava a va rindzile le Yerusalema.

Endzhakunyana, valala va Xikwembu va pfalele vaapostola ekhotsweni, kambe ntsumi yi va ntshunxile. Vakaneti va dlaye mudyondzisiwa Stefano hi ku n’wi khandla hi maribye. Kambe hi dyondza hi ndlela leyi Yesu a hlawuleke un’wana wa vakaneti volavo leswaku a va nandza wa yena wo hlawuleka, naswona u ve muapostola Pawulo. Kutani, endzhaku ka malembe manharhu ni hafu Yesu a file, Xikwembu xi rhume muapostola Petro leswaku a ya dyondzisa Korneliyo loyi a a nga ri Muyuda swin’we ni ndyangu wakwe.

Endzhaku ka malembe ya kwalomu ka 13, Pawulo u sungule riendzo ra yena ro sungula ra ku chumayela. Eriendzweni ra yena ra vumbirhi, Timotiya u fambe na Pawulo. Hi dyondza hi ta ndlela leyi Pawulo swin’we ni lava a a famba na vona va veke ni nkarhi wo tsakisa ha yona eku tirheleni Xikwembu. Eku heteleleni, Pawulo u pfaleriwe ekhotsweni le Rhoma. Endzhaku ka malembe mambirhi u ntshunxiwile, kambe u tlhele a khotsiwa a tlhela a dlayiwa. Swiendlakalo swa XIPHEMU 7 swi humelele hi nkarhi lowu nga endlaka malembe ya kwalomu ka 32.