Freda, loyi a nga twiki, a a tsake swinene loko a twa leswaku yena ni makwerhu wa xisati loyi a n’wi dyondzelaka Bibele a va ta joyina vandlha ro sungula leri tirhisaka ririmi ra mavoko le Papua New Guinea. Vandlha rero ri simekiwe hi March 1, 2013. Freda u xiye leswaku loko a ri eminhlanganweni a ya a swi twisisa swinene loko a veka minkandziyiso yakwe etlhelo kutani a languta makwerhu loko a ri karhi a vulavula hi ku tirhisa ririmi ra mavoko ni ku hlalela eka xikirini  lexi nga exitejini. U hlamarile loko a xiya leswaku a nga ha chavi ku hoxa xandla kutani u sungule ku hlamula ko hlayanyana loko a ri eminhlanganweni. Hi April 2013, u fanelekele ku va muhuweleri loyi a nga khuvuriwangiki naswona loko a khutaza vanhu van’wana lava nga twiki leswaku va ta eminhlanganweni va ta. Loko a vutisiwa leswaku ha yini minkarhi yo tala a xiririka mihloti loko a ri eminhlanganweni, u hlamule a ku: “Hikuva sweswi ndza swi twisisa.”

Loko a ri karhi a ya eka ntlawa lowu a tirhaka na wona nsimu le Australia, Barbara u yimise movha wakwe ku vona loko a tekile buku yakwe yo tsalela xiviko xa maendzo yo vuyela. Hi xitshuketa nyangwa wa movha wu pfulekile ivi ku nghena wansati un’wana endzeni.

Barbara u te: “Ndzi khomele ndzi anakanya leswaku u nghene emovheni lowu nga riki wona.”

Wansati u hlamule a ku: “Ndzi kombela u ndzi rivalela. A ndzi ehleketa leswaku ku nga va ku ri wena wansati loyi a faneleke a ndzi landza.” Loko a vona timagazini leti Barbara a ri na tona ta Xihondzo xo Rindza ni Xalamuka!, wansati yoloye u te: “Eka malembe lama hundzeke a ndzi tala ku kuma timagazini eka vavasati vambirhi lava a va ndzi dyondzisa Bibele.” Barbara u nyike wansati yoloye timagazini a tsakile naswona endzhakunyana u sungule ku dyondza Bibele na yena.

Violet, i makwerhu wa xisati loyi a vabyaka loyi a nga ni malembe ya 82 loyi a tshamaka eChristchurch, le New Zealand. Nkarhi na nkarhi u rhumela mapapila ni minkandziyiso leyi sekeriweke eBibeleni ekaya ra vadyuhari ni le  swibedlhele swa laha a tshamaka kona. Vaongori lava tirhaka ekaya rero ra vadyuhari lava fambisaka mapapila va vula leswaku vadyuhari va kwalaho va va va ma rindzele hi mahlo-ngati mapapila lawa va vulaka leswaku ma huma eka Xikwembu. Van’wana va hlaya ni ku tlhela va cincana mapapila ni minkandziyiso ya vona ni van’wana kumbe va hlayela lava nga voniki. Nakambe vaongori lava tirhaka ekaya ra vadyuhari va vula leswaku vadyuhari lava hlayaka mapapila ni minkandziyiso leyi va rhule swinene ku tlula lava nga hlayiki. Malunghana ni matshalatshala yakwe yo chumayela, Violet u ri: “Ndza swi vona leswaku Yehovha u hambeta a ndzi  tirhisa leswaku ndzi pfuna van’wana. Hakunene ku chumayela van’wana ntiyiso swa khutaza.”

“Se ndzi yi hlayile.” Nhlamulo leyi, leyi a nga yi langutelanga yi hlamarise Bernie hi Mugqivela wun’wana nimixo loko a ri karhi a fambisa kopi ya sweswinyana ya Xihondzo xo Rindza exihlaleni xa le Saipan. U hlamarile loko Bernadette, loyi a nga xichudeni xa le kholichi loyi a pfuleke nyangwa, a n’wi byela leswaku se u yi hlayile magazini leyi a lava ku n’wi fambisela yona. Bernie u teke bege yakwe kutani a humesa magazini yin’wana. Bernadette u te: “Ndzi yi hlayile na yoleyo.” Leswi a pfilunganyekile, Bernie u n’wi vutise a ku: “Xana u ti hlaye kwihi timagazini leti? Xana u Mbhoni ya Yehovha leyi endzeleke laha?” Bernadette u vule leswaku a hi Mbhoni, kambe timagazini teto u ti hlaye eka Internet. Siku rin’wana loko a ri karhi a lava rungula leri vulavulaka hi swiluva eka Internet, Bernadette u thayipe rito “swiluva” naswona u hlamarisiwe hi rungula leri a ri kumeke leri nge: “Swiluva Swo Xonga Swa Laha Afrika,” ku nga xihloko lexi nga eka Xalamuka! leyi kumekaka eka Web site ya Timbhoni ta Yehovha. Bernadette u byele Bernie leswaku u xi tsakerile xihloko xexo lexi vulavulaka hi swiluva lerova u endle xiboho xo tlhela a nghena eka Web site. Eku sunguleni a a dzike eka rungula leri vulavulaka hi swimilana ni swiharhi kambe hi ku hatlisa u kume rungula leri tsakisaka malunghana ni Bibele. Leswi a voneke leswaku Bernadette wa tsakela, Bernie u kombele ku n’wi fambisela dyondzo ya le kaya ya Bibele ya mahala naswona endzhakunyana u vuye ni buku leyi nge Xana Bibele Yi Dyondzisa Yini Hakunene? Loko Bernie a tlhelela ra vunharhu, yena na Bernadette a va bula hi ndzima yo sungula ya buku leyi. Endzhakunyana ka lembe, hi November 2012 Bernadette u khuvuriwile. U endle nhluvuko hi ku hatlisa lerova vanghana vakwe va kale va vula leswaku “u tsutsumele” entiyisweni. Hakunene Web site yi endle leswaku a va ni masungulo lamanene.