Wansati un’wana wa Musomalia wa le Sweden u rhambiwe ku ya eminhlanganweni eHolweni ya Mfumo, hiloko a endla xiboho xo ya. Swilo a swi fambanga hi ndlela leyi a a anakanya leswaku swi ta famba ha yona. Ku hava ni un’we loyi a n’wi amukeleke; vanhu hinkwavo va lo n’wi xondzolota. U titwe a ri xikangalafula. Munhu un’wana loyi a xiyeke leswaku a titwa a nga ntshunxekanga, u n’wi vutise a ku: “Xana u te endhawini leyi hoxeke?”

 U hlamule a ku: “Ina, ndzi ehleketa tano!” Hiloko a suka a famba. Endzhakunyana ka loko wansati loyi a hlangane ni Timbhoni leti n’wi rhambeke u ti byele leswaku a a hlundzukile naswona a nge he pfuki a yile. Ti ti vutisile leswaku ku nga va ku endleke yini tanihi leswi a ti nga tsundzuki ti n’wi vonile eHolweni ya Mfumo. Endzhaku ka loko ti ye emahlweni ti burisana na yena, hinkwavo va swi xiyile leswaku hi xihoxo a ye ekerekeni!

Timbhoni ti n’wi khutaze ku tlhela a ya eHolweni ya Mfumo. U pfumerile ku ya, kambe u ti byele leswaku a nga ta tshama timinete to tlula khume loko o fika a titwa onge a nga khomekanga kahle. Hambiswiritano, loko a nghena eHolweni ya Mfumo vanhu hinkwavo evandlheni va n’wi  amukerile! U tiphine swinene lerova u ve wo hetelela ku huma eHolweni ya Mfumo endzhaku ka minhlangano. Ku sukela siku rero, u ya eminhlanganweni nkarhi na nkarhi naswona sweswi i muhuweleri loyi a khuvuriweke.

Stergios i jaha leri tshamaka eGreece. Siku rin’wana nimixo loko a ri karhi a vuya entirhweni, u endle xiboho xo famba hi xitarata lexi a a nga tali ku famba ha xona masiku. Stergios u vone nchumu wun’wana ehansi lowu n’wi kokeke mahlo. A ku ri xirhambo xo ya eXitsundzuxweni xa rifu ra Kreste. A xi ri ni xivutiso lexi nge: “Xana u n’wi teka njhani Yesu?” Tanihi leswi a ku ri ni vanhu, Stergios u kanakane ku xi rhwalela. Loko a fika ekaya, u sungule ku anakanyisisa hi xivutiso lexi a xi ri exiphephanini xexo naswona u sungule ku lava ku tiva swo tala.

Stergios a a hlele ku ya nwa kofi ni vanghana van’wana vakwe ndzhenga wolowo. Loko a ri karhi a famba leswaku a ya hlangana na vona, u endle xiboho xa ku va a famba hi xitarata xexo lexi a voneke xirhambo xexo, a ri ni ntshembo wa leswaku u ta xi kuma xa ha ri kona. A xa ha ri kona, kambe leswi a ka ha ri ni vanhu u tlhele a kanakana ku xi rhwalela. Loko a ri karhi a ya ekaya endzhaku ko nwa kofi ni vanghana vakwe, Stergios u nambe a kongoma exitarateni xexo—xirhambo a xa ha ri kona. U xi tekile kutani a xi hlaya. Endzhaku ko xi hlaya, u endle xiboho xo ya eXitsundzuxweni.

Loko Xitsundzuxo xi hela, Stergios u pfumerile leswaku a va ni dyondzo ya le kaya ya Bibele ya mahala. U sungule ku ya eminhlanganweni naswona u endle nhluvuko hi tlhelo ra moya. U khuvuriwe hi siku ra nhlengeletano yo hlawuleka hi March 2013.

Hi January 2010, Finn, makwerhu loyi a tshamaka eCopenhagen, le Denmark, u hume a khome timagazini.  Loko a ri karhi a famba exindledyanini, u vone mukhalabye un’wana loyi a ta a n’wi kongomile. Finn u n’wi nyike nkandziyiso wa December 2009, lowu a wu ri ni swihloko swo hlayanyana leswi a swi vulavula hi Khisimusi. Loko mukhalabye loyi a vulavula, Finn u nambe a tiva rito rakwe. A ku ri muhaxi loyi a dyondzekeke swinene wa le ka nongonoko wa xiya-ni-moya. Hi siku leri landzelaka Finn u yingisele nongonoko wolowo naswona u hlamale swinene loko a twa muhaxi a hlamusela leswaku hi xa tolo xa kona u kume timagazini. U hlaye swiphemu swin’wana swa swihloko sweswo eka xiya-ni-moya. Eka swilo hinkwaswo, u hlaye hi ta “nyeleti” leyi humeleleke loko Yesu a velekiwa. U pfumerile leswaku hakunene a yi rhumeriwe hi Sathana.

Hikwalaho ko tsakisiwa hileswi timagazini leti a ti swi vula, Finn u endle xiboho xo fonela muhaxi eka nongonoko wa xiya-ni-moya. Eka bulo leri va veke na rona, hi ku titsongahata Finn u kombele loko swi ta koteka leswaku a va ni nongonoko eka xiya-ni-moya lowu vulavulaka hi timhaka ta le Bibeleni. Endzhaku ka mavhiki mambirhi u nyikiwe mpfumelelo. Ku landzele minongonoko yo tlula 30 leyi a yi teka tiawara timbirhi, leyi hinkwayo ka yona a yi vulavula hi Timbhoni ta Yehovha ni Bibele. Muhaxi wa nongonoko wolowo na Finn va bule hi tinhloko-mhaka leti va ti hlawuleke naswona va hlamule tinqingho ta madzana to huma eka vayingiseri.

Muyingiseri un’wana u fonele munjhiniyara wa le ka xitichi xa le ka xiya-ni-moya kutani a n’wi nyika tinomboro takwe. A a lava leswaku vamakwerhu va n’wi endzela. Hi ku hatlisa va hlele ku n’wi endzela. Wanuna loyi a hete malembe a ri karhi a twa vanghana ni ndyangu wa ka vona va vulavula ku biha hi Timbhoni ta Yehovha, kambe hikwalaho ka minongonoko leyi ya xiya-ni-moya, xihlawuhlawu lexi a ri na xona eka Timbhoni xi herile. U sungule ku dyondza Bibele naswona hi 2013, wanuna loyi u ye eXitsundzuxweni a  tlhela a ya eka nkulumo yo hlawuleka. U ya eka minhlangano hinkwayo leyi khomiwaka hi Sonto naswona u nyikela tinhlamulo leti twalaka eka dyondzo ya Xihondzo xo Rindza. Vanhu van’wana va le ndhawini yoleyo na vona va tsakela ntiyiso hikwalaho ka leswi va swi tweke eka minongonoko leyi ya xiya-ni-moya.

A ku ri siku ro hetelela ra ntsombano wa muganga le Italy. Loko Lucio a ri karhi a lelana ni van’wana va vanghana vakwe mpatswa wun’wana wu ye laha a va ri kona. Lucio u vutise mpatswa wolowo leswaku wu hlanganyela eka vandlha rihi. Wu te: “A ku na vandlha leri hi hlanganyelaka eka rona.”

Lucio u vutise a ku: “Xana ku na loyi a mi rhambeke?”

Wu hlamule wu ku: “Doo, hi lo ti tela.”

Hi ku hlamala Lucio u vutise a ku: “I yini lexi endleke leswaku mi ta laha?”

Wu te: “Hi kume xirhambo enyangweni wa hina, kutani hi endle xiboho xa leswaku hi ta.”

Loko wu byela Lucio laha wu tshamaka kona, nsati wakwe Ester u huwelele a ku: “Hi mina ndzi siyeke xirhambo xexo! A ku ri siku ro hetelela ra tsima kutani ndzi vone leswaku ematshan’weni yo lahla swirhambo leswi nga tirhangiki, swa antswa ndzi swi siya eminyangweni leyi ku nga riki na munhu.” Hikwalaho ka leswi wu kumeke xirhambo xexo, mpatswa lowu wu endle xiboho xo ya eHolweni ya Tinhlengeletano leswaku wu ta yingisela nongonoko eka Sonto leyi landzelaka. Endzhaku ko bulanyana na wona, Lucio na Ester va rhambe mpatswa wolowo ekaya ra vona leswaku wu ya dya swakudya na vona, kutani va ye emahlweni ni bulo ra vona. Mpatswa lowu a wa ha ku sungula ku tsakela wu pfumele ku dyondzeriwa Bibele. Minkarhi hinkwayo wu va wu yi lunghiselele kahle dyondzo ya wona naswona sweswi wu va kona eminhlanganweni wu tlhela wu hlamula.