Yesu u te: “Mahungu lamanene lawa ya Mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Mat. 24:14) Hakunene Web site ya jw.org yi tikombisa yi ri xitirhisiwa lexinene eku fikeleleni ka ‘matiko hinkwawo’ eka xinkarhana lexi saleke emahlweni ko va makumu ma fika.

Mpatswa wa varhumiwa wa le Swihlaleni swa Solomon a wu ri karhi wu chumayela eribuweni ra lwandle laha vanhu va ximutana xexo va tihanyisaka hi ku phasa tinhlampfi loko wu hlangana ni vavanuna va mune lava dyuhaleke. Wu xiye leswaku vavanuna volavo a va ri ni tiselfoni, kutani wu va vutise loko va swi kota ku tirhisa Internet. Va vule leswaku va swi kota. Kutani mpatswa wolowo wu va kombe ndlela yo nghena eka jw.org, ndlela yo kuma ririmi ra vona, ndlela yo kopa timagazini na Bibele ni ndlela yo tirhisa xiyenge lexi nge mindyangu  ni lexi nge vana. Loko varhumiwa lava va ya ensin’wini, va tiphina hi ku komba vana vhidiyo leyi nge Khongela Nkarhi Wun’wana Ni Wun’wana. Endzhaku ka loko ntlawa wun’wana wa vana lava tsakeke wu hlalele vhidiyo leyi, wu tsutsumele ekhwatini leri tlhumeke wu ri karhi wu yimbelela wu ku, “Ndzi nga khongela nkarhi wun’wana ni wun’wana . . . ”

Tindzimana leti landzelaka ti huma eka mapapila ma nga ri mangani eka yo tala lama kombisaka ku tlangela lama amukeriweke entsindza wa hina wa misava hinkwayo eNew York:

“Mina ni nuna wa mina hi rhurhele eMexico naswona hi le ku dyondzeni ka Xipaniya leswaku hi ta kota ku chumayela munhu un’wana ni un’wana loyi hi hlanganaka na yena. Nkarhi na nkarhi loko ndzi nghena eka jw.org, ndzi nkhensa Yehovha hikuva yi ndzi pfune leswaku ndzi yingisa ni ku tlhela ndzi dyondza. Ku kumeka swilo swo tala—timagazini, tibuku, vuyimbeleri ni tidrama—hi tindzimi to tala. Ndza mi nkhensa hikwalaho ka matshalatshala ya n’wina hinkwawo lawa mi ma endlaka naswona ndza mi rhandza.”—D.H., Mexico.

“A ndzi voni kahle kutani ndzi yi rhandza swinene Web site ya n’wina hikuva ku ni swilo swo tala leswi rhekhodiweke leswi ndzi nga swi yingiselaka. Ndzi mi tsalela ku mi khutaza leswaku mi hambeta mi hoxa tibuku ta n’wina leti engetelekeke, tibroxara ni swilo swin’wana leswi kandziyisiweke hi xivumbeko xa MP3 (tifayili leti ngo yingiseriwa kunene) hikuva ndzi ti yingisela dyambu hinkwaro.”—K.G., United States.

“Ndza yi rhandza jw.org! Ya olova ku yi tirhisa naswona yi ndzi khutaze leswaku ndzi yi hisekela swinene dyondzo ya munhu hi yexe ni nsimu. Ndzi ni malembe ya 72 naswona ndzi ni malembe ya 47 ndzi khuvurile laha ndzi heteke malembe yo tlula 30 ndzi ri karhi ndzi phayona. Ndzi ni vana va kaye lava khuvuriweke naswona ndzi ni vatukulu va 16 ni vatukulu-xinguwe vanharhu. Sweswi ndyangu wa ka hina wu ni  switukulwana swa mune leswi nga maphayona ya nkarhi hinkwawo. Ndzi nkhensa Yehovha hikwalaho ka swakudya leswi swa moya leswi fikeke hi nkarhi lowu faneleke.”—M.T., United States.

“Loko ndzi tsala papila leri a ku ri 4:00 nimixo. Hakanyingi ndzi heta tiawara to tala ndzi nga si etlela hikuva ndzi karhatiwa hi vuvabyi bya multiple sclerosis ni switlhavi swin’wana, hilaha byi karhataka vamakwerhu vo tala lava rhandzekaka emisaveni hinkwayo. Yehovha u hambeta a hi khathalela hi tlhelo ra moya kutani hi yona mhaka ndzi lavaka ku mi nkhensa. Ndzi tala ku ehleketa hi swifaniso, hi xona xivangelo lexi endlaka leswaku ndlela leyi Web site leyi, yi endliweke ha yona yi va leyinene eka mina. Tigirafu, tivhidiyo to koma ni swifaniso hinkwaswo ka swona swi ni tinhlamuselo leti twisisekaka swinene.”—B.B., New Zealand.

“Ndzi mi tsalela hikwalaho ka leswi ndzi lavaka ku mi nkhensa. Ndzi dokodela eximutanini lexi nga exiphen’wini lexi nga ekule eSri Lanka, laha ndzi nga swi kotiki ku kuma timagazini hi ririmi ra mina. Ndza yi nkhensa Web site ya n’wina, ndzi kota ku kopa ni ku ti hlaya hi ririmi ra mina. Web site ya n’wina  i yin’wana ya tinyiko letinene leti Yehovha a ti nyikeke vanhu vo fana na mina.”—N.F., Sri Lanka.

“Ndzi mi tsalela papila leri leswaku ndzi nkhensa hikwalaho ka leswi mi tikarhatelaka ku pfuna vanhu leswaku va dyondza hi Yehovha. Ndzi kombela leswaku mi hambeta mi nghenisa tivhidiyo eka jw.org. Tivhidiyo teto ti pfune mina ni ndyangu wa ka hina ku langutana ni swiphiqo. Vhidiyo leyi ndzi pfuneke swinene hi leyi nge Hlula Munhu Wa Tinyimpi U Nga Kalanga U Lwa Na Yena. Nakambe, ndzi nkhensa ku tikarhata ka n’wina.”—Y.S., loyi a nga ni malembe ya kaye, wa le United States.

“Ndzi lava ku mi nkhensa swin’we na Yehovha hikwalaho ka swakudya swa moya leswi hi nga na swona. Web site ya jw.org yi ndzi pfunile swinene, ngopfu-ngopfu xiyenge lexi nge ‘Vantshwa.’ Nakambe ndza yi tlangela nhloko-mhaka ya ntlhandlamano leyi nge Vana Munghana Wa Yehovha. Ndzi ni tindzisana tinharhu leta ha riki titsongo ta vanhwanyana naswona ndzi vona leswaku rungula leri ri va pfunile. Hambileswi ndzi nga ekule na n’wina, hi vamakwerhu lava nga ni vun’we hikwalaho ka rirhandzu leri hi nga na rona eka Yehovha. Ndza mi nkhensa.”—A.B., Peru.