Eka malembe yo tala ya ku yirisiwa ka ntirho wo chumayela, vamakwerhu eIndonesia va landzele ndzayo ya Yesu hi vutlhari leyi nge, “vanani ni vuxiyaxiya kukota tinyoka naswona mi kala nandzu kukota matuva.” (Mat. 10:16) Kambe loko ku yirisiwa ka ntirho wo chumayela ku herisiwile, vo tala va boheke ku dyondza ku chumayela “hi vurhena.”​—Mint. 4:31.

Hi xikombiso, vamakwerhu van’wana a va kanakana loko va fanele va chumayela hi yindlu ni yindlu kutani a va endla maendzo yo vuyela ni tidyondzo ta Bibele ntsena. Van’wana a va nga swi lavi ku chumayela Mamoslem. Vo tala a va tivitana Vakreste ematshan’weni ya Timbhoni ta Yehovha naswona a va tirhisa vuhundzuluxeri bya Bibele bya Vujagana ematshan’weni yo tirhisa Vuhundzuluxeri Bya Misava Leyintshwa bya Xiindonesia. * Van’wana a va nga yimi na yona mhaka ya ku fambisa minkandziyiso leyi sekeriweke eBibeleni mahala.

Yin’wana ya mikhuva leyi a yi hambeta yi endliwa hi nkarhi wa ku yirisiwa ka ntirho. Van’wana a va namarhela mindhavuko leyi endleke leswaku va landzula ripfumelo ra vona hikwalaho ka leswi a va nga wu landzeleli nkongomiso wa Matsalwa. Xana vamakwerhu lava a va ta pfuniwa njhani?

Yehovha u va nyike ndzayo leyi pfunaka leyi humaka eka vamakwerhu lava wupfeke. (Efe. 4:11, 12) Hi xikombiso, hi 2010, Stephen Lett xirho xa Huvo leyi Fumaka u khutaze vamakwerhu leswaku va vangamisa vito ra Xikwembu hi ku tirhisa Vuhundzuluxeri Bya Misava Leyintshwa ensin’wini. Misja Beerens loyi a nga murhumiwa u ri: “Nkulumo ya Makwerhu Lett yi va khumbe swinene vahuweleri vo tala. Va vone nkoka wo va Timbhoni ta Yehovha ni ku yimelela Rito ra Xikwembu.”

Tanihi leswi Mamoslem ya le Indonesia a ma ehleketa  leswaku Timbhoni ta Yehovha i vukhongeri bya Vujagana, Vutirheli Bya Mfumo bya Xiindonesia byi nyikele nkongomiso lowu landzelaka: “Ku vula erivaleni leswaku u Mbhoni ya Yehovha loko u sungula bulo hakanyingi i mhaka ya nkoka swinene. . . . Ha tinyungubyisa hileswi hi yimelaka Yehovha ni ku endla leswaku vito rakwe ni swikongomelo swakwe swi tiviwa ensin’wini ya hina!” Shinsuke Kawamoto loyi a tirhaka erhavini ra le Indonesia u ri: “Ku tirhisa ndlela leyi, leyi kongomeke hi vutlhari swi endla leswaku ku va ni vuyelo lebyinene. Mamoslem yo tala ma tivutisa swivutiso swo tala hi Timbhoni ta Yehovha. Ma lava ku tiva leswaku i yini lexi endlaka hi hambana ni vanhu van’wana. Sweswo swi endla leswaku hi kuma nkarhi wo ma chumayela.”

Nakambe vahuweleri va khutaziwe ku antswisa ndlela leyi va xi fambisaka ha yona Xihondzo xo Rindza swin’we ni Xalamuka! Lothar Mihank, muhlanganisi wa Komiti ya Rhavi wa hlamusela: “Leswaku vanhu va hi tiva, va fanele va hlaya timagazini ta hina. Swa olova ku ti fambisa naswona swi endla leswaku vanhu va amukela ntiyiso. Loko hi ti fambisa etindhawini hinkwato, hi nyika vanhu lunghelo ro dyondza hi Yehovha.”

Hi 2013, rhavi ra le Indonesia ri sungule tindlela timbirhi letintshwa to chumayela leti simekiweke hi Huvo leyi Fumaka: Tsima ro chumayela etindhawini ta mani na mani emadorobeni ni le ka tindhawu ta mani na mani leti chumayeriwaka hi vandlha. Tindlela leti to chumayela leti tsakisaka ti pfumelela vanhu vo tala eIndonesia leswaku va va ni lunghelo ro twa mahungu lamanene.

Matafula yo sungula lama tirhisiweke ku fambisa minkandziyiso eka tsima leri ro hlawuleka ro chumayela etindhawini ta mani na mani emadorobeni a ma vekiwe eka molo lowukulu lowu xavisaka swilo swa elektroniki, eWest Jakarta. Kutani mavandlha ya kwalaho ma sungule ku veka swigolonyana swo  chumayela ha swona ni matafula yo fambisa minkandziyiso etindhawini leti ma tirhelaka eka tona nsimu. Ku nga si hela lembe, matafula yo tlula 400 yo fambisa minkandziyiso ni swigolonyana swo chumayela ha swona a swi tirhisiwa emadorobeni lamakulu eIndonesia. Ku ve ni vuyelo byihi?

Yusak Uniplaita, nkulu wa le Jakarta, wa vika: “Loko hi nga si sungula ku chumayela endhawini ya mani na mani, vandlha ra hina a ri oda timagazini ta 1 200 hi n’hweti. Endzhaku ka tin’hweti ta tsevu, a hi oda timagazini ta 6 000 hi n’hweti. Sweswi hi oda timagazini ta 8 000 hi n’hweti. Hi tlhela hi fambisa tibuku ni tibroxara to tala.” EMedan, le North Sumatra, ntlawa lowutsongo wa maphayona wu veke swigolonyana swo chumayela ha swona etindhawini tinharhu. Eka n’hweti yo sungula, ma fambise tibuku ta 115 ni timagazini to ringana 1 800. Endzhakunyana ka tin’hweti timbirhi, maphayona ya kwalomu ka 60 lama humaka etindhawini ta nkombo ma fambise tibuku ta kwalomu ka 1 200 swin’we ni timagazini ta 12 400. Jesse Clark loyi a nga murhumiwa, u ri: “Tindlela leti, letintshwa to chumayela ti tsakisa vamakwerhu naswona leswi swi kombisa leswaku vanhu va le Indonesia va tsakela swilo swa moya. Tsima ro chumayela etindhawini ta mani na mani ri ta tshama hi masiku!”

Tiko ra Indonesia i rin’wana ra tindhawu leti nga ni tindzimi to tala swinene emisaveni. * Tanihi leswi vanhu vo tala va vulavulaka Xiindonesia, ku nga ririmi leri tolovelekeke, vo tala va tlhela va vulavula tindzimi tin’wana ta kwalaho, tindzimi leti va ti twisisaka.

Hi 2012, rhavi ri teke xiboho xo khathalela swilaveko swa ndhawu leyi, leyikulu. Tom Van Leemputten u ri: “Hi sungule ku hundzuluxela minkandziyiso hi tindzimi ta 12 leti vulavuriwaka hi vanhu va kwalomu ka timiliyoni ta 120. Loko vahundzuluxeri va Xijava va vona xiphephana xo sungula xa Xijava,  a va nga ha tikoti hi ku tsaka. Eku heteleleni, a va kuma swakudya swa moya hi ririmi ra manana!”

Mavandlha yo tala, ma ye emahlweni ma khoma minhlangano hi Xiindonesia, hambi ku ri etindhawini leti vanhu vo tala a va vulavula ririmi rin’wana. Lothar Mihank u ri: “Hi 2013 mina ni nsati wa mina, Carmen hi ye eka nhlengeletano ya masiku mambirhi eXihlaleni xa le Nias eNorth Sumatra. Vo tala va vanhu lava a va ri kona va 400 a va vulavula ririmi ra Xinias, kambe tinkulumo hinkwato a ti nyikeriwa hi Xiindonesia. Endzhaku ko vulavula ni swivulavuri, hi byele vayingiseri leswaku nongonoko wa siku leri landzelaka wu ta va hi Xinias. Hi siku leri landzelaka, vanhu vo tlula 600 a va hlengeletane eholweni leyi nga yitsongo.” Carmen u tlhele a ku: “A swi ri erivaleni leswaku lava a va ri kona a va rhiye ndleve eka nongonoko lowu khomiweke hi Xinias ku tlula siku leri hundzeke loko ku nyikeriwa tinkulumo hi Xiindonesia. A va  tsakile swinene loko va twa ni ku tlhela va twisisa rungula ra Bibele hi ririmi ra manana.”

Hambi vanhu lava feke tindleve eIndonesia sweswi va twa ntiyiso hi ririmi ra vona. Ku sukela hi 2010, ntlawa wa vahundzuluxeri lava hundzuluxelaka Ririmi ra Mavoko ra le Indonesia wu hundzuluxele tibroxara ta nkombo ni swiphephana swa nhungu hi Ririmi ra Mavoko ra le Indonesia. Ku engetela kwalaho, rhavi ri pfune titlilasi ta 24 ta ririmi ra mavoko leswaku ti letela vanhu vo tlula 750 lava vulavulaka ririmi ra mavoko. Namuntlha, mavandlha ya 23 ya ririmi ra mavoko ni mintlawa yi nyika mpfuno hi tlhelo ra moya ni nchavelelo eka kwalomu ka timiliyoni tinharhu ta vanhu lava feke tindleve eIndonesia.

Sweswi, Ndzawulo ya Vuhundzuluxeri yi ni mintlawa ya vahundzuluxeri ya 37. Ku ni vahundzuluxeri va 117 ni lava va va pfunetaka va 50 lava tirhaka etindhawini ta 19 eIndonesia.