MAKWERHU wa xisati loyi a a ri eka nongonoko wo nyiketeriwa ka rhavi ra le Madagascar lowu a wu khomiwe hi Mugqivela January 24, 2015 u te: “A ndzi tsakile swinene.” Yena swin’we ni vaendzi van’wana va 583 a va tsakile ku vona makamara lamantshwa ya 19, ku katsa ni ndhawu yo dyela leyi ndlandlamuxiweke ni khixi leri pfuxetiweke hi vuntshwa. Ku ndlandlamuxiwe tihofisi ta ndzawulo ya Ntirho, ya Timali swin’we ni yo Pulana ni ku Aka ya le Tikweni. Ku engetela kwalaho, ndzawulo yo Rhekhoda swin’we ni ya Ririmi ra Mavoko ti kume tindhawu letintshwa to rhekhodela eka tona naswona ku sunguriwe Ndzawulo yo Tsala Braille. Endzhaku ko twa matimu ya ntirho wo chumayela wa le Madagascar, vaendzi va tiphine hi nkulumo yo nyiketela leyi nyikeriweke hi Mark Sanderson xirho xa Huvo leyi Fumaka.

Vanhu va Yehovha eJakarta, le Indonesia, a va tsakile loko ndhambi leyi a yi ri edorobeni rero yi phya hi nkarhi wa ku  nyiketeriwa ka miako leyintshwa ya rhavi hi February 14, 2015. Sweswi rhavi ri ni xithezi xin’we xa tihofisi eka muako lowu nga ni swithezi swa 42 swin’we ni swithezi swa 12 leswi nga ekusuhi ni muako wun’wana. Tindzawulo to hlayanyana ta le Bethele ti le kusuhi ni miako yitsongo leyi nga kwalaho. Anthony Morris xirho xa Huvo leyi Fumaka u nyikele nkulumo yo nyiketela naswona hi siku leri landzelaka vanhu va 15 257 a va hlengeletane exitediyamu xa bolo leswaku va rhiya ndleve loko a ri karhi a nyikela nkulumo leyi nga ni nhlokomhaka leyi nge, “Hambeta U Tiyisela Ku Endla Leswi Nga Swinene.” Nongonoko a wu hlaleriwa hi endlelo ra Internet hi vanhu va 11 189 lava humaka etindhawini tin’wana ta 41, leswi endleke leswaku ku va xiendlakalo lexikulu xa vanhu va Yehovha lexi nga si tshamaka xi va kona eIndonesia. Ronald Jacka, un’wana wa varhumiwa vo sungula ku ya eIndonesia u ri: “Loko ndzi fika hi 1951, a ku ri ni vahuweleri va 26 ntsena etikweni hinkwaro. Kambe namuntlha, vanhu vo tlula 26 000 va ve kona eka nongonoko lowu wo hlawuleka. Hakunene Yehovha u katekise vanhu vakwe eIndonesia!”