XANA u tiva munhu wo karhi loyi a vabyaka?— Kumbexana na wena wa vabya minkarhi yin’wana. U nga ha khomiwa hi mukhuhlwana kumbe u lumalumiwa ekhwirini. Vanhu van’wana va vabya swinene. A va swi koti ni ku yima loko va nga pfuniwanga hi munhu un’wana. Hakanyingi leswi swi humelela loko vanhu va dyuhale ngopfu.

Munhu un’wana ni un’wana wa vabya minkarhi yin’wana. Xana wa swi tiva leswaku ha yini vanhu va vabya, va dyuhala va tlhela va fa?— Siku rin’wana loko wanuna loyi a a nga koti ku famba a tisiwa eka Yesu, Yesu u swi kombisile leswaku ha yini vanhu va vabya va tlhela va fa. I nge ndzi ku hlamusela mhaka ya kona.

Yesu a a tshama endlwini leyi nga le dorobeni leri nga ekusuhi ni Lwandle ra Galeliya. Ntshungu wa vanhu wu tile wu ta n’wi vona. Vanhu lava teke a va tele lerova ku pfumaleka ni ndhawu ya leswaku vanhu van’wana va nghena. Van’wana a va ri ekule swinene ni nyangwa. Kambe, vanhu a va ha ta hi vunyingi! Ntlawa wun’wana wu tise wanuna la omeke swirho loyi a a nga swi koti ku famba. A ku laveka vanhu va mune leswaku va n’wi tlakula hi rihlaka.

Xana wa swi tiva leswaku ha yini a va lava ku tisa munhu loyi la vabyaka eka Yesu?— A va tshemba leswaku Yesu a nga n’wi pfuna. A va tiyiseka leswaku Yesu a nga n’wi hanyisa. Xana wa swi tiva leswaku va swi kotise ku yini ku fikisa wanuna yoloye la omeke swirho eka Yesu tanihi leswi yindlu a yi tele hi vanhu?—

Xifaniso lexi u xi vonaka laha xi kombisa ndlela leyi va n’wi ngheniseke ha yona. Xo sungula, va teke wanuna loyi va n’wi veka ehenhla ka lwangu. Lwangu ra kona a ku ri lero andlaleka kunene. Kutani va pfule  mbhovo lowukulu eka rona. Eku heteleleni va nembelete wanuna loyi la vabyaka embhoveni wolowo, hi rihlaka ra yena, va n’wi nghenisa endlwini. Hakunene a va ri ni ripfumelo!

Vanhu hinkwavo lava a va ri endlwini va hlamarile loko va vona leswi a swi humelela. Wanuna la omeke swirho loyi a a ri erihlakeni, u nembeletiwe a vekiwa exikarhi ka vona. Xana Yesu u hlundzukile loko a vona leswi vavanuna lava va swi endleke?— Nikatsongo! A a tsakile ku vona leswaku va ni ripfumelo. U byele wanuna la omeke swirho a ku: “Swidyoho swa wena swi rivaleriwile.”

Vanhu van’wana a va vona onge Yesu a a nga fanelanga a vula sweswo. A va vona onge a nga na yona mfanelo yo rivalela swidyoho. Xisweswo, leswaku a va kombisa leswaku wa swi kota ku  rivalela swidyoho, Yesu u byele wanuna yoloye a ku: “Pfuka, teka rihlaka ra wena, u muka.”

Loko Yesu a heta ku vula sweswo, wanuna loyi u hanyile! Swirho swa yena a swi nga ha omanga. Se a a swi kota ku yima hi yexe a tlhela a famba. Vanhu lava voneke singita leri va hlamarile. Ku sukela va va kona, a va nga si tshama va vona nchumu wo hlamarisa ku fana ni lowu! Va dzunise Yehovha hikwalaho ka leswi a va nyikeke Mudyondzisi loyi Lonkulu, loyi a kotaka ni ku hanyisa vanhu lava vabyaka.—Marka 2:1-12.

I yini lexi hi xi dyondzaka eka singita leri?— Hi dyondza leswaku Yesu u ni matimba yo rivalela swidyoho ni ku hanyisa lava vabyaka. Kambe ku ni nchumu wun’wana wa nkoka lowu hi wu dyondzaka. Hi dyondza leswaku xidyoho hi xona xi endlaka vanhu va vabya.

Leswi hinkwerhu hi vabyaka minkarhi yin’wana, xana leswi swi vula leswaku hinkwerhu hi vadyohi?— Ina, Bibele yi vula leswaku hinkwerhu hi velekiwe hi ri ni xidyoho. Xana wa swi tiva leswaku swi vula yini ku velekiwa u ri ni xidyoho?— Swi vula leswaku hi velekiwa hi nga hetisekanga. Minkarhi yin’wana hi endla swilo leswi hoxeke hambiloko hi nga lavi ku swi endla. Xana wa swi tiva leswaku swi tise ku yini leswaku hinkwerhu hi va ni xidyoho?—

Hi velekeriwe exidyohweni hikuva munhu wo sungula, Adamu, a nga xi yingisanga Xikwembu. U dyohile loko a tlula nawu wa Xikwembu. Kutani hinkwerhu xidyoho hi xi kume eka Adamu. Xana wa swi tiva leswaku xidyoho hi xi kumise ku yini eka yena? I nge ndzi ku hlamusela hi ndlela leyi u nga ta yi twisisa kahle.

 Kumbexana u tshame u pfuna munhu la bakaka xinkwa hi pani. Xana xinkwa xi ta huma xi ri njhani loko pani ri ri ni xikhutu? U nga ku yini?— Ndhawu yoleyo leyi nga ni xikhutu yi ta vonaka eka swinkwa hinkwaswo leswi u nga ta swi baka hi pani rero, a swi tano ke?—

Adamu a a fana ni pani rero naswona hina hi fana ni xinkwa. U ve munhu la nga hetisekangiki loko a tlula nawu wa Xikwembu. A swi fana niloko a ri ni xikhutu. Loko a kuma vana, xana a va ta va njhani?— Vana vakwe hinkwavo a va ta va ni mfungho wolowo wa ku nga hetiseki.

Vana vo tala va velekiwa va ri ni ku nga hetiseki loku u nga taka u nga ku voni. Va velekiwa va ri ni mavoko ni milenge hinkwayo. Kambe ku nga hetiseki loku va nga na kona i ku kulu swinene lerova va vabya kutani hi ku famba ka nkarhi va fa.

Kambe, vanhu van’wana va vabya swinene ku tlula van’wana. Ha yini swi ri tano? Xana va va va velekiwe va ri ni swidyoho swo tala?— Doo, vanhu hinkwavo va velekiwa va ri ni xidyoho hi mpimo lowu ringanaka. Hinkwerhu hi velekiwa hi nga hetisekanga. Kutani, hi ku famba ka nkarhi, hinkwerhu hi ta khomiwa hi mavabyi yo karhi. Hambi ku ri vanhu lava ringetaka ku yingisa milawu ya Xikwembu, va nga swi endli swo biha, va vabya.

Kutani, ha yini vanhu van’wana va tshamela ku vabya ku tlula van’wana?— Swivangelo swa kona swi tele. Va nga ha va va nga ri na swakudya leswi eneleke. Kumbe va nga ha va va dya swakudya leswi nga riki swinene. Va nga ha dya ngopfu makhekhe ni swiwitsi. Xivangelo xin’wana ku nga ha va leswaku va hlwela ku ya eku etleleni, kutani a va kumi nkarhi lowu eneleke wo etlela. Kumbe a va ambali swiambalo leswi kufumelaka loko ku ri ni xirhami. Mimiri ya vanhu van’wana yi tsane ngopfu, a  yi swi koti ku lwisana ni mavabyi hambiloko va ringeta ku tikhathalela.

Xana wu ta va kona nkarhi lowu hi nga taka hi nga ha vabyi? Xana xidyoho xi ta kala xi susiwa?— Xana Yesu u endle yini hi wanuna loyi a omeke swirho?— Yesu u n’wi rivalele swidyoho swakwe kutani a n’wi hanyisa. Hi ku endla leswi, Yesu a a kombisa leswi a nga ta swi endla siku rin’wana eka hinkwavo lava ringetaka ku endla leswi lulameke.

Loko hi kombisa leswaku a hi swi lavi ku dyoha ni leswaku ha swi venga swilo swo biha, Yesu u ta hi hanyisa. Enkarhini lowu taka, u ta susa ku nga hetiseki loku hi nga na kona sweswi. Leswi u ta swi endla loko se a ri Hosi ya Mfumo wa Xikwembu. Xidyoho a xi nge herisiwi hi siku rin’we ntsena. Xi ta susiwa hakatsongo-tsongo. Kutani loko xidyoho xa hina se xi susiwile hi ku helela, a hi nge he pfuki hi vabyile. Hinkwerhu hi ta va ni rihanyo leri hetisekeke. Lowu ku ta va nchumu lowu tsakisaka hakunene!