MUTSWARI un’wana ni un’wana u hoxa xandla eka xiendlakalo lexi ku nga riki na munhu ni un’we la xi twisisaka hilaha ku heleleke. Un’wana ni un’wana eka vona u nyikela hi nchumu wo karhi lowu kulaka endzeni ka manana. Kutani ku vumbeka munhu la hanyaka, la heleleke. Hikwalaho, a swi hlamarisi leswi loko n’wana a velekiwa, vanhu va vulaka leswaku “ku veleka i singita.”

Kambe, ku veleka vana ko va masungulo ya vutihlamuleri bya vatswari. Loko va ha ri tincece va titshega hilaha ku heleleke hi vatswari va vona, kambe loko va ya va kula, va lava nkhathalelo lowu engetelekeke ku tlula ku khathalela swilaveko swa vona swa nyama ntsena. Va lava ku pfuniwa leswaku va kula emianakanyweni, emintlhavekweni, emahanyelweni ni le moyeni.

Ku rhandziwa hi vatswari i nchumu wa nkoka swinene leswaku vana va kula kahle. Hambileswi swi nga swa nkoka ku va mutswari a vula hi nomu leswaku wa va rhandza vana va yena, u fanele a tlhela a kombisa ni hi swiendlo leswaku wa va rhandza. Ina, vana va lava xikombiso lexinene xa vatswari. Va lava ku kongomisiwa emahanyelweni, hi misinya ya milawu leyi va faneleke va hanya ha yona. Naswona va fanele va kuma nkongomiso lowu, ku sukela evuhlangini bya vona. Songa rigogo ra ha tsakama, loko swi nga ri tano ku ta dyiwa mbitsi ku xeviwa hi nhlomulo.

Misinya ya milawu leyinene ngopfu hi leyi kumekaka eBibeleni. A xi kona lexi nga pimanisiwaka ni ndzetelo lowu sekeriweke eBibeleni. Ndzetelo wolowo, wu pfuna vana ku vona leswaku leswi va dyondzisiwaka swona a swi humi eka munhu kambe swi huma eka Muvumbi wa vona, ku nga Tata wa vona la nge matilweni. Sweswo swi endla leswaku ndzayo yoleyo yi va ni ntikelo lowukulu swinene.

Bibele yi khutaza vatswari ku tirha hi matimba leswaku va nghenisa misinya ya milawu leyinene emianakanyweni ya vana va vona. Hambiswiritano, loko vana va ri karhi va kula, hakanyingi vatswari swa va tikela ku vulavula na vona  hi swilo leswi nga swa nkoka swinene. Xikongomelo xa buku leyi nge, Dyondza Eka Mudyondzisi Lonkulu, hi leswaku ku papalatiwa xiyimo xexo. Yi ta pfuna wena ni n’wana wa wena leswaku mi va ni rungula ra swilo swa moya leri mi nga ri hlayaka swin’we. Tlhandlakambirhi, yi fanele yi endla leswaku ku va ni mbulavurisano exikarhi ka vana ni lava va nga ta hlaya na vona buku leyi.

U ta xiya leswaku buku leyi yi lava leswaku vana va vula swo karhi. Rungula ra yona ri tamele swivutiso swo tala leswi faneleke. Laha ku nga ni swivutiso sweswo u ta vona hi xitlhenguso (—). Xi ku tsundzuxa leswaku u koka moya kutani u nyika n’wana nkarhi wo hlamula. Vana va swi rhandza ku katsiwa loko ku vulavuriwa. Loko n’wana a nga katsiwi, u hatla a lan’wa.

Kambe, xa nkoka swinene, swivutiso leswi swi ta ku pfuna ku tiva leswi nga emianakanyweni ya n’wana. I ntiyiso leswaku n’wana a nga ha nyika tinhlamulo leti hoxeke. Kambe rungula leri landzelaka xivutiso xexo ri hleriwe leswaku ri pfuna n’wana a tolovela ndlela leyinene yo hlamula.

Nchumu lowu buku leyi yi hlawulekeke ha wona i swifaniso leswi tlulaka 230. Swo tala swa swona swi ni marito lama tsariweke ehansi ka swona, lama lavaka leswaku n’wana a vula swo karhi hi leswi a swi vonaka ni leswi a swi hlayeke. Kutani bula ni n’wana hi swifaniso sweswo. Swi nga ha va ndlela leyinene yo dyondzisa, leyi nga ta endla leswaku leswi n’wana a dyondzisiwaka swona swi dzika eka yena.

Loko n’wana se a tiva ku hlaya, n’wi khutaze ku hlaya buku hi rito leri twalaka, na wena u yingisile. Loko a ri karhi a yi hlaya, ndzayo ya yona leyinene yi ta ya yi dzika emianakanyweni ni le mbilwini ya yena. Kambe loko u lava leswaku ku tshama ku ri ni vuxaka lebyi tiyeke exikarhi ka wena ni n’wana wa wena naswona a ku xixima, mi fanele mi yi hlaya swin’we buku leyi naswona mi endla tano minkarhi hinkwayo.

Vana va kombiwa swiendlo swa rimbewu leswi nyamisaka, vungoma ni swiendlo swin’wana leswi khomisaka tingana, leswi emalembeni ma nga ri mangani lama hundzeke a ku nga anakanyiwi nikatsongo leswaku swi nga endliwa. Kutani va lava nsirhelelo lowu buku leyi yi wu nyikaka hi ndlela leyi xiximekaka handle ko ba mariri. Kambe, vana va lava ku kongomisiwa hi ku hlawuleka eka Xihlovo xa vutlhari hinkwabyo, ku nga Tata wa hina wa le matilweni, Yehovha Xikwembu. Hi swona leswi minkarhi hinkwayo Yesu, Mudyondzisi Lonkulu a a endla swona. Hi ni ntshembo lowu heleleke wa leswaku buku leyi yi ta pfuna wena ni ndyangu wa wena leswaku mi endla vutomi bya n’wina byi tsakisa Yehovha, naswona mi ta kuma mikateko leyi nga ta tshama hi masiku.