Vunghana byi sekeriwe erirhandzwini. Loko u ya u dyondza hi Yehovha, u ta ya u n’wi rhandzu swinene. Loko rirhandzu ra wena eka Xikwembu ri kula, ku navela ka wena ku xi tirhela na kona ku ta kula. Leswi swi ta ku susumetela ku va mudyondzisiwa wa Yesu Kreste. (Matewu 28:​19) Loko u va xirho xa ndyangu lowu tsakeke wa Timbhoni ta Yehovha, u ta va munghana wa Xikwembu hilaha ku nga heriki. Xana u fanele u endla yini?

U fanele u kombisa ku rhandza ka wena Xikwembu hi ku yingisa milawu ya xona. “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.”​—⁠1 Yohane 5:⁠3.

Tirhisa leswi u swi dyondzaka. Yesu u rungule xitori lexi kombisaka leswi. Wanuna wo tlhariha u ake yindlu ya yena eribyeni. Kasi wanuna wa xiphukuphuku u ake yindlu ya yena esaveni. Loko ku na mpfula leyikulu, yindlu leyi akiweke eribyeni a yi wanga, kambe yindlu leyi akiweke esaveni yi wile. Yesu u vule leswaku lava va yingisaka tidyondzo ta yena naswona va hanya ha tona va fana ni wanuna wo tlhariha la akeke eribyeni. Kambe lava va yingisaka tidyondzo ta yena ivi va nga hanyi ha tona va fana ni wanuna wa xiphukuphuku la akeke esaveni. Xana u lava ku fana ni wanuna wihi?​—⁠Matewu 7:​24-⁠27.

 Ku tinyiketela. Leswi swi vula leswaku u ya eka Yehovha hi xikhongelo ivi u n’wi byela leswaku u lava ku endla ku rhandza ka yena hilaha ku nga heriki. Ku endla ku rhandza ka Xikwembu swi kombisa leswaku u mudyondzisiwa wa Yesu Kreste.​—⁠Matewu 11:⁠29.

Nkhuvulo. “Khuvuriwa u hlantswa swidyoho swa wena swi suka hi ku vitana vito rakwe.”​—⁠Mintirho 22:⁠16.

Tinyiketele swinene eku tirheleni ka Xikwembu. “Xin’wana ni xin’wana lexi mi xi endlaka, xi endleni hi moya-xiviri hinkwawo kukota loko mi xi endlela Yehovha, ku nga ri vanhu.”​—⁠Vakolosa 3:⁠23.