Yehovha a nge va pfumeleli vanhu vo biha leswaku va onha Paradeyisi. I vanghana va yena ntsena lava nga ta tshama eka yona. Xana ku ta humelela yini hi vanhu vo biha? Leswaku u kuma nhlamulo, xiya mhaka ya xiviri ya Nowa. Nowa u hanye emalembeni ya magidi lama hundzeke. A a ri wanuna lonene loyi minkarhi hinkwayo a a ringeta hi matimba leswaku a endla ku rhandza ka Yehovha. Kambe vanhu lavan’wana lava a va ri kona emisaveni a va endla swilo swo biha. Kutani Yehovha a byela Nowa leswaku U ta tisa ndhambi leyi nga ta lovisa vanhu volavo hinkwavo vo biha. U byele Nowa ku aka ngalava leswaku yena ni ndyangu wa yena va nga lovi loko ku ta Ndhambi.​—⁠Genesa 6:​9-⁠18.

Nowa ni ndyangu wa yena va ake ngalava. Nowa u tsundzuxe vanhu leswaku Ndhambi ya ta, kambe a va n’wi yingisanga. Va hambete va endla swilo swo biha. Loko ngalava se yi herile, Nowa u nghenise swiharhi endzeni ka yona, ivi endzhaku ku nghena yena ni vandyangu wa yena. Kutani Yehovha a nisa mpfula leyikulu. Mpfula leyi yi ne masiku ya 40 ni vusiku bya 40. Hiloko mati ma funengeta misava hinkwayo.​—⁠Genesa 7:​7-⁠12.

 Vanhu lavo homboloka va lovile, kambe Nowa ni ndyangu wa yena va ponisiwile. Yehovha u va sirhelerile leswaku va pona Ndhambi, va nghena emisaveni leyi baseke leyi nga riki na vuhomboloki. (Genesa 7:​22, 23) Bibele yi vula leswaku wu ta fika nakambe nkarhi lowu Yehovha a nga ta tlhela a lovisa lava alaka ku endla leswinene. Vanhu lavanene a va nge lovisiwi. Va ta hanya hilaha ku nga heriki emisaveni leyi nga Paradeyisi.​—⁠2 Petro 2:​5, 6, 9.

Namuntlha vanhu vo tala va endla swilo swo biha. Misava yi tele hi swiphiqo. Yehovha u rhumela Timbhoni ta yena nkarhi na nkarhi leswaku ti ya tsundzuxa vanhu, kambe vo tala a va swi lavi ku yingisa marito ya Yehovha. A va swi lavi ku hundzuka etindleleni ta vona. A va swi lavi ku yingisa Xikwembu loko xi va byela leswi nga swinene ni leswi nga swo biha. Xana ku ta humelela yini hi vanhu lava? Xana va ta hundzuka siku rin’wana? Vo tala a va nge hundzuki. Wa ta nkarhi lowu vanhu lavo homboloka va nga ta lovisiwa naswona a va nge he tlheli va va kona.​—⁠Pisalema 92:⁠7.

Misava a yi nge lovisiwi; yi ta hundzuriwa paradeyisi. Lava va vaka vanghana va Xikwembu va ta hanya hi masiku eParadeyisini emisaveni.​—⁠Pisalema 37:⁠29.