U KHA apula lerikulu leri wupfeke emurhini. U ri nuhetela u nga si ri hoxa ebasikitini. U hete tiawara u ri karhi u tirha, kambe a wu titwi u karhele naswona u lunghekele ku endla ntirho lowu engetelekeke. Mana wa wena u le ku tirheni eka murhi lowu nga ekusuhi, u tirha a tsakile naswona u bula ni swirho swin’wana swa ndyangu swin’we ni vanghana lava n’wi pfunetaka ku tshovela. U languteka a ha ri ntsongo​—a ri hi ndlela leyi u n’wi tsundzukaka a ri ha yona loko wa ha ri ntsongo eka malembe lama hundzeke. A swi tshembisi leswaku u n’wi vone a ri karhi a dyuhala emisaveni yoleyo leyi sweswi yi hundzukeke. U n’wi vonile loko a ri karhi a vabya, u n’wi khoma hi voko loko a ri karhi a fa naswona u ririle esirheni rakwe. Kambe, sweswi hi loyi, swin’we ni van’wana vo tala naswona u ni rihanyo lerinene!

Masiku yo tano ma ta fika; ha swi tiva sweswo. Ha swi tiva hikwalaho ka leswi minkarhi hinkwayo switshembiso swa Xikwembu swi vaka ntiyiso. Eka xiyenge lexi hi ta kambisisa ndlela leyi switshembiso swin’wana swa Mfumo swi nga ta hetiseka ha yona enkarhini lowu taka, lowu yisaka enyimpini ya Armagedoni. Hi ta tlhela hi kambisisa swin’wana swa switshembiso swa Mfumo leswi tsakisaka leswi nga ta hetiseka endzhaku ka sweswo. Hakunene hi ta va ni ntsako loko hi vona nkarhi lowu eka wona Mfumo wa Xikwembu wu nga ta fuma misava leyi hinkwayo, wu endla swilo hinkwaswo swi va leswintshwa!