XANA vutomi a byi ta va njhani loko tiko hinkwaro ni mufumi wa rona a va xixima Yehovha tanihi Hosi leyi Lawulaka naswona va yingisa swileriso swa yena? Xivutiso lexi xi hlamulekile eka malembe 40 ya ku fuma ka Hosi Solomoni.

Loko Davhida a nga si fa u hlawule n’wana wa yena Solomoni leswaku a va mutlhandlami wa yena. Enorhweni, Xikwembu xi byele Solomoni leswaku a endla xikombelo. Solomoni u kombele vutlhari ni vutivi leswaku a ta kota ku avanyisa vanhu hi vululami ni hi vutlhari. Sweswo swi n’wi tsakisile Yehovha naswona u nyike Solomoni vutlhari ni ku twisisa. Yehovha u tlhele a n’wi tshembisa rifuwo, ndhuma ni ku n’wi engetelela masiku yo hanya, ntsena loko a tshama a tshembekile.

Ku avanyisa ka Solomoni hi vutlhari ku endle leswaku a va ni ndhuma. Siku rin’wana, vavasati vambirhi a va ri karhi va holova hikwalaho ka n’wana wa mufana, va vula leswaku i n’wana wa vona. Solomoni u lerise leswaku n’wana a tsemiwa hi le xikarhi ivi manana ha un’we a nyikiwa xiphemu xin’we. Wansati wo sungula u pfumerile leswaku n’wana yoloye a tsemiwa hi le xikarhi kambe wansati lowun’wana u vule leswaku swi nga antswa n’wana a nyikiwa wansati lowo sungula. Sweswo swi pfune Solomoni ku vona leswaku wansati la nga ni ntwela-vusiwana hi yena mana wa n’wana hiloko a n’wi nyika yena. Ku nga ri khale Vaisrayele hinkwavo va twe hi xiboho lexi Solomoni a xi endleke kutani va swi vona leswaku vutlhari bya yena a byi huma eka Xikwembu.

Nchumu lowukulu lowu Solomoni a wu endleke a ku ri ku aka tempele ya Yehovha, ku nga muako wo saseka eYerusalema lowu a wu ta va ndhawu ya Vaisrayele yo gandzela eka yona. Loko ku nyikeriwa tempele yoleyo, Solomoni u khongele a ku: “Waswivo! Matilo, ina, tilo ra matilo, wona hi woxe a ma nge ku ringani; kutani yindlu leyi ndzi yi akeke i yitsongo ngopfu!”—1 Tihosi 8:27.

Vanhu va le matikweni man’wana, yo tanihi le Xeba leyi nga le Arabiya va twile hi ta vutlhari bya Solomoni. Hosi ya xisati ya le Xeba yi fambe mpfhuka wo leha leswaku yi ta vona vukulu bya Solomoni ni rifuwo ra yena ni ku vona ndlela leyi Solomoni a a tlharihe ha yona. Hosi leyi ya xisati yi tsakisiwe swinene hi vutlhari bya Solomoni ni ndlela leyi swilo a swi va fambela kahle ha yona Vaisrayele lerova yi kale yi dzunisa Yehovha hileswi a hlawuleke hosi leyi tlhariheke. Hakunene hikwalaho ko katekisiwa hi Yehovha mfumo wa Solomoni hi wona a wu fuwe wu tlhela wu va ni ku rhula ematin’wini ya Israyele wa khale.

Khombo ra kona, Solomoni a nga ha endlanga swilo hi ku pfumelelana ni vutlhari bya Yehovha. U honise milawu ya Xikwembu hi ku teka vavasati vo tala ku katsa ni lava gandzelaka swikwembu swimbe. Hakatsongo-tsongo vasati va yena va endle leswaku a nga ha gandzeli Yehovha kambe a gandzela swifaniso swa mavunwa. Yehovha u byele Solomoni leswaku u ta tekeriwa xiyenge lexikulu xa mfumo wa yena. Xikwembu xi vule leswaku ndyangu wa yena a wu ta sala ni xiyenge lexitsongo hikwalaho ka xitshembiso lexi a xi xi endlile ni tata wa Solomoni. Hambileswi Solomoni a a nga ha tirheli Yehovha hi mbilu hinkwayo, Yehovha a nga wu rivalanga ntwanano wa Mfumo lowu a wu endleke na Davhida.

—Xi sekeriwe eka 1 Tihosi ndzima 1 ku ya eka ndzima 11; 2 Tikronika ndzima 1 ku ya eka ndzima 9; Deteronoma 17:17.