DYONDZO 21
Ma Chumayeriwa Njhani Mahungu Lamanene?
Ku nga ri khale, Yehovha u ta tirhisa Mfumo wakwe leswaku a herisa swiphiqo hinkwaswo. Mahungu lawa a hi yo tshama hi wona. Yesu a a lava leswaku valandzeri vakwe va byela van’wana mahungu lawa. (Matewu 28:19, 20) I yini leswi Timbhoni ta Yehovha ti swi endlaka ku komba leswaku ta xi yingisa xileriso xa Yesu?
1. Swi endliwa njhani namuntlha leswi vuriwaka hi Matewu 24:14?
Yesu u te: “Mahungu lawa lamanene ya Mfumo ma ta chumayeriwa emisaveni hinkwayo.” (Matewu 24:14) Timbhoni ta Yehovha ta swi rhandza ku endla ntirho lowu. Hi chumayela mahungu lamanene emisaveni hinkwayo hi tindzimi to tlula 1 000! Ntirho lowu a hi xintirhwana wu lava matshalatshala ni ku hleriwa kahle. A hi nge wu koti handle ko pfuniwa hi Yehovha.
2. Hi wahi matshalatshala lawa hi ma endlaka leswaku hi chumayela vanhu?
Hi chumayela kun’wana ni kun’wana laha hi kumaka vanhu kona. Hi chumayela “hi yindlu ni yindlu” ku fana ni Vakreste va le mikarhini ya Bibele. (Mitirho 5:42) Ndlela leyi yo chumayela yi endla leswaku hi kota ku fikelela vanhu va timiliyoni lembe ni lembe. Leswi hi pfaka hi nga va kumi vanhu emakaya ya vona, hi tlhela hi chumayela ni le tindhawini ta mani na mani. Hi tshama hi lunghekele ku byela van’wana hi Yehovha ni hi xikongomelo xakwe.
3. I vamani lava faneleke va chumayela mahungu lamanene?
Vakreste hinkwavo va ntiyiso va nyikiwe ntirho wo byela van’wana mahungu lamanene. A hi wu tekeli ehansi ntirho lowu. Hi chumayela hilaha hi nga kotaka hakona hikuva ha swi tiva leswaku ntirho lowu wu ponisa vutomi bya vanhu. (Hlaya 1 Timotiya 4:16.) A hi holi nchumu eka ntirho lowu hikuva Bibele yi ri: “Mi nyikiwe mahala, nyikani mahala.” (Matewu 10:7, 8) Vanhu van’wana a va ma amukeli mahungu lamanene. Kambe a hi tshiki hikuva hi va hi gandzela Yehovha naswona swa n’wi tsakisa.
ANAKANYISISA
Leswaku u vona ndlela leyi Yehovha a hi pfunaka ha yona, dyondza hi matshalatshala lawa Timbhoni ta Yehovha ti ma endlaka emisaveni hinkwayo leswaku ti chumayela mahungu lamanene.
Ku chumayela emisaveni hinkwayo: (A) Costa Rica, (B) United States, (C) Benin, (D) Thailand, (E) Yap, (F) Sweden
4. Hi tikarhatela ku fikelela vanhu hinkwavo
Timbhoni ta Yehovha ti wa ti pfuka leswaku ti chumayela vanhu mahungu lamanene hinkwako laha va kumekaka kona. Tlanga VHIDIYO, ivi mi bula hi xivutiso lexi landzelaka.
-
I yini leswi ku tsakisaka hi matshalatshala lawa Timbhoni ta Yehovha ti ma endlaka leswaku ti chumayela?
Hlaya Matewu 22:39 na Varhoma 10:13-15, ivi mi bula hi swivutiso leswi:
-
Loko hi chumayela van’wana hi swi kombisa njhani leswaku ha va rhandza?
-
Yehovha u titwa njhani hi vanhu lava chumayelaka mahungu lamanene?—Vona ndzimana 15.
5. Hi vatirhikulobye ni Xikwembu
Ku ni swo tala leswi kombisaka leswaku Yehovha hi yena a kongomisaka ntirho wa hina. Hi xikombiso, eNew Zealand makwerhu Paul u hlangane ni wansati un’wana loko a ri karhi a chumayela hi yindlu ni yindlu ni nhlikanhi. Hi mixo wa siku rero, wansati yoloye a ha ku khongela eka Xikwembu a tirhisa vito ra xona leri nge Yehovha, a xi kombela leswaku a vhakela hi un’wana ekaya ka yena. Paul u ri: “Ndzi fike ekaya kakwe endzhaku ka tiawara tinharhu a ha ku khongela.”
Hlaya 1 Vakorinto 3:9, ivi mi bula hi xivutiso lexi:
-
Leswi endlekeke eNew Zealand swi swi kombisa njhani leswaku Yehovha u kongomisa ntirho wo chumayela?
Hlaya Mitirho 1:8, ivi mi bula hi xivutiso lexi:
-
Hikwalaho ka yini hi lava Yehovha a hi pfuna leswaku hi kota ku endla ntirho wo chumayela?
Xana a wu swi tiva?
Vhiki ni vhiki eka tinhlengeletano ta hina ta le xikarhi ka vhiki hi dyondzisiwa ndlela yo chumayela. Loko u tshame u ya, u titwe njhani hi ndlela leyi hi dyondzisiwaka ha yona?
6. Hi yingisa xileriso xa Xikwembu loko hi chumayela
Emikarhini ya ku tsariwa ka Bibele, vakaneti va ringete ku tshikisa valandzeri va Yesu ku chumayela. Valandzeri volavo va lwele mfanelo ya vona yo chumayela hikuva va “lwela mahungu lamanene hi nawu.” (Vafilipiya 1:7) Timbhoni ta Yehovha ti endla leswi fanaka namuntlha. a
Hlaya Mitirho 5:27-42, ivi mi bula hi xivutiso lexi:
-
Hikwalaho ka yini hi nga taka hi nga tshiki ku chumayela?—Vona ndzimana 29, 38, na 39.
UN’WANA A NGA HA KU VUTISA A KU: “Hikwalaho ka yini Timbhoni ta Yehovha ti chumayela hi muti ni muti?”
-
A wu ta n’wi hlamula njhani?
NKATSAKANYO
Yesu u lerise valandzeri vakwe leswaku va chumayela mahungu lamanene ematikweni hinkwawo. Yehovha u pfuna vanhu vakwe ku endla ntirho lowu.
Mpfuxeto
-
Mahungu lamanene ma chumayeriwa njhani emisaveni hinkwayo?
-
Loko hi chumayela van’wana hi swi kombisa njhani leswaku ha va rhandza?
-
Xana u vona onge wa tsakisa ntirho wo chumayela? Hikwalaho ka yini u vula tano?
KUMA LESWI ENGETELEKEKE
Vona ndlela leyi Timbhoni ta Yehovha ti chumayelaka ha yona emadorobeni lamakulu.
Tsima Ro Hlawuleka Ro Chumayela eMadorobeni Lamakulu eParis (5:11)
I yini leswi Timbhoni ta Yehovha ti swi endleke leswaku ti chumayela vahlapfa?
Twana ndlela leyi makwerhu loyi a titwaka ha yona hikwalaho ko chumayela mahungu lamanene nkarhi hinkwawo.
Twana milandzu leyi Timbhoni ta Yehovha ti yi hluleke ehubyeni leswi endleke leswaku ti kota ku chumayela mahungu lamanene.
“Vachumayeri Va Mfumo Va Yisa Nandzu Wa Vona eHubyeni” (Mfumo Wa Xikwembu Wa Fuma!, ndzima 13)
a Xikwembu hi xona xi hi leriseke ku chumayela. Hikwalaho, Timbhoni ta Yehovha a ti lavi mpfumelelo eka valawuri leswaku ti chumayela mahungu lamanene.
U Nga Ha Tsakela
SWIVUTISO LESWI TALAKA KU VUTISIWA
I Yini Dyondzo Ya Bibele Leyi Dyondzisiwaka Hi Timbhoni Ta Yehovha?
Eka dyondzo ya Bibele leyi dyondzisiwaka hi Timbhoni ta Yehovha, u nga tirhisa vuhundzuluxeri byin’wana ni byin’wana bya Bibele. Titwe u ntshunxekile ku rhamba ndyangu hinkwawo kumbe vanghana va wena leswaku mi ta dyondza swin’we.
