Eka Lava Rhandzaka Yehovha:

A ku ri lembe ra 1971. Lava a va ri kona eNhlengeletanweni ya Xifundzha leyi a yi ri ni nhlokomhaka leyi nge, “Vito ra Xikwembu,” leyi khomiweke hi lembe rero, a va nga ha tikoti hi ku tsaka loko va kuma mikandziyiso yo hlayanyana leyintshwa. Mikandziyiso ya kona yi hlamuseriwe tanihi “leyi tlulaka leswi un’wana ni un’wana a a swi languterile.” Makwerhu un’wana u vule leswi loko ku humesiwa wun’wana wa mikandziyiso yoleyo u te: “Ndlela leyi a swi hlamuseleke ha yona swilo leswi nga ta endleka enkarhini lowu taka a yi tsakisa swinene!” A a vulavula hi yini? Hi buku leyi nge “The Nations Shall Know That I Am Jehovah”—How? Kambe i yini lexi a xi endla buku leyi yi tsakisa? Hikuva a yi ri ni tinhlamuselo leti antswisiweke ta vuprofeta bya buku ya Bibele ya Ezekiyele, ku nga vuprofeta lebyi vulavulaka hi vumundzuku bya vanhu hinkwavo.

Ku sukela hi lembe leri ku humesiweke buku leyi nge ‘Know Jehovah,’ nhlayo ya vanhu va Xikwembu yi engeteleke hi ku hatlisa, ku suka eka 1,5 wa timiliyoni yi va timiliyoni, to tlula nhungu. (Esa. 60:22) Malandza wolawo ya Yehovha ya timiliyoni, ma huma eka tindzimi leti tlulaka 900. (Zak. 8:23) Vo tala a va si tshama va hlaya buku leyi byi hlamuselaka hi vuenti vuprofeta lebyi huhuteriweke lebyi tsariweke hi muprofeta Ezekiyele.

Ku engetela kwalaho, eka makume ya malembe ku sukela hi 1971, ndlela leyi hi ti twisisaka ha yona tidyondzo to tala ta le Bibeleni yi antswisiwe swinene loko ku voninga ku ri karhi ku ya emahlweni ku vonakala. (Swiv. 4:18) Hi 1985 hi sungule ku swi vona kahle leswaku hikwalaho ka yini lava “tinyimpfu tin’wana” va vuriwa lavo lulama tanihi vanghana va Xikwembu. (Yoh. 10:16; Rhom. 5:18; Yak. 2:23) Kutani hi 1995 a ku ri ro sungula hi twisisa leswaku “tinyimpfu” ni “timbuti” ti ta avanyisiwa ro hetelela hi nkarhi wa “nhlomulo lowukulu” lowu taka. (Mat. 24:21; 25:31, 32) Ku antswisiwa loku hinkwako ku khumbe ndlela leyi hi yi twisisaka ha yona buku ya Ezekiyele.

Emalembeni ya sweswinyana, ku voninga ku ye mahlweni ku vonakala swinene. Xiya leswi hi swi dyondzeke eka swifaniso swa Yesu. Swo tala swa leswi hi swi dyondzeke se swi twisiseka kahle eka hina. Swo hlayanyana eka swifaniso sweswo swi vulavula hi swiendlakalo leswi nga ta endleka hi nkarhi wa nhlomulo lowukulu lowu nga ta tlhekeka ku nga ri khale. Hilaha ku fanaka, ndlela leyi hi byi twisisaka ha yona vuprofeta byo karhi lebyi nga ebukwini ya Ezekiyele yi antswisiwile. Byin’wana bya byona i vuprofeta lebyi vulavulaka hi Gogo wa Magogo (tindzima 38 na 39), ntirho wa wanuna loyi a khomeke rimhondzo ra inki ra matsalana (ndzima 9), ndhawu leyi nga ni marhambu yo oma ni ku hlanganisiwa ka tinhonga timbirhi hi ndlela yo fanekisela (ndzima 37). Hilaha ku fanaka, ku antswisiwa loku hinkwako ku antswise leswi tsariweke eka malembe lama hundzeke ebukwini leyi nge ‘Know Jehovah.’

Kutani a swi hlamarisi leswi vanhu vo tala va Yehovha va vutiseke va ku, “Hi ta yi kuma rini buku leyi nga ni nhlamuselo leyi antswisiweke ya vuprofeta bya Ezekiyele?” Buku ya kona hi leyi nge, Eku Heteleleni Yehovha U Pfuxete Vugandzeri Lebyi Tengeke! Loko u ri karhi u hlaya tindzima ta yona ta 22 u tlhela u anakanyisisa hi swifaniso swo saseka leswi kumekaka eka yona, u ta hlamala loko u xiya leswaku ku endliwe ndzavisiso hi vukheta leswaku ku tsariwa buku leyi. Hi anakanyisise swinene hi tlhela hi khongela hi mbilu hinkwayo leswaku hi twisisa xivangelo lexi endleke Yehovha a hi nyika buku yo tsakisa ya Ezekiyele ya le Bibeleni. Ku anakanyisisiwe ngopfu hi swivutiso swo tanihi leswi nge: I yini leswi vanhu va le nkarhini wa Ezekiyele a va swi dyondza ebukwini ya Ezekiyele naswona i yini leswi hi swi dyondzaka namuntlha? Hi byihi vuprofeta lebyi vulavulaka hi swiendlakalo swa nkarhi lowu taka?  Eka vuprofeta bya Ezekiyele, xana hi nga langutela swilo leswi fanekiselaka swo karhi? Tinhlamulo ta swivutiso leswi ti hi nyika matwisiselo lama nga lo dlaa, erivaleni ya buku leyi ya Bibele leyi hinkwerhu hi tiphinaka hi ku yi hlaya.

Loko u ri karhi u hlaya buku ya Ezekiyele ku sukela eku sunguleni ku ya emakumu ka yona, u ta susumeteleka ku tlangela xiphemu xa le tilweni xa nhlangano wa Yehovha. A swi kanakanisi leswaku u ta tlhela u hlamarisiwa hi milawu ya Yehovha leyi tlakukeke leyi a yi nyikeke lava nga etilweni ni lava nga laha misaveni lava lavaka ku n’wi gandzela hi ndlela leyi a yi amukelaka. Buku leyi nge, Vugandzeri Lebyi Tengeke yi ta ku pfuna leswaku u swi tlangela ngopfu leswi Yehovha a swi endleleke vanhu vakwe ni leswi a nga ta va endlela swona enkarhini lowu taka lowu nga kwala nyongeni. U ta swi xiya leswaku hi ku phindhaphindha buku leyi yi kandziyisa tidyondzo timbirhi. Yo sungula, leswaku hi tsakisa Yehovha, hi fanele hi n’wi tiva hi tlhela hi n’wi teka a ri Hosi Leyi Tlakukeke ya Vuako Hinkwabyo. Ya vumbirhi, hi fanele hi gandzela Yehovha hi ndlela leyi a yi amukelaka, hi hanya hi ndlela leyi fambisanaka ni milawu yakwe leyi tlakukeke.

Ku navela ka hina lokukulu hi leswaku buku leyi yi ku pfuna u tiyimisela swinene ku gandzela Yehovha hi ndlela leyi kombisaka ku xixima vito rakwe lerikulu ni leri kwetsimaka. Hi nkarhi lowu fanaka, onge yi nga ku khutaza leswaku u tshama u langutele nkarhi lowu matiko hinkwawo ma nga ta tiva leswaku hi yena Yehovha.—Ezek. 36:23; 38:23.

Onge Yehovha Tata wa hina wa rirhandzu, a nga ku katekisa swinene loko u ri karhi u tikarhatela ku twisisa buku leyi a huhuteleke muprofeta Ezekiyele leswaku a yi tsala.