1, 2. Hi ku ya hi Ezekiyele 47:1-12, i yini leswi Ezekiyele a swi vonaka naswona i yini leswi a swi xiyaka? (Vona xifaniso lexi nga eku sunguleni.)

EZEKIYELE u tlhela a vona nchumu wun’wana wo hlamarisa exivonweni xakwe xa tempele: Ku ni xinambyana lexi khulukaka ku suka endhawini yo kwetsima! N’wi vone hi mahlo ya mianakanyo a ri karhi a landzelela lomu mati wolawo yo tenga ma khulukelaka kona. (Hlaya Ezekiyele 47:1-12.) A ma khuluka katsongo ma suka enyangweni ya ndhawu yo kwetsima; ma khuluka ma huma etempeleni ekusuhi ni gede ya le vuxeni. Ntsumi yi valangisa Ezekiyele yi n’wi susa etempeleni loko va ri karhi va famba yi pima mpfhuka. Hi ku phindhaphindha ntsumi a yi byela Ezekiyele leswaku a tsemakanya hi le matini naswona muprofeta yoloye u kume leswaku mati a ma ya ma tala hi ku hatlisa, lerova ma kala ma va nambu lowukulu laha a a ta kota ku wu tsemakanya ntsena loko o nghena, a hlambela kunene!

² Ezekiyele u xiya leswaku mati ya nambu ma khulukela eLwandle leri Feke, ma fika ma hanyisa swilo leswi nga ematini wolawo lama nga ni munyu kun’wana ni kun’wana laha mati ya nambu wolowo a ma fika kona, ma endla leswaku mati ma tala hi tihlampfi. Nakambe ematlhelo ya nambu u vona mirhi yo tala ya mixakaxaka yi ri karhi yi kula. N’hweti ni n’hweti yi tswala mihandzu leyintshwa leyi nga ni rihanyo naswona matluka ya yona ma hanyisa. Loko Ezekiyele a vona swilo leswi hinkwaswo,  u fanele a titwe a rhurile a tlhela a va ni ntshembo. Kambe, xiyenge lexi xa tempele ya le xivonweni xi n’wi dyondzise yini Ezekiyele ni mahlongakulobye? Naswona xi hi dyondzisa yini namuntlha?

3. Hikwalaho ka yini Vayuda va le mikarhini ya khale, a va nga wu teki wu ri wa xiviri nambu wa le xivonweni xa Ezekiyele?

³ A swi kanakanisi leswaku Vayuda va le mikarhini ya khale, a va nga wu teki wu ri wa xiviri nambu wa le xivonweni xa Ezekiyele. Ematshan’weni ya sweswo, mhaka leyi ya le Matsalweni yi fanele yi va tsundzuxe hi vuprofeta byin’wana lebyi huhuteriweke bya ku pfuxetiwa ka vugandzeri lebyi tengeke, lebyi tsariweke hi muprofeta Yuwele kumbexana eka malembe yo tlula 200 Ezekiyele a nga si va kona. (Hlaya Yuwele 3:18.) Loko Vayuda lava a va ri evuhlongeni va hlaya rungula ra Yuwele leri huhuteriweke, a va nga langutelanga ku vona tintshava ta xiviri ti ri karhi ti “thona vhinyo yo tsokombela” kumbe swintshabyana swi ri karhi swi “khuluka ntswamba”; naswona a va nga langutelanga ku vona xihlovo xa mati xi khuluka ku suka “endlwini ya Yehovha.” Hilaha ku fanaka, Vayudakulobye va fanele va swi twisisile leswaku rungula ra xivono xa muprofeta Ezekiyele a ri nga vulavuli hi nambu wa xiviri. * Kutani hi rihi rungula leri Yehovha a a va tivisa rona? Matsalwa ma hi pfuna ku twisisa leswi swiyenge swin’wana swa xivono lexi swi vulaka swona. Hambiswiritano, hi ta kambisisa swilo swinharhu leswi hi tiyisekisaka hi rirhandzu ra Xikwembu leswi hi nga swi dyondzaka eka vuprofeta lebyi.

4. (a) Nambu wa le xivonweni xa Ezekiyele wu fanele wu endle vanhu va Xikwembu va langutela ku kuma mikateko yihi leyi humaka eka Yehovha? (b) Hikwalaho ka yini leswi Bibele yi tirhisaka rito “nambu” na “mati” swi hi tiyisekisa leswaku Yehovha u ta katekisa vanhu vakwe? (Vona bokisi leri nge “Milambu Ya Mikateko Leyi Humaka Eka Yehovha.”)

⁴ Nambu wa mikateko. Hakanyingi, eBibeleni milambu ni mati swi tirhisiwa ku fanekisela mikateko ya Yehovha leyi hanyisaka. Ezekiyele u vone nambu wo tano wu khuluka wu suka etempeleni. Hikwalaho, xivono xexo xi fanele xi endle vanhu va Xikwembu va langutela ku kuma mikateko leyi hanyisaka leyi humaka eka Yehovha, ntsena loko va khomelela swi tiya evugandzerini lebyi tengeke. Hi yihi mikateko ya kona? A va ta tlhela va kuma swiletelo swa Xikwembu leswi humaka eka vaprista. Nakambe leswi se magandzelo a ma ta endliwa etempeleni, a va ta tlhela va tiyiseka leswaku va ta rivaleriwa swidyoho swa vona. (Ezek. 44:15, 23; 45:17) Hikwalaho, a va ta tlhela va va lava baseke, onge hiloko va hlambisiwe hi mati yo tenga lama humaka etempeleni.

5. Nambu wa le xivonweni wu ku suse njhani ku vilela hinkwako ka leswaku ku ta tshama ku ri ni mikateko leyi ringaneke vanhu hinkwavo?

⁵ Xana a ku ta tshama ku ri ni mikateko leyi ringanaka vanhu hinkwavo? Xivono xexo a xi susa ku vilela koloko hinkwako, hi ku kombisa mati lawa a ma ya ma engeteleka hi singita, ma khuluka katsongo ma hundzuka xinambyana hi xinkarhana. (Ezek. 47:3-5) Hambiloko Vayuda va ya va tala etikweni ra vona leri pfuxetiweke, na yona mikateko ya Yehovha a yi ta ya yi engeteleka leswaku va eneriseka hinkwavo. Nambu a wu fanekisela ku tala ni ndzalo!

6. (a) Xivono xa vuprofeta xi nyika xitshembiso xihi lexi tiyisaka nhlana? (b) Hi xihi xilemukiso lexi xi nga tlhela xi vuriwa exivonweni? (Vona nhlamuselo ya le hansi.)

⁶ Mati lama hanyisaka. Eka xivono xa Ezekiyele, nambu wu khulukela eLwandle leri Feke, wu hanyisa swivumbiwa swo tala eka rona. Xiya leswaku mati wolawo ma hanyise swilo swo tanihi tihlampfi ta  mixakaxaka yo tala lerova yi kala yi ringanisiwa ni leyi kumekaka eLwandle Lerikulu kumbe eLwandle ra Mediteraniya. Ku kale ku va na bindzu lerikulu ra tihlampfi eribuweni ra Lwandle leri Feke, exikarhi ka miti yimbirhi leyi swi nga erivaleni leswaku a yi ri ekule ni le kule swinene. Ntsumi yi te: “Swilo hinkwaswo swi ta hanya kun’wana ni kun’wana laha xinambyana lexi xi khulukelaka kona.” Kambe, xana sweswo swi vula leswaku mati lawa a ma huma endlwini ya Yehovha a ma ta khulukela eswiphen’wini hinkwaswo swa Lwandle leri Feke? Doo! Ntsumi yi hlamusele leswaku mati lama hanyisaka a ma fikanga eka tindhawu tin’wana leti nga ndzhope. Tindhawu teto a ti ta “tshama ti ri ni munyu.” * (Ezek. 47:8-11) Hikwalaho xivono lexi xa vuprofeta a xi tiyisekisa leswaku vugandzeri lebyi tengeke a byi ta hanyisa vanhu byi va endla va andza. Kambe ku tlhele ku vuriwa ni xilemukiso lexi nge: A hi hinkwavo lava a va ta amukela mikateko ya Yehovha; naswona a hi hinkwavo lava a va ta hanyisiwa.

7. Mirhi ya le xivonweni leyi nga ematlhelo ka ribuwa ra nambu yi va tiyisekise hi yini Vayuda lava a va ri evuhlongeni?

⁷ Mirhi ya mihandzu ni leyi hanyisaka. I ya yini mirhi leyi nga ematlhelo ka ribuwa ra nambu? Yi endla leswaku ndhawu yoleyo yi xonga yi tlhela yi koka mahlo! Yi tlhela yi hi pfuna ku twisisa swin’wana. Ezekiyele ni Vayudakulobye swi fanele swi va tsakisile ku ehleketa hi mihandzu leyintshwa yo nandziha, leyi mirhi yoleyo a yi ta yi tswala n’hweti ni n’hweti! Xivono xexo xo tsakisa xi tlhele xi va tiyisekisa leswaku Yehovha a a ta va dyondzisa tindlela takwe. Swin’wana hi swihi? Xiya leswaku matluka ya mirhi yoleyo “ma ta va yo hanyisa.” (Ezek. 47:12) Yehovha a a swi tiva leswaku xa nkoka ngopfu lexi lava vuyeke evuhlongeni va nga ta xi lava a ku ta va ku pfuniwa ku tiyisa vuxaka bya vona na yena naswona u tshembise ku va pfuna. Ndlela leyi a swi endleke ha yona sweswo yi hlamuseriwe eka vuprofeta byin’wana lebyi vulavulaka hi ku pfuxetiwa ka vugandzeri lebyi tengeke, hilaha hi swi xiyeke hakona eka Ndzima 9 ya buku leyi.

8. I yini leswi kombisaka leswaku xivono xa Ezekiyele a xi ta hetiseka hi ndlela leyikulu?

⁸ Hambiswiritano, hilaha hi buleke hakona eka Ndzima 9, vuprofeta byebyo a byi hetisekanga hi ku helela eka Vayuda lava vuyeke hi le vuhlongeni. I vanhu lava endleke leswaku byi nga hetiseki hi ku helela. Yehovha a a nga ta va katekisa hi ku helela hikuva exikarhi ka vona a ku ri ni lava a va tlhelela eka mahanyelo ya vona yo biha, va nga yingisi, va tshamela ku honisa vugandzeri lebyi tengeke. Lavo tshembeka a va twa ku vava naswona mahanyelo ya Vayudakulobye a ma va heta matimba. Kambe vagandzeri va Yehovha vo tshembeka a va swi tiva leswaku switshembiso swa yena swa hetiseka; a swi si tshama swi ba ehansi. (Hlaya Yoxuwa 23:14.) Siku rin’wana xivono xa Ezekiyele a xi ta hetiseka hi ndlela leyikulu. Kambe a xi ta hetiseka rini?

9. Xivono xa Ezekiyele xa tempele xi hetiseka rini hi ndlela leyikulu?

⁹ Hilaha hi swi xiyeke hakona eka Ndzima 14 ya buku leyi, xivono xa Ezekiyele xa tempele xi hetiseka hi ndlela leyikulu “emikarhini ya makumu,” ku nga nkarhi lowu vugandzeri lebyi tengeke byi nga ta  tlakusiwa swinene ngopfu. (Esa. 2:2) Xiyenge lexi xa xivono xa Ezekiyele xi hetiseka njhani sweswi?

10, 11. (a) Hi yihi mikateko leyi khulukelaka eka hina ku fana ni nambu namuntlha? (b) Xana mikateko leyi humaka eka Yehovha yi engeteleke njhani leswaku yi enerisa swilaveko swa vanhu lava andzaka emasikwini ya makumu?

¹⁰ Nambu wa mikateko. Mati lama khulukaka ma huma endlwini ya Yehovha ma hi tsundzuxa hi mikateko yihi namuntlha? Kahlekahle ma hi tsundzuxa hi swilo hinkwaswo leswi Yehovha a hi nyikaka swona leswaku swi hi pfuna. Xa nkoka swinene i gandzelo ra nkutsulo ra Kreste leri nga ni matimba yo basisa, lama endlaka leswaku hi rivaleriwa swidyoho swa hina. Ntiyiso lowu nga eRitweni ra Xikwembu leri tengeke wu fanisiwa ni mati yo basisa lama hanyisaka. (Efe. 5:25-27) Mikateko yo tano yi vonaka njhani enkarhini wa hina?

¹¹ Hi 1919, malandza ya Yehovha a ma ri magidi ma nga ri mangani naswona a ma tsake ngopfu loko ma dyondzisiwa ntiyiso wa le Bibeleni lowu a ma wu lava. Eka makume ya malembe lama landzeleke, nhlayo ya wona a yi ya yi engeteleka. Namuntlha vanhu va Xikwembu va le henhla ka nhungu wa timiliyoni. Xana mati lama tengeke ya ntiyiso ma ye emahlweni ma khuluka? Ina! Hi kuma tidyondzo to tala ta ntiyiso wa le Bibeleni. Eka malembe ya 100 lama hundzeke, vanhu va Xikwembu va kume Tibibele, tibuku, timagazini, tibroxara ni swiphephana swa tibiliyoni. Ku fana ni nambu wa le xivonweni lowu Ezekiyele a wu voneke, mati yo tenga ya ntiyiso ma engeteleke hi ku hatlisa leswaku ma enerisa swilaveko swa vanhu lava andzaka, lava lavaka ku dyondza hi Xikwembu emisaveni hinkwayo. Tibuku leti sekeriweke eBibeleni i khale ti ri karhi ti kandziyisiwa. Kasi sweswi, mikandziyiso yo tano yi kumeka hi tindzimi to tlula 1 000 eka website ya jw.org! Xana mati wolawo ya ntiyiso ma va pfuna njhani vanhu lava rhandzaka leswinene?

12. (a) Xana rungula ra ntiyiso ri va pfune njhani vanhu leswaku va va ni ripfumelo eka Yehovha? (b) Hi xihi xilemukiso lexi nga enkarhini lexi xivono xi hi nyikaka xona namuntlha? (Vona nhlamuselo ya le hansi.)

¹² Mati lama hanyisaka. Ezekiyele u byeriwe leswi: “Swilo hinkwaswo swi ta hanya kun’wana ni kun’wana laha xinambyana lexi xi khulukelaka kona.” Ehleketa hi ndlela leyi rungula ra ntiyiso ri khulukeleke vanhu hinkwavo lava teke etikweni ra hina leri katekisiweke hi Yehovha. Ntiyiso wa le Bibeleni wu fikelele timbilu ta vanhu va timiliyoni naswona wu va pfune leswaku va va ni ripfumelo eka Yehovha. Hambiswiritano, xivono xi tlhela xi hi nyika xilemukiso lexi nga enkarhini lexi nge: A hi hinkwavo lava amukelaka ntiyiso wolowo. Ku fana ni tindhawu leti nga ndzhope ni leti nga nhlangasi ta le Lwandle leri Feke ta le xivonweni xa Ezekiyele, ku ni vanhu lava nga rhandziki leswinene, lava alaka ku amukela ntiyiso ni ku wu tirhisa. * Sweswo swi nga tshuki swi endleka eka hina!—Hlaya Deteronoma 10:16-18.

13. Hi dyondza yini namuntlha eka mirhi ya le xivonweni?

¹³ Mirhi ya mihandzu ni leyi hanyisaka. Xana mirhi ya le xivonweni leyi nga ematlhelo ya ribuwa ra nambu yi hi dyondzisa swo karhi leswi hi khutazaka namuntlha? Ina! Tsundzuka, mirhi yoleyo a yi tswala mihandzu leyintshwa yo nandziha n’hweti ni n’hweti naswona matluka ya yona a ma hanyisa. (Ezek. 47:12) Hikwalaho, yi hi tsundzuxa leswaku hi gandzela Xikwembu lexi hananaka lexi hi nyikaka hinkwaswo leswaku hi kota ku va ni vuxaka na xona, ku nga ku hanyisiwa hi ndlela ya nkoka swinene. Namuntlha vanhu vo tala emisaveni a va wu tivi ntiyiso  lowu nga eBibeleni. Kambe, ehleketa hi leswi Yehovha a hi nyikaka swona. Xana u tshama u heta ku hlaya nhlokomhaka yo karhi eka yin’wana ya timagazini ta hina, kumbe u yimbelela risimu ro gimeta eka yin’wana ya tinhlengeletano ta muganga kumbe ta xifundzha kumbe u heta ku hlalela vhidiyo kumbe nongonoko wa vuhaxi bya JW, kutani u titwa u katekile leswi u dyondzisiwaka hi Yehovha? Hakunene hi dya hi xurha! (Esa. 65:13, 14) Xana ku twisisa leswi Bibele yi swi dyondzisaka swi hi endla hi hanya hi ndlela leyi vuyerisaka ni leyi tsakisaka Yehovha? Ndzayo leyinene leyi hi yi kumaka leyi sekeriweke eRitweni ra Xikwembu yi hi pfuna ku papalata swidyoho swo tanihi ku tikhoma ko biha, makwanga ni ku pfumala ripfumelo. Yehovha u tlhele a endla leswaku Vakreste va kota ku pfuniwa loko va biwa hi ripfalo hikwalaho ka xidyoho lexikulu lexi va xi endleke. (Hlaya Yakobo 5:14.) Hakunene hi katekile hilaha xivono xa Ezekiyele xa mirhi xi swi kombiseke hakona.

14, 15. (a) Hi dyondza yini hi tindhawu ta ndzhope ta le xivonweni xa Ezekiyele leti nga hanyisiwangiki hi mati? (b) Xana nambu wa le xivonweni xa Ezekiyele wu hi vuyerisa njhani namuntlha?

¹⁴ Hi nkarhi lowu fanaka hi nga dyondza swo karhi hi tindhawu ta ndzhope ta le xivonweni leti nga hanyisiwangiki hi mati. Hi lava leswaku mikateko ya Yehovha yi kongomisa vutomi bya hina. A swi ta va ni khombo loko a hi ala ku kongomisiwa hi Xikwembu ku fana ni vanhu vo tala emisaveni leyi, leyi vabyaka hi ndlela yo fanekisela. (Mat. 13:15) Ematshan’weni ya sweswo, ha tsaka leswi hi vuyeriwaka eka nambu wa mikateko. Hi nga ha ehleketa hi nambu wa le xivonweni xa Ezekiyele, loko hi ri karhi hi nwa mati yo tenga ya ntiyiso wa Rito ra Xikwembu, loko hi chumayela van’wana hi ntiyiso wolowo, loko hi kuma nkongomiso, nchavelelo ni mpfuno wa rirhandzu lowu humaka eka vakulu lava leteriweke hi nandza wo tshembeka. Nambu wolowo wa hanyisa kun’wana ni kun’wana laha wu khulukelaka kona!

¹⁵ Kambe, xana xivono xa nambu xi ta hetiseka njhani enkarhini lowu taka? Hilaha hi nga ta swi vona hakona, nambu wu ta khuluka swinene eParadeyisini leyi taka.

16, 17. (a) Xana mati lama hanyisaka ma ta tala hi ndlela yihi eParadeyisini? (b) Hi ta vuyeriwa njhani eka nambu wolowo wa mikateko eParadeyisini?

¹⁶ Hi mahlo ya miehleketo, xana wa tivona u ri eParadeyisini u ri karhi u tiphina swinene ni vanghana ni maxaka ya wena? Ku dyondza hi nambu wa le xivonweni xa Ezekiyele swi ta ku pfuna u swi vona kahle sweswo. Njhani? Tlhela u kambisisa swiyenge swinharhu leswi nga erivaleni swa le xivonweni, leswi kombisaka rirhandzu ra Xikwembu.

¹⁷ Nambu wa mikateko. Nambu wo fanekisela wu ta va wu kule ngopfu eParadeyisini, hikuva wu ta hi vuyerisa emiehleketweni, emintlhavekweni ni ku hi nyika leswi hi swi lavaka evuton’wini. Hi nkarhi wa Mfumo wa Yesu wa Gidi ra Malembe, Mfumo wa Xikwembu wu ta pfuna vanhu lavo tshembeka leswaku va vuyeriwa hi xitalo eka gandzelo ra nkutsulo. Hakatsongotsongo, va ta endliwa lava hetisekeke! A ku nge he vi na mavabyi, madokodela, tinese, swibedlhele ni ndzindzakhombo ya swa rihanyo. Mati wolawo lama hanyisaka ma ta khulukela eka vanhu va timiliyoni “va ntshungu lowukulu” lava poneke Armagedoni,  lava nga ta va va huma “enhlomulweni lowukulu.” (Nhlav. 7:9, 14) Hambileswi mikateko yoleyo yo sungula yi nga ta tsakisa, yi ta va yi fana ni mati lama khulukaka katsongo loko yi ringanisiwa ni mikateko leya ha taka. Hilaha a swi ri hakona exivonweni xa Ezekiyele, nambu wu ta ya wu kula leswaku wu enerisa swilaveko swa vanhu hinkwavo.

18. Hi nkarhi wa Gidi ra Malembe, xana “nambu wa mati ya vutomi” wu ta va nambu lowukulu hi ndlela yihi?

¹⁸ Mati lama hanyisaka. Hi nkarhi wa Gidi ra Malembe, “nambu wa mati ya vutomi” wu ta va nambu lowukulu. (Nhlav. 22:1) Vanhu va timiliyoni, hambi ku ri tibiliyoni va ta pfuxiwa eku feni va nyikiwa nkarhi wo hanya hilaha ku nga heriki eParadeyisini! Mikateko ya Yehovha leyi tisiwaka hi Mfumo wa yena yi ta katsa ku pfuxiwa ka vanhu va ntsandzavahlayi lava feke khale. (Esa. 26:19) Hambiswiritano, xana hinkwavo lava pfuxiweke va ta ya emahlweni va hanya hilaha ku nga heriki?

19. (a) I yini leswi kombisaka leswaku mati lamantshwa ya ntiyiso wa Xikwembu ma ta kumeka eParadeyisini? (b) Van’wana va ta ‘tshama va ri munyu’ hi ndlela yihi enkarhini lowu taka?

¹⁹ Un’wana ni un’wana u fanele a tihlawulela. Phela, enkarhini wolowo ku ta pfuriwa tibukunsongwa letintshwa. Hikwalaho, mati lama phyuphyisaka lama humaka eka Yehovha ma ta katsa swiletelo leswintshwa leswi humaka eka yena. Hakunene swa tsakisa ku ehleketa hi ntshembo wolowo! Nilokoswiritano van’wana va ta ala ku landzela swiletelo leswintshwa kutani va hlawula ku nga n’wi yingisi Yehovha. Van’wana va nga ha xandzuka hi nkarhi wa Gidi ra Malembe kambe a va nge pfumeleriwi ku kavanyeta Paradeyisi. (Esa. 65:20) Hi nga ha tsundzuka xivono xa Ezekiyele kutani hi ehleketa hi tindhawu ta ndzhope  leti tshameke ti nga ri na mihandzu leti a ti “tshama ti ri ni munyu.” Hakunene ku ta va ku ri vuphukuphuku loko vanhu va tiomisa tinhloko va ala ku nwa mati ya risima lama hanyisaka! Endzhaku ka Gidi ra Malembe, ntlawa wa vaxandzuki wu ta yima na Sathana. Hinkwavo lava alaka ku fumiwa hi Mfumo wo lulama wa Yehovha va ta kuma vuyelo lebyi fanaka, ku nga ku dlayiwa.—Nhlav. 20:7-12.

20. Hi rihi lunghiselelo leri hi nga ta vuyeriwa eka rona hi nkarhi wa Gidi ra Malembe leri hi tsundzuxaka mirhi leyi Ezekiyele a yi voneke?

²⁰ Mirhi ya mihandzu ni leyi hanyisaka. Yehovha u lava leswaku hinkwerhu hi kuma vutomi lebyi nga heriki. U ta tlhela a tiyiseka leswaku ku ni lunghiselelo leriya ro fana ni mirhi leyi Ezekiyele a yi voneke, leswaku a hi pfuna hi kota ku kuma nkateko lowukulu lowu a hi tshembisaka wona. Kambe, eParadeyisini mikateko leyi humaka eka Yehovha yi ta hi nyika swilaveko swa hina ni ku hi vuyerisa emiehleketweni ni le mintlhavekweni. Yesu Kreste ni vafumikulobye va 144 000 va ta fuma va ri etilweni va ri tihosi ku ringana Gidi ra Malembe. Lava 144 000 tanihi ntlawa wa vaprista va ta tirhisa gandzelo ra nkutsulo ra Kreste ku pfuna vanhu vo tshembeka leswaku va va lava hetisekeke. (Nhlav. 20:6) Ku hanyisiwa emiehleketweni ni le mintlhavekweni swi hi tsundzuxa hi mirhi leyi Ezekiyele a yi voneke ematlhelo ka ribuwa ra nambu, mirhi leyi tswalaka mihandzu leyi phomisaka marha leyi nga ni matluka lama hanyisaka. Xivono xa Ezekiyele xi fana ni vuprofeta byin’wana byo tsakisa lebyi tsariweke hi muapostola Yohane. (Hlaya Nhlavutelo 22:1, 2.) Matluka ya mirhi leyi Yohane a yi voneke a ma ri yo “hanyisa matiko.” Vanhu vo tshembeka va timiliyoni ta ntsandzavahlayi va ta vuyeriwa eka mitirho leyi nga ta endliwa hi vaprista lava 144 000.

21. Ku anakanyisisa hi nambu wa le xivonweni xa Ezekiyele swi ku endla u titwa njhani naswona i yini leswi hi nga ta bula hi swona eka tindzima leti landzelaka? (Vona bokisi leri nge “Xinambyana Xi Hundzuka Nambu!”)

²¹ Loko u ri karhi u anakanyisisa hi nambu wa le xivonweni xa Ezekiyele, xana a wu titwi u rhurile embilwini u tlhela u va ni ntshembo? Hakunene hi langutele mikarhi yo tsakisa swinene! Nakambe ehleketa hi leswi, eka malembe ya magidi lama hundzeke, Yehovha u hi nyike vuprofeta byo tala leswaku a hi pfuna hi kota ku vona leswi paradeyisi yi nga ta va yi ri xiswona, a hi lehisela mbilu, a hi rhamba leswaku hi ta vona ku hetiseka lokukulu ka swilo swa xiviri leswi a hi tshembiseke swona hi ku tirhisa vuprofeta. Xana u ta va kona? Swi nga ha endleka wa tivutisa loko hakunene swi ta koteka leswaku u va kona eParadeyisini. Eka tindzima leti landzelaka a hi kambisiseni ndlela leyi tindzima to hetelela ta vuprofeta bya Ezekiyele ti hi tiyisaka nhlana ha yona.