YOXUWA a a langutane ni xiyimo xo tika. A a fanele a rhangela tiko ra Israyele leswaku ri nghena eTikweni leri Tshembisiweke ehansi ka swiyimo swo tika. Hambiswiritano, Yehovha u n’wi tiyisekise leswaku u ta hlula naswona u n’wi khutaze a ku: ‘Vana ni xivindzi, u tiya. U endla hi ku landza Nawu. Wu hlaye hi rito ra le hansi nhlikanhi ni vusiku, leswaku u ta hisekela ku endla hi ku landza hinkwaswo leswi tsariweke eka wona; hi kona u nga ta endla ndlela ya wena yi humelela kutani u endla hi vutlhari.’—Yox. 1:7, 8.

Eka ‘mikarhi leyi ya mangava leyi swi nonon’hwaka ku langutana na yona,’ na hina hi langutana ni swiyimo swo tika. (2 Tim. 3:1) Ku fana na Yoxuwa, na hina hi nga hlula loko hi landzela xitsundzuxo lexi Yehovha a n’wi nyikeke xona. Hi nga hlaya Bibele siku na siku naswona hi tirhisa misinya ya milawu leyi hi yi kumaka, eka miringo leyi hi langutanaka na yona.

Hambiswiritano, vo tala va hina a hi na vuswikoti byo dyondza naswona a hi swi rhandzi ku dyondza. Kambe, leswi ku dyondza Bibele swi nga swa nkoka, kambisisa bokisi leri nge, “ Ringeta Swiringanyeto Leswi” leswaku u ta kuma swiringanyeto leswi u nga swi tirhisaka leswaku u endla dyondzo ya wena yi vuyerisa ni ku va leyi tsakisaka.

Mupisalema u yimbelele a ku: “Ndzi endle ndzi famba endleleni ya swileriso swa wena, hikuva ndzi yi tsakerile.” (Ps. 119:35) U nga va ni ntsako lowukulu loko u kambisisa Rito ra Xikwembu. U ta vuyeriwa swinene loko u ri karhi u lavisisa rifuwo leri nga eRitweni ra Xikwembu.

Hambileswi u nga taka u nga rhangeli tiko ku fana na Yoxuwa, u ni swiphiqo leswi u langutanaka na swona. Hikwalaho, ku fana na Yoxuwa, dyondza u tlhela u hanya hi ku landza leswi tsariweke leswaku u ta pfuneka. Loko u endla tano, na wena u ta endla ndlela ya wena yi humelela naswona u ta endla hi vutlhari.