Eka 2 Vakorinto 12:2, 3, Pawulo u vulavula hi munhu wo karhi loyi “a tekeriweke etilweni ra vunharhu.” I mani munhu wa kona? Loko Pawulo a tsalela vandlha ra le Korinto u kandziyise leswaku Xikwembu a xi tirhisa yena tanihi muapostola. (2 Kor. 11:5, 23) Kutani endzhaku ka sweswo a vulavula hi ‘swivono ni tinhlavutelo ta Hosi.’ Eka rungula rero, a ku kona laha Pawulo a boxeke vamakwerhu van’wana. Hikwalaho, Pawulo a vula yena loko a vulavula hi munhu la nyikiweke swivono ni tinhlavutelo.—2 Kor. 12:1, 5.

Hikwalaho, Pawulo hi yena munhu loyi “a tekeriweke etilweni ra vunharhu” ni loyi a “tekeriwe eparadeyisini.” (2 Kor. 12:2-4) U tirhise rito “tinhlavutelo,” kumbexana ku hi byela leswaku u paluxeriwe swilo leswi a swi ta endleka enkarhini lowu taka.

I yini leswi Pawulo a swi voneke tanihi ‘tilo ra vunharhu’?

EBibeleni rito ‘tilo’ ri nga ha vula xibakabaka kumbe swilo leswi nga exibakabakeni. (Gen. 11:4; 27:28; Mat. 6:26) Kambe rito ‘tilo’ ri nga tlhela ri tirhisiwa hi ndlela yin’wana. Mikarhi yin’wana ri vula vulawuri bya vanhu. (Dan. 4:20-22) Kumbe ri nga ha vula vulawuri bya Xikwembu, tanihi Mfumo wa Xikwembu.—Nhlav. 21:1.

Pawulo u vone ‘tilo ra vunharhu.’ Xana a vula yini? Mikarhi yin’wana Bibele yi phindha swo karhi ka nharhu hi xikongomelo xo kandziyisa, xo tiyisekisa kumbe ku kombisa nkoka. (Esa. 6:3; Ezek. 21:27; Nhlav. 4:8) Swi tikomba onge loko Pawulo a vulavula hi ‘tilo ra vunharhu,’ a kandziyisa vukulu ni ku tlakuka ka vulawuri bya Mfumo wa Mesiya ehansi ka Yesu Kreste ni lava 144 000 lava nga ta fuma na yena. (Vona Insight on the Scriptures ya Xinghezi, Vhol. 1, matl. 1059, 1062.) Hilaha muapostola Petro a tsaleke hakona, hi rindzele “matilo lamantshwa” hi ku ya hi xitshembiso xa Xikwembu.—2 Pet. 3:13.

Ku vuriwa yini hi ‘paradeyisi’ leyi Pawulo a yi boxeke?

Hilaha ku fanaka rito ‘paradeyisi’ ri nga ha vula swilo swo hambanahambana: (1) Leswi a ku ri kaya ro sungula ra vanhu, rito ‘paradeyisi’ ri vula paradeyisi ya xiviri leyi nga ta va kona laha misaveni. (2) Ri nga ha vula ku rhula loku Yehovha a nga ta ku nyika vanhu vakwe emisaveni leyintshwa. (3) Ri nga ha tlhela ri vula xiyimo xo tsakisa xa le tilweni, “eparadeyisini ya Xikwembu” hilaha swi boxiweke hakona eka Nhlavutelo 2:7.—Vona Xihondzo xo Rindza xa July 15, 2015, tl. 5. ndzim. 8.

Swi nga endleka Pawulo a kombetela eka tinhlamuselo toleto hinkwato loko a vulavula hi paradeyisi eka 2 Vakorinto 12:4.

Ku katsakanya:

‘Tilo ra vunharhu’ leri boxiweke eka 2 Vakorinto 12:2 i Mfumo wa Mesiya lowu nga emavokweni ya Yesu Kreste swin’we ni lava 144 000, ku nga “matilo lamantshwa.”—2 Pet. 3:13.

Wu vitaniwa ‘tilo ra vunharhu’ hikuva Mfumo lowu i wukulu, wu tlakukile.

‘Paradeyisi’ leyi Pawulo a “tekeriwe” eka yona exivonweni yi vula (1) Paradeyisi ya xiviri leyi nga ta va kona laha misaveni, (2) xiyimo xa ku rhula lexi nga ta va kona laha misaveni enkarhini lowu taka, lexi tlulaka lexi nga kona sweswi ni (3) ‘paradeyisi ya Xikwembu’ etilweni leyi nga ta va kona hi nkarhi wun’we ni misava leyintshwa.

Leswi swi vula leswaku misava leyintshwa yi ta katsa matilo lamantshwa ni misava leyintshwa. Leri ku ta va ku ri lunghiselelo lerintshwa leri katsaka Mfumo wa le tilweni swin’we ni vanhu lava nga ta gandzela Yehovha emisaveni ya paradeyisi.