Ndlela Leyi Va Hlulaka Ntshikilelo Wa Tintangha Ha Yona

KU NAVELA ku amukeleka ku kucetela vo tala leswaku va pfumelelana ni mianakanyo ni swiendlo swa tintangha ta vona. Vantshwa ngopfu-ngopfu va lava matimba yo ala ku hlanganyela eka swiendlo leswi nga ni khombo, swo tanihi ku tirhisa swidzidzirisi hi ndlela yo biha ni ku tikhoma loko biha hi tlhelo ra rimbewu. Xana va nga wu hlula njhani ntshikilelo wa tintangha?

Vanhwanyana vambirhi va le Poland lava nga emalembeni ya kondlo-a-ndzi-dyi va ha ku tsala va ku: “Moya wa misava wu vonaka kahle exikarhi ka tintangha ta hina to tala. Va kopela loko ku tsariwa swikambelo, va tirhisa ririmi leri thyakeke naswona va rhandza swiambalo leswi nga efexenini ni vuyimbeleri lebyi tungulaka tindleve naswona byi thyakeke. Ha tsaka swinene leswi hi nga ni swihloko leswi swi vulavulaka hi hina vantshwa swi tlhela swi hi sirhelela eka minkucetelo ya vana va kondlo-a-ndzi-dyi ya lava nga tsakangiki ni lava xandzukeke!

“A hi na marito yo hlamusela ku tlangela ka hina swihloko swa Xihondzo xo Rindza leswi kandziyiseke leswaku, hina tanihi vantshwa ha rhandziwa naswona ha tlangeriwa. Ndzayo ya Bibele leyi hi yi kumeke yi hi pfune leswaku hi kongomisa magoza ya hina hi ndlela leyi faneleke leswaku hi hambeta hi tsakisa Yehovha Xikwembu. Hi khorwisekile leswaku ku tirhela Yehovha hi ku tshembeka hi yona ndlela leyinene evuton’wini.”

Ina, vantshwa va nga lwisana ni ntshikilelo wa tintangha. Loko va letela ‘matimba ya vona ya ku twisisa,’ vantshwa lava nga Vakreste va dyondza ku endla swiboho swa vutlhari leswi nga kombisiki “moya wa misava” kambe leswi kombisaka “moya lowu humaka eka Xikwembu.”—Vaheveru 5:14; 1 Vakorinto 2:12.