Vanhu Va Yehovha Lava Vuyisiweke Va N’wi Dzunisa eMisaveni Hinkwayo
Vanhu Va Yehovha Lava Vuyisiweke Va N’wi Dzunisa eMisaveni Hinkwayo
“Ndzi ta endla leswaku vanhu va hundzukela eka ririmi leri tengeke, leswaku hinkwavo va vitana vito ra Yehovha.”—SOFANIYA 3:9.
1. Ha yini marungula ya ndzoviso a ma kongomisiwe ehenhla ka Yuda ni matiko man’wana?
MAWAKU matimba ya marungula ya ku avanyisa lawa Yehovha a huhuteleke Sofaniya leswaku a ma vula! Marungula wolawo ya ndzoviso a ma kongomisiwe etikweni ra Yuda ni ntsindza wa rona, ku nga Yerusalema, hikuva varhangeri ni vanhu hinkwavo a va nga ku endli ku rhandza ka Yehovha. Matiko ya vaakelani yo kota Filisita, Mowabu na Amone na wona a ma ta weriwa hi vukarhi bya Xikwembu. Ha yini? Hikwalaho ka ku kanetana ni vanhu va Yehovha loku heteke malembe-xidzana yo tala. Hikwalaho ka xivangelo xexo, mfumo wa misava wa Asiriya a wu ta lovisiwa, wu nga ha pfuxiwi.
2. Handle ko kanakana a ku vulavuriwa hi vamani eka Sofaniya 3:8?
2 Hambiswiritano, a ku ri ni vanhu va timbilu letinene etikweni ra Yuda wa khale. A va langutele ku tisiwa ka xigwevo xa Xikwembu ehenhla ka lavo homboloka naswona handle ko kanakana ku vuriwa vona hi marito lawa: “‘Tshamani mi ndzi languterile,’ ku vula Yehovha, ‘ku fikela esikwini leri ndzi nga ta yima ha rona ndzi phanga, hikuva xiboho xa mina xa vuavanyisi i ku hlengeleta matiko, leswaku ndzi hlengeleta mimfumo, ndzi chululela xigwevo xa mina ehenhla ka wona, ku hlundzuka ka mina hinkwako lokukulu; hikuva misava hinkwayo yi ta herisiwa hi ndzilo wa ku hiseka ka mina.’”—Sofaniya 3:8.
“Ririmi Leri Tengeke” Eka Vamani?
3. I rungula rihi leri tiyisaka nhlana leri Sofaniya a huhuteriweke ku ri vula?
3 Ina, Sofaniya u vule marungula ya ndzoviso lowu humaka eka Yehovha. Kambe muprofeta loyi u tlhele a huhuteriwa leswaku a nyikela rungula leri tiyisaka nhlana—rungula leri a ri ta va chavelela swinene lava a va ta tshama va tshembekile eka Yehovha. Hilaha swi tsariweke hakona eka Sofaniya 3:9, Yehovha Xikwembu u te: “Enkarhini wolowo ndzi ta endla leswaku vanhu va hundzukela eka ririmi leri tengeke, leswaku hinkwavo va vitana vito ra Yehovha, va n’wi tirhela hi mbilu yin’we.”
4, 5. (a) A ku ta humelela yini hi vanhu lavo biha? (b) I vamani lava a va ta vuyeriwa eka leswi, naswona ha yini?
4 Ku ni vanhu lava a va nga ta ri kuma ririmi leri tengeke. Vuprofeta lebyi byi vulavula hi vanhu volavo, byi ri: “Ndzi ta susa lava va khanaka hi ku titlakusa exikarhi ka wena.” (Sofaniya 3:11) Hikwalaho lava titlakuseke, lava deleleke milawu ya Xikwembu va tlhela va endla swilo leswo biha a va ta susiwa. Naswona i vamani lava a va ta vuyeriwa? Sofaniya 3:12, 13 yi ri: “Kunene exikarhi ka wena [mina Yehovha] ndzi ta siya vanhu lava va titsongahataka, lava va tivekaka ehansi, entiyisweni va ta tumbela evitweni ra Yehovha. Loko ku ri lava va seleke va Israyele, a va nge swi endli leswi swi nga lulamangiki, kumbe va vulavula mavunwa, naswona ririmi ra mano a ri nge kumeki emilon’wini ya vona; hikuva va ta dya kutani va etlela va nava, a ku nge vi na munhu loyi a va chavisaka.”
5 Masalela lama tshembekaka ya le Yuda wa khale a ma ta vuyeriwa. Ha yini? Hikuva ma endle hi ku pfumelelana ni marito lawa: “Lavani Yehovha, n’wina hinkwenu lavo rhula va misava, n’wina lava mi hanyeke hi ku landza xiboho xa Yena xa vuavanyisi. Lavani ku lulama, lavani ku rhula. Kumbexana mi nga tumbetiwa esikwini ra ku hlundzuka ka Yehovha.”—Sofaniya 2:3.
6. Ku humelele yini eku hetisekeni ko sungula ka vuprofeta bya Sofaniya?
6 Eku hetisekeni ko sungula ka vuprofeta bya Sofaniya, Xikwembu xi xupule vanhu va tiko ra Yuda lava pfumalaka ripfumelo hi ku pfumelela Mfumo wa Misava wa Babilona leswaku wu hlula vanhu va xona wu va yisa evuhlongeni hi 607 B.C.E. Van’wana ku katsa na muprofeta Yeremiya va ponile, naswona van’wana va tshame va tshembekile eka Yehovha kwale vuhlongeni. Hi 539 B.C.E., Babilona wu hluriwe hi Vameda ni Vaperesiya ehansi ka Hosi Korexe. Endzhaku ka malembe mambirhi, Korexe u humese xileriso lexi pfumeleleke masalela ya Vayuda ku tlhelela eka rikwavo. Hi ku famba ka nkarhi, tempele ya Yerusalema yi tlhele yi pfuxiwa, nakambe vaprista a va ri exiyin’weni xo dyondzisa vanhu Nawu. (Malakiya 2:7) Kutani Yehovha u endle leswaku masalela lama vuyeke ma humelela—ntsena loko ma tshama ma tshembekile.
7, 8. Xana marito ya vuprofeta lama nga eka Sofaniya 3:14-17 ma tirha eka vamani, naswona ha yini u hlamurisa xisweswo?
7 Sofaniya u profete malunghana ni lava a va ta vuyisiwa, a ku: “Huwelela hi ku tsaka, Wena nhwanyana wa Siyoni! Bana xivuvutana, Wena Israyele! Tsaka, u khana hi mbilu hinkwayo, Wena nhwanyana wa Yerusalema! Yehovha u suse vuavanyisi ehenhla ka wena. U hlongole nala wa wena. Yehovha, hosi ya Israyele, u le xikarhi ka wena. A wu nge he ri chavi khombo. Esikwini rero ku ta vuriwa leswi eka Yerusalema: ‘U nga chavi, Wena Siyoni. Mavoko ya wena ma nga tshuki ma lelemela. Yehovha Xikwembu xa wena u le xikarhi ka wena. U ta ponisa, leswi a nga Lowa matimba. U ta khana ha wena hi ku tsaka. U ta miyela erirhandzwini ra yena. U ta tsaka ha wena hi ku huwelela ka ku tsaka.’”—Sofaniya 3:14-17.
8 Marito wolawo ya vuprofeta a ma kombetela eka masalela lawa a ma ta hlengeletiwa ma huma evuhlongeni bya le Babilona kutani ma tlheriseriwa etikweni ra vakokwa wa wona. Leswi swi hlamuseriwa kahle eka Sofaniya 3:18-20, laha hi hlayaka leswi landzelaka: “‘Kunene [mina Yehovha] ndzi ta hlengeleta lava va nga ni gome, lava nga riki kona enkarhini wa wena wa ntsako; a va vanga kona eka wena, hikwalaho ka ku byarha ndzhukano wa yena. Waswivo, ndzi teka goza ku lwa ni hinkwavo lava va ku xanisaka, enkarhini wolowo; loyi a khutaka ndzi ta n’wi ponisa, loyi a hangalasiweke ndzi ta n’wi hlengeleta. Ndzi ta va veka va va ku dzuneka etikweni hinkwaro ra tingana ta vona. Enkarhini wolowo ndzi ta mi nghenisa, enkarhini lowu ndzi mi hlengeletaka ha wona. Hikuva ndzi ta mi endla mi va ni ndhuma ni ku dzuneka exikarhi ka vanhu hinkwavo va misava, loko ndzi tlhela ndzi hlengeleta lava va nga makhumbi eka n’wina emahlweni ka mahlo ya n’wina,’ Yehovha u vurile.”
9. Xana Yehovha u tiendlele vito malunghana na Yuda hi ndlela yihi?
9 Anakanya ndlela leyi matiko lama nga vaakelani, lawa a ma ri valala va vanhu va Xikwembu a ma ta hlamala ni ku hela matimba ha yona! Vaaki va Yuda a va yisiwe evukhumbini hi tiko ra matimba ra Babilona, ku nga ri na ntshembo wa leswaku va ta vuya. Ku tlula kwalaho, tiko ra vona ri sale ri ri rhumbi. Kambe, hi matimba ya Xikwembu va tlheriseriwe etikweni ra rikwavo endzhaku ka malembe ya 70, kasi matiko lama nga valala va vona a ma langutane ni ndzoviso. Mawaku ndlela leyi Yehovha a tiendleleke vito ha yona hi ku vuyisa masalela wolawo yo tshembeka! U va endle va “va ni ndhuma ni ku dzuneka exikarhi ka vanhu hinkwavo.” Mawaku ndlela leyi ku vuyeteriwa koloko ku tiseke ku dzuneka ha yona eka Yehovha ni le ka lava va byarheke vito rakwe!
Vugandzeri Bya Yehovha Byi Tlakusiwa
10, 11. Hi rini laha vuprofeta bya Sofaniya bya ku vuyeteriwa a byi ta hetiseka hi ndlela leyikulu, naswona hi swi tivisa ku yini leswi?
10 Ku vuyeteriwa kun’wana ku endleke eka lembe-xidzana ro sungula ra Nkarhi wa hina lowu Tolovelekeke loko Yesu a hlengeleta masalela ya Israyele evugandzerini bya ntiyiso. Lawa a ko va masungulo ntsena ya leswa ha taka, hikuva ku hetiseka lokukulu ka ku vuyeteriwa a ka ha ta endleka enkarhini lowu taka. Vuprofeta bya Mikiya byi vule ka ha ri emahlweni byi ku: “Exiphen’wini xo hetelela xa masiku ntshava ya yindlu ya Yehovha yi ta simekiwa yi tiya ehenhla ka tintshava, kunene yi ta tlakuseriwa ehenhla ka switsunga; kutani vanhu va fanele va khitikanela eka yona.”—Mikiya 4:1.
11 Xana leswi a swi ta endleka rini? Hilaha vuprofeta lebyi byi vulaka hakona, a swi ta endleka “exiphen’wini xo hetelela xa masiku”—ina, “emasikwini [lawa] yo hetelela.” (2 Timotiya 3:1) Leswi swi ta endleka mafambiselo lawa yo homboloka ya swilo ma nga si hela, loko matiko ma ri karhi ma gandzela swikwembu swa mavunwa. Mikiya 4:5 yi ri: “Loko ku ri vanhu hinkwavo, un’wana ni un’wana u ta famba hi vito ra xikwembu xakwe.” Naswona ku vuriwa yini hi vagandzeri va ntiyiso? Vuprofeta bya Mikiya bya hlamula: “Kambe loko ku ri hina, hi ta famba hi vito ra Yehovha Xikwembu xa hina hilaha ku nga riki na makumu, hi masiku.”
12. Xana vukhongeri bya ntiyiso byi tlakusiwe njhani emasikwini lawa yo hetelela?
12 Hikwalaho, emasikwini lawa yo hetelela, “ntshava ya yindlu ya Yehovha yi [simekiwe] yi tiya ehenhla ka tintshava.” Ku fana ni ntshava yo leha ngopfu, vugandzeri bya ntiyiso lebyi tlakukeke bya Yehovha byi simekiwe byi tiya ehenhla ka mixaka hinkwayo ya vugandzeri. Hilaha vuprofeta bya Mikiya byi vuleke hakona ka ha ri emahlweni, “vanhu va fanele va khitikanela eka yona.” Naswona lava va hanyaka hi vugandzeri bya ntiyiso va “ta famba hi vito ra Yehovha Xikwembu xa [vona] hilaha ku nga riki na makumu, hi masiku.”
13, 14. Xana misava leyi yi nghene rini “exiphen’wini xo hetelela xa masiku,” naswona ku humelele yini ku sukela hi nkarhi wolowo mayelana ni vugandzeri bya ntiyiso?
13 Swiendlakalo leswi hetisisaka vuprofeta bya Bibele swi kombisa leswaku misava leyi yi nghene “exiphen’wini xo hetelela xa masiku”—masiku ya yona yo hetelela—hi lembe ra 1914. (Marka 13:4-10) Matimu ma kombisa leswaku hi nkarhi wolowo Yehovha u sungule ku hlengeleta masalela yo tshembeka ya vatotiwa, lama nga ni ntshembo wa ku hanya etilweni, a ma hlengeletela evugandzerini bya ntiyiso. Endzhaku ku hlengeletiwe “ntshungu lowukulu . . . wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato”—lowu nga ni ntshembo wa ku hanya emisaveni hilaha ku nga heriki.—Nhlavutelo 7:9.
14 Ku sukela hi Nyimpi yo Sungula ya Misava ku ta fika namuntlha, vagandzeri va Yehovha lava byarhaka vito rakwe va ye emahlweni hi matimba va ri karhi va kongomisiwa hi yena. Ku suka eka magidi ma nga ri mangani endzhaku ka Nyimpi yo Sungula ya Misava, sweswi vagandzeri va Yehovha va kwalomu ka timiliyoni ta tsevu, naswona va hlengeletane emavandlheni ya kwalomu ka 91 000 ematikweni ya 235. Lembe ni lembe, vahuweleri lava va Mfumo va heta tiawara to tlula gidi ra timiliyoni va dzunisa Xikwembu erivaleni. Swi lo dlaa, leswaku Timbhoni ta Yehovha hi tona ti hetisisaka marito ya vuprofeta bya Yesu: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:14.
15. Xana Sofaniya 2:3 yi hetiseka njhani sweswi?
15 Sofaniya 3:17 yi ri: “Yehovha Xikwembu xa wena u le xikarhi ka wena. U ta ponisa, leswi a nga Lowa matimba.” Ku humelela ka malandza ya Yehovha hi tlhelo ra moya loku ma tiphinaka hakona emasikwini lawa yo hetelela, ku vangiwa hi leswi yena ‘a nga exikarhi ka wona’ tanihi Xikwembu xa matimba hinkwawo. Swi ve tano eku kondleteriweni ka tiko ra Yuda ra khale hi 537 B.C.E., naswona swi tano ni namuntlha. Xisweswo hi nga yi vona ndlela leyi Sofaniya 2:3 yi hetisekaka ha yona hi ndlela leyikulu enkarhini wa hina loko yi ku: “Lavani Yehovha, n’wina hinkwenu lavo rhula va misava.” Hi 537 B.C.E., lava katsekaka eka rito leri nge “hinkwenu,” a ku ri masalela hinkwawo ya Vayuda lama vuyeke hi le vuhlongeni bya le Babilona. Sweswi ku katseka vanhu lava titsongahataka va matiko hinkwawo emisaveni hinkwayo, lava angulaka kahle entirhweni wo chumayela hi Mfumo lowu endliwaka emisaveni hinkwayo ivi va khitikanela eka “ntshava ya yindlu ya Yehovha.”
Vugandzeri Bya Ntiyiso Bya Humelela
16. Va nga ha va va titwa njhani valala va hina malunghana ni ku humelela ka malandza ya Yehovha manguva lawa?
16 Endzhaku ka 537 B.C.E., vanhu vo tala va matiko lama nga vaakelani va hlamarisiwe hileswi Xikwembu xi tlheriseleke malandza ya xona etikweni ra rikwavo ni le vugandzerini bya ntiyiso. Kambe ku tlheriseriwa koloko a ku ri kutsongo swinene. Xana u nga anakanya leswaku vanhu va ri yini sweswi—hambi ku ri valala va vanhu va Xikwembu—loko va vona ku andza loku hlamarisaka swonghasi, ku humelela ni ku ya emahlweni ka malandza ya Yehovha ya manguva lawa? A swi kanakanisi leswaku van’wana va valala lava va titwa ku fana ni Vafarisi loko va vona ndlela leyi vanhu va khitikanelaka eka Yesu ha yona. Va te: “Maswivo! Misava ya n’wi landzela.”—Yohane 12:19.
17. Mutsari un’wana u vule yini malunghana ni Timbhoni ta Yehovha, naswona ti andze hi mpimo wo tanihi kwihi?
17 Ebukwini ya yena leyi nge These Also Believe, Profesa Charles S. Braden u te: “Timbhoni ta Yehovha se ti yi hlanganisile misava hinkwayo hi ntirho wa tona wa ku chumayela. Kunene ku nga ha vuriwa leswaku a ku na ntlawa ni wun’we wa vukhongeri emisaveni, lowu kombiseke ku hiseka lokukulu ni ku phikelela eku ringeteni ka ku hangalasa mahungu lamanene ya Mfumo ku tlula Timbhoni ta Yehovha. Swi le rivaleni leswaku ntlawa lowu wu ta ya emahlweni wu kula.” Kunene a a tiyisile! Loko a tsala marito wolawo emalembeni ya 50 lama hundzeke a ko va ni Timbhoni ta kwalomu ka 300 000 ntsena leti a ti chumayela emisaveni hinkwayo. A a ta ku yini namuntlha, laha nhlayo ya vanhu lava chumayelaka mahungu lamanene—yi nga kwalomu ka tsevu wa timiliyoni—yi tlulaka ntsengo wolowo hilaha ku phindhiweke kwalomu ka 20?
18. Ririmi leri tengeke i yini, naswona Xikwembu xi ri nyike vamani?
18 Xikwembu xi tshembisile, hi ku tirhisa muprofeta wa xona xi ku: “Ndzi ta endla leswaku vanhu va hundzukela eka ririmi leri tengeke, leswaku hinkwavo va vitana vito ra Yehovha, va n’wi tirhela hi mbilu yin’we.” (Sofaniya 3:9) Emasikwini lawa yo hetelela, i Timbhoni ta Yehovha leti vitanaka vito ra Yehovha, leti n’wi tirhelaka hi vun’we hi xiboho lexi nga tsemekiki xa rirhandzu—ina, “hi mbilu yin’we.” Hi tona leti Yehovha a ti nyikeke ririmi leri tengeke. Ririmi leri tengeke ri katsa ku wu twisisa kahle ntiyiso malunghana ni Xikwembu ni swikongomelo swa xona. I Yehovha a ri yexe la nga nyikaka ku twisisa koloko hi ku tirhisa moya wakwe lowo kwetsima. (1 Vakorinto 2:10) Xana Yehovha u wu nyika vamani moya wakwe? U wu nyika “lava va [n’wi] yingisaka tanihi mufumi.” (Mintirho 5:32) I Timbhoni ta Yehovha ntsena leti tiyimiseleke ku yingisa Xikwembu tanihi Mufumi eka swilo hinkwaswo. Hi yona mhaka leyi ti kumaka moya wa Xikwembu naswona ti vulavulaka ririmi leri tengeke, ntiyiso malunghana na Yehovha ni swikongomelo swakwe swo hlamarisa. Ti tirhisa ririmi leri ro tenga ku dzunisa Yehovha ha rona emisaveni hinkwayo hi ndlela leyikulu.
19. Ku vulavula ririmi leri tengeke swi katsa yini?
19 Ku vulavula ririmi leri tengeke a swi vuli ku pfumela ntiyiso ni ku wu dyondzisa van’wana ntsena, kambe swi katsa ni ku pfumelelanisa mahanyelo ya wena ni milawu ya Xikwembu ni misinya ya milawu ya xona. Vakreste lava totiweke va rhangerile eku laveni ka Yehovha ni le ku vulavuleni ka ririmi leri tengeke. Anakanya hi leswi hetisisiweke! Hambileswi nhlayo ya vatotiwa yi hungutekeke yi va ehansi ka 8 700, ku ni van’wana va kwalomu ka tsevu wa timiliyoni lava tekelelaka ripfumelo ra vona hi ku lava Yehovha va tlhela va vulavula ririmi leri tengeke. Vanhu lava i nhlayo leyi kulaka ya ntshungu lowukulu lowu humaka eka matiko hinkwawo lowu kombisaka ripfumelo egandzelweni ra nkutsulo ra Yesu, va endla ntirho wo kwetsima exivaveni xa laha misaveni xa tempele ya Xikwembu ya moya, naswona va ta pona ‘nhlomulo lowukulu’ lowu nga ta fika ku nga ri khale emisaveni leyi yi nga riki na vululami.—Nhlavutelo 7:9, 14, 15.
20. Vatotiwa lava tshembekaka swin’we ni ntshungu lowukulu va yimeriwe hi yini?
20 Ntshungu lowukulu wu ta yisiwa emisaveni leyintshwa yo lulama ya Xikwembu. (2 Petro 3:13) Yesu Kreste ni vatotiwa va 144 000 lava pfuxeriweke evuton’wini bya le tilweni leswaku va ya va tihosi ni vaprista swin’we na yena va ta vumba huvo leyintshwa leyi nga ta fuma misava. (Varhoma 8:16, 17; Nhlavutelo 7:4; 20:6) Lava poneke nhlomulo lowukulu va ta tirha hi matimba leswaku va endla misava leyi yi va paradeyisi naswona va ta hambeta va vulavula ririmi leri tengeke leri va ri nyikiweke hi Xikwembu. Marito lama landzelaka ma tirha hi ku kongoma eka vona: “Vana va wena hinkwavo va ta va vanhu lava dyondzisiwaka hi Yehovha, ku rhula ka vana va wena ku ta tala. U ta simekiwa u tiya hi ku lulama.”—Esaya 54:13, 14.
Ntirho Lowukulu Wo Dyondzisa eMatin’wini
21, 22. (a) Hilaha swi kombisiweke hakona eka Mintirho 24:15, i vamani lava nga ta fanela ku dyondzisiwa ririmi leri tengeke? (b) I ntirho wihi wo dyondzisa lowu nga ringanisiwiki na nchumu lowu nga ta endliwa emisaveni loko se ku lawula Mfumo?
21 Ntlawa lowukulu swinene lowu nga ta nyikiwa nkarhi wa ku dyondza ririmi leri tengeke emisaveni leyintshwa hi lowu ku vulavuriwaka ha wona eka Mintirho 24:15, leyi nge: “Ku ta va ni ku pfuxiwa ka lava lulameke ni ka lava nga lulamangiki.” Enkarhini lowu hundzeke, vanhu va magidi ya timiliyoni va hanye va tlhela va fa va nga kumanga vutivi lebyi kongomeke ha Yehovha. U ta va pfuxa hi ndlela leyi hlelekeke. Kutani vanhu volavo lava pfuxiweke va ta fanela ku dyondzisiwa ririmi leri tengeke.
22 Ku ta va lunghelo swinene ku hoxa xandla entirhweni wolowo lowukulu wo dyondzisa! Ku ta va ntirho lowukulu swinene wo dyondzisa ku tlula mintirho hinkwayo yo dyondzisa leyi tshameke yi va kona ematin’wini ya vanhu. Ntirho lowu hinkwawo wu ta endliwa ehansi ka ku fuma lokunene ka Kreste Yesu ematimbeni ya Mfumo. Hikwalaho, hi ku famba ka nkarhi vanhu va ta vona ku hetiseka ka Esaya 11:9, leyi nge: “Misava yi ta tala hi ku tiva Yehovha kukota mati lama funengetaka lwandle.”
23. Ha yini hi nga vulaka leswaku hi ni lunghelo lerikulu leswi hi nga vanhu va Yehovha?
23 Mawaku lunghelo ronghasi leri hi nga na rona emasikwini lawa yo hetelela ra ku lunghekela nkarhi wolowo lowu hlamarisaka loko ku tiva Yehovha ku ta tata misava hakunene! Naswona hi ni lunghelo lerikulu sweswi ra ku va vanhu va Xikwembu, lava vonaka ku hetiseka lokukulu ka marito ya vuprofeta lama tsariweke eka Sofaniya 3:20! Eka tsalwa rolero hi kuma xitiyisekiso xa Yehovha lexi nge: “Ndzi ta mi endla mi va ni ndhuma ni ku dzuneka exikarhi ka vanhu hinkwavo va misava.”
A Wu Ta Hlamurisa Ku Yini?
• Vuprofeta bya Sofaniya bya ku vuyetela byi hetiseke hi ndlela yihi?
• Vugandzeri bya ntiyiso a byi ri karhi byi humelela njhani emasikwini lawa yo hetelela?
• I ntirho wihi lowukulu wo dyondzisa lowu nga ta endliwa emisaveni leyintshwa?
[Swivutiso Swa Dyondzo]
[Xifaniso eka tluka 25]
Vanhu va Yehovha va tlhelele eka rikwavo leswaku va ya vuyetela vugandzeri lebyi tengeke. Xana wa wu tiva nkoka wa leswi namuntlha?
[Swifaniso eka tluka 26]
Hi ku vulavula “ririmi leri tengeke,” Timbhoni ta Yehovha ti byela vanhu rungula leri chavelelaka leri humaka eBibeleni