Nhlengeletano Ya Misava Hinkwayo Leyi Khathalelanaka

HINKWAKO laha tihlo ri vonaka ku fika kona, ku ni vanhu. Vo tala va vona va dyuharile, van’wana va lamarile lerova va tsandzeka ni ku famba. Ku ni vavasati lava tikeke ni mimpatswa leyitsongo leyi nga ni tindzumulo. Hinkwavo i vahlapfa—vavanuna, vavasati ni vana—lava bohekeke ku siya makaya ya vona hikwalaho ka nyimpi ya xin’wana-manana, makhombo ya ntumbuluko kumbe swiyimo swo karhi leswaku va ya lava vutumbelo etikweni leri va akelaneke na rona. Van’wana va sindzisiwe ko tala leswaku va hambana ni makaya ya vona. Loko swi tikomba leswaku ku ta pfuka hasahasa kumbe khombo ra ntumbuluko, va vunga leswi va nga kotaka ku swi rhwala leswaku va ya swi tirhisa, va teka vana va vona kutani va tolovela ndlela va ya laha ku rhuleke. Kutani loko se ri lele, vahlapfa vo tala va tlhelela ematikweni ya rikwavo leswaku va ya pfuxa tiyindlu ta vona ivi va ya emahlweni ni vutomi.

Malembe yo tala lama hundzeke Riphabliki ra Afrika Xikarhi ri amukele vahlapfa lava humaka ematikweni yo tala. Sweswinyana vanhu va magidi, ku katsa ni vo tala lava nga Timbhoni ta Yehovha va boheke ku baleka eDemocratic Republic of Congo leyi hlaseriweke hi nyimpi, va ya endhawini leyi rhuleke ya Riphabliki ra Afrika Xikarhi.

Vamakwerhu Va Pfuneta

Vamakwerhu va le Riphabliki ra Afrika Xikarhi va swi teke ku ri lunghelo ku lunghiselela mphalalo. Vutshamo bya vamakwerhu va Vakreste lava fiketelaka a byi lunghisiwile. Eku sunguleni, ndhawu a yi lunghiseleriwe emitini ya vamakwerhu kambe loko nhlayo ya vahlapfa yi andza, swi ve erivaleni leswaku a ku laveka malunghiselelo man’wana lama engetelekeke. Tiholo ta Mfumo tin’wana ti hundzuriwe tindhawu ta byetlelo. Timbhoni ta kwalaho ti sungule ku nghenisa timboni leti engetelekeke, ti tlhoma tiphayiphi ta mati ni ku semendhela ehansi leswaku lava nga ta rhurheriwa kwalaho va ta tshama kahle. Vahlapfa lava va tirhe swin’we ni vamakwerhu va ndhawu yoleyo leswaku va simeka tindhawu leti ta xinkarhana. Nongonoko lowu heleleke wa minhlangano ya Vukreste wu lunghiseleriwile hi Xilingala leswaku hinkwavo lava fikaka va phameriwa swakudya swa moya leswi nyikaka vutomi. Ku khomisana loku a ku ri kona exikarhi ka Timbhoni ta kwalaho swin’we ni vaendzi va vona ku kombise leswaku vumakwerhu bya misava hinkwayo i bya xiviri.

Mindyangu ya vahlapfa a yi nga tali ku fika hi nkarhi wun’we. Minkarhi yin’wana swirho swa ndyangu leswi hambanisiweke swi tlhele swi hlangana loko se swi fike laha a swi ya kona. Nhlayo  ya lava fikeke va hlayisekile yi hlayisiwe eHolweni yin’wana ni yin’wana ya Mfumo. Malunghiselelo ma endliwile leswaku ku laviwa lava ha lahlekeke. Hofisi ya rhavi leyi kongomisaka ntirho wa Timbhoni ta Yehovha etikweni rero yi rhumele timovha tinharhu hi siku, leswaku ti ta pfuna Timbhoni leti ta ha riki endleleni ni ku lava un’wana ni un’wana loyi swi nga endlekaka leswaku u lahlekile. Timovha a ti voniwa hi bodo leyikulu leyi nge “WATCH TOWER —Timbhoni ta Yehovha.”

Wa nga ehleketa leswi a va tsakise xiswona vana va nkombo va vahlapfa lava a va hambanisiwe ni vatswari va vona loko va vona xibebe xa Timbhoni ta Yehovha. Hi ku hatlisa va tsutsumele emovheni wolowo va ri karhi va vula leswaku na vona i Timbhoni. Vamakwerhu va va khandziyise exibebeni kutani va va yisa eHolweni ya Mfumo, laha hi ku famba ka nkarhi va hlanganisiweke ni va rikwavo.

Xana i yini lexi pfuneke Vakreste lava va xiviri ku langutana ni swiyimo swo tano, ko tala? Va tiyiseka hi ku helela leswaku hi hanya eminkarhini ya makumu leyi vuriweke ka ha ri emahlweni eMatsalweni yo Kwetsima.—2 Timotiya 3:1-5; Nhlavutelo 6:3-8.

Hikwalaho va swi tiva leswaku Yehovha Xikwembu ku nga ri khale, u ta herisa tinyimpi, rivengo, madzolonga ni mpfilumpfilu. Ku va muhlapfa, a swi nge he vi kona. Swa sweswi, hi ku pfumelelana ni xikhutazo xa muapostola Pawulo lexi nga eka 1 Vakorinto 12:14-26, Timbhoni ta Yehovha ti tiyimisele ku hlayisana. Hambiloko ti hambanisiwile hi milambu, mindzilakano, tindzimi ni mimpfhuka, ti karhateka hi vamakwavo, kutani ti yima hi milenge mimbirhi loko un’wana a swerile.—Yakobo 1:22-27.

[Mepe eka tluka 30]

(Leswaku u swi vona kahle, pfula nkandziyiso hi woxe)

AFRIKA

Riphabliki Ra Afrika Xikarhi

Democratic Republic of Congo

[N’wini wa Xifaniso]

Mountain High Maps® Copyright © 1997 Digital Wisdom, Inc.

[Swifaniso eka tluka 30]

Tiholo ta Mfumo tinharhu ti hundzuriwe tindhawu to amukela vaendzi

[Xifaniso eka tluka 31]

Swilo swo sweka swi lulamisiwile hi xihatla

[Xifaniso eka tluka 31]

Vo tala va fiketerile

[Swifaniso eka tluka 31]

Wa ha ku tswariwa kambe se i muhlapfa