Wa Tsundzuka Xana?

Xana u swi tlangerile ku hlaya minkandziyiso ya sweswinyana ya Xihondzo xo Rindza? Kutani, a hi vone loko u ta swi kota ku hlamula swivutiso leswi landzelaka:

• Eka Varhoma 5:3-5, ha yini muapostola Pawulo a veka ntshembo emakumu ka nxaxamelo wolowo?

Pawulo u xaxamete swilo leswi Vakreste va langutanaka na swona—nhlomulo, ku tiyisela, xiyimo xa ku amukeriwa ni ntshembo. “Ntshembo” lowu a hi ntshembo wo sungula lowu munhu a wu kumaka eBibeleni, kambe i ntshembo lowu tiyisiweke, lowu enteke, lowukulu lowu Mukreste a nga vaka na wona hi ku famba ka nkarhi.—12/15, matluka 22, 3.

• Ha yini Mukreste namuntlha a nga tsakisiwaka hi mintlangu yo tsutsuma leyi a yi khomeriwa le Grikiya wa khale?

Ku twisisa xiyimo ni mikhuva ya mintlangu yoleyo swi nga hi voningela eka tindzimana to hlayanyana ta Bibele. Tin’wana ti vulavula hi ku ‘hlanganyela hi ku ya hi milawu,’ ‘ku hluvula ntiko wun’wana ni wun’wana ni ku languta eka xikombiso xa hina Yesu,’ ‘ku tsutsuma u ya fika emakumu’ ivi u kuma harhi, kumbe hakelo. (2 Timotiya 2:5; 4:7, 8; Vaheveru 12:1, 2; 1 Vakorinto 9:24, 25; 1 Petro 5:4)—1/1, matluka 28-30.

• I ndlela yihi leyintshwa yo chumayela mahungu lamanene leyi sunguriweke hi January 1914?

Hi nkarhi wolowo ku humesiwe “Photo-Drama of Creation.” A yi ri ni swiyenge swa mune leswi nga ni swifaniso leswi tshukatshukaka ni madzana ya ti-slide ta mivalavala, leti to tala ta tona a ti fambisana ni tinkulumo leti rhekhodiweke hi gramafoni. Ku lunghiseleriwe tisete ta 20 ta Drama leyi naswona a ti tirhisiwa swinene leswaku ku dyondzisiwa vanhu rungula ra Bibele.—1/15, matluka 8, 9.

• Huvo leyi Fumaka yi hambana njhani ni vandla ra swa nawu?

Hambileswi vakongomisi va vandla ra swa nawu va hlawuriwaka hi swirho swa rona, Huvo leyi Fumaka a yi hlawuriwi hi munhu wo karhi kambe yi hlawuriwa hi Yesu Kreste. A swi bohi leswaku vakongomisi va mavandla yo hambana-hambana lama tirhisiwaka hi Timbhoni ta Yehovha va va swirho swa Huvo leyi Fumaka. Eka nhlangano wa sweswinyana wa lembe na lembe wa Watch Tower Bible and Tract Society of Pennsylvania, swirho swa Huvo leyi Fumaka leswi a swi ri vakongomisi swi tshike hi ku tirhandzela mintirho ya swona. Swivandla swa vona swi siviwe hi vamakwerhu lava wupfeke va “tinyimpfu tin’wana.” (Yohane 10:16) Hikwalaho Huvo leyi Fumaka yi nga tirhisa nkarhi wo tala yi lunghisela swakudya swa moya yi tlhela yi khathalela swilaveko swa moya swa vamakwerhu emisaveni hinkwayo.—1/15, matluka 29, 31.

• I swikombiso swihi swimbirhi swa le Bibeleni leswi hi nga swi kambisisaka leswaku hi dyondza ndlela yo langutana ni ku hela matimba?

Xo sungula i Hana, mana wa Samuwele. A a ta va a hele matimba loko a hehliwe hi Eli muprista lonkulu wa le Israyele. Ku ri na sweswo, u n’wi hlamusele ntiyiso hi ku kongoma ni hi xichavo. Ku tlula kwalaho, Hana a nga khomanga Eli hi mbilu. Xa vumbirhi i Marka, loyi a a fanele a hele matimba loko muapostola Pawulo a nga lavi ku famba na yena eriendzweni ra vurhumiwa. Ku ri na ku tshikileleka hi ku lahlekeriwa hi lunghelo leri, u hambete a hiseka evutirhelini a famba na Barnaba.—2/1, matluka 20-2.

• Ha yini Vakreste va fanele va va ni vukheta malunghana ni ku nyika van’wana, kumbe ku amukela tiprogreme ta khompyuta leti kopiweke?

Tiprogreme to tala ta khompyuta (ku katsa ni mintlangu) ti ni layisense leyi pfumelelaka n’wini kumbe mutirhisi wa yona ku hoxa progreme yoleyo eka khompyuta yin’we. Hakanyingi ku endlela van’wana tikopi i ku tlula nawu wa mpfumelelo wa ntsariso, hambiloko hi va nyika mahala. Vakreste va fanele va yingisa nawu lowu nge, ‘va tlherisela swilo swa Khezari eka Khezari.’ (Marka 12:17)—2/15, matluka 28, 9.

• A ku ri mani Cyril na Methodius, naswona va hoxe xandla hi ndlela yihi eka dyondzo ya Bibele?

A va ri vamakwavo lava velekiweke le Tesalonika, eGrikiya, hi lembe-xidzana ra vukaye. Va sungule tsalwa ra voko ra Xislavic ivi va hundzuluxela kwalomu ka Bibele hinkwayo hi Xislavoniki.—3/1, matluka 28, 9.

• Xana marito lama nge “ku anakanya swa moya” ma vula yini?—Varhoma 8:6.

Ma vula ku lawuriwa ni ku susumetiwa hi matimba lama tirhaka ya Yehovha. Hi nga pfumelela moya wa Xikwembu wu tirha eka hina hi ku hlaya ni ku dyondza Bibele, hi ku yingisa milawu ya Xikwembu hi mbilu hinkwayo ni hi ku khongelela moya wa Xikwembu.—3/15, tluka 15.

• Hi nga endla yini loko hi titwa onge a hi twisisiwi kahle?

I swa nkoka ku lava ku andlala mhaka hi moya wa rirhandzu. Loko sweswo swi nga tirhi, u nga heli matimba. Kombela ku twisisa ni mpfuno eka Yehovha, loyi ‘a pimanyetaka timbilu.’ (Swivuriso 21:2; 1 Samuwele 16:7)—4/1, matluka 21-3.