Xiviko Xa Vahuweleri Va Mfumo

Xisandzu Xi Susiwa Eka Vito Ra Xikwembu

RITO ra Xikwembu ku nga Bibele ri ri: “Hlayisani ku tikhoma ka n’wina ku ri kunene exikarhi ka matiko, leswaku, eka leswi va mi lumbetaka ha swona onge hi loko mi ri vaendli va leswo biha, va dzunisa Xikwembu hi siku ra ku kambela ka xona hikwalaho ka mintirho leyinene ya n’wina leyi va nga timbhoni leti yi voneke hi mahlo.” (1 Petro 2:12) Hikokwalaho Vakreste va ntiyiso va endla matshalatshala yo tshama va ri ni mahanyelo lamanene leswaku va ta papalata ku tisa ndzhukano evitweni ra Yehovha.

Ematiko-xikaya ya Zambia le Senanga mudyondzisi wa xikolo u yiveriwe xiya-ni-moya endlwini yakwe. Tanihi leswi Timbhoni ta Yehovha a ti chumayela endhawini yoleyo, wanuna loyi u ti hehle hi leswaku hi tona ti nga xi yiva. U ye a ya mangala emaphoriseni, a vula leswaku Timbhoni ti yive xiya-ni-moya xa yena. Ku tiyisekisa leswaku Timbhoni a ti ri endlwini ya yena, u humese xiphephana lexi a xi kumeke ehansi. Hambiswiritano, maphorisa a ma n’wi tshembanga. Ma n’wi lerise ku famba a ya endla vukambisisi lebyi engetelekeke.

Timbhoni leti a ti tirha laha ku tshamaka mudyondzisi loyi, ti khutaziwe hi huvo ya vakulu leswaku ti ya vulavula ni mudyondzisi loyi malunghana ni mhaka leyi. Van’wana va vamakwerhu va yile va ya vulavula na yena, va n’wi hlamusela leswaku va lava ku susa xisandzu evitweni ra Yehovha. Loko va ri karhi va vulavula, va n’wi byele leswaku va kume jaha endlwini ya yena kutani va ri nyika xiphephana. Leswi va nga ri hlamuserisa xiswona jaha ra kona, mudyondzisi u kote ku ri tsundzuka kahle. Entiyisweni a va nghena kereke yin’we. Mudyondzisi u vulavule ni jaha leri kambe ri nantswe tilo ri ala leswi a ri hehliwa ha swona. Kutani mudyondzisi u vulavule ni vatswari va jaha leri kutani a tlhelela ekaya. Ku nga si hela ni awara mana wa jaha leri u tlherisele xiya-ni-moya lexi yiviweke.

Hi ku tivona nandzu, mudyondzisi u ye eka huvo ya vakulu kutani a kombela ndzivalelo hi leswi a va hehleke hi mavunwa. Vakulu va xi amukerile xikombelo xa yena xo rivaleriwa kambe va kombele leswaku vuyelo lebyi byi tivisiwa tiko leswaku un’wana ni un’wana a ta swi tiva leswaku Timbhoni a ti nga khumbeki emhakeni leyi. Xitiviso xi endliwile exikolweni, ivi ku susiwa xisandzu evitweni ra Yehovha. Timbhoni ta Yehovha ti nga hambeta ti chumayela hi ku ntshunxeka endhawini yoleyo.

[Mimepe/Xifaniso eka tluka 19]

(Leswaku u swi vona kahle, pfula nkandziyiso hi woxe)

AFRIKA

Zambia

[N’wini wa Xifaniso]

Mountain High Maps® Copyright © 1997 Digital Wisdom, Inc.