Xiviko Xa Vahuweleri Va Mfumo

Swilaveko Swa Yena Swa Moya Swi Enerisiwile

KIPRA i xihlala xa le n’walungu-vuxa bya yinhla ya Lwandle ra Mediteraniya. Eminkarhini ya Bibele, Kipra a wu tiveriwa koporo ni timhandzi ta wona ta ntikelo. Pawulo na Barnaba va huwelele mahungu lamanene ya Mfumo hi nkarhi wa riendzo ra vona ro sungula ra vurhumiwa. (Mintirho 13:4-12) Namuntlha, mahungu lamanene ma ha pfuna evuton’wini bya vanhu vo tala va le Kipra. Hakunene leswi swi ve tano hi Lucas, wanuna la nga ni malembe ya va-40. Wa vika:

“Ndzi tswaleriwe endyangwini wa vana va nkombo, epurasini ra tihomu. Ku sukela evutsongwanini a ndzi ri ni torha ro hlaya. Buku leyi a ndzi yi rhandza swinene a ku ri buku leyi kotaka ku nghena exikhwameni ya Matsalwa Ya Vukreste Ya Xigriki. Loko ndzi ri ni malembe ya khume, mina ni vanghana va mina hi vumbe ntlawa wutsongo wa dyondzo ya Bibele. Hambiswiritano, a wu tlhaveriwanga hi dyambu hikuva vanhu van’wana lavakulu emugangeni wa ka hina a va hi vitana vaxandzuki.

“Endzhakunyana, loko ndzi ri exikolweni eUnited States, ndzi hlangane ni vanhu va vukhongeri byo tala. Sweswo swi tlhele swi pfuxa ku navela ka mina swilo swa moya. Ndzi hete masiku yo tala elayiburari ya le yunivhesiti ndzi ri karhi ndzi hlaya hi ta vukhongeri byo hambana-hambana. Ndzi tlhele ndzi endzela tikereke to tala, kambe ku nga khathariseki matshalatshala ya mina, a ndzi nga si eneriseka hi tlhelo ra moya.

“Loko ndzi heta tidyondzo ta mina, ndzi tlhelele eKipra kutani ndzi kuma ntirho wo va mukongomisi wa laboratori ya vutshunguri. Mukhalabye loyi vito ra yena ku nga Antonis, la nga Mbhoni ya Yehovha, a tala ku ndzi endzela entirhweni. Maendzo ya yena ma lemukiwe hi vanhu va Kereke ya Greek Orthodox.

“Ku nga ri khale mufundhisi u te eka mina kutani a ndzi byela leswaku ndzi nga vulavuli ni Timbhoni ta Yehovha. Tanihi leswi a ndzi dyondzisiwe leswaku Kereke ya Greek Orthodox yi ni ntiyiso, ndzi pfumelelane na yena kutani ndzi byela Antonis leswaku a tshika ku ndzi endzela, kutani ndzi sungula ku bula hi Bibele ni mufundhisi. Ndzi tlhele ndzi endzela tiyindlu to tala ta tinghwendza le Kipra. Ndzi kale ndzi ya ni le n’walungu wa Grikiya kutani ndzi endzela Ntshava ya Athos, leyi tekiwaka tanihi ntshava yo kwetsima swinene etikweni ra Vakreste va Orthodox. Hambiswiritano, swivutiso swa mina swa Bibele a swi nga si hlamuleka.

“Kutani ndzi khongele eka Xikwembu leswaku xi ndzi pfuna ndzi kuma ntiyiso. Endzhakunyana ka sweswo Antonis u ndzi endzerile nakambe entirhweni kutani ndzi swi vona leswaku leyi a ku ri nhlamulo ya xikhongelo xa mina. Kutani ndzi tshike ku burisana ni mufundhisi kutani ndzi sungula ku dyondza Bibele na Antonis. Ndzi hambete ndzi endla nhluvuko kutani hi October 1997, ndzi kombise ku tinyiketela ka mina eka Yehovha hi nkhuvulo wa mati.

“Nsati wa mina ni vana va hina vambirhi lavakulu va vanhwanyana, un’wana a ri na 14 wa malembe kasi lowun’wana a ri na khume hi nkarhi wolowo a va nga tsakeli. Kambe hikwalaho ka mahanyelo ya mina lamanene, nsati wa mina u anakanye ku ya enhlanganweni eHolweni ya Mfumo. Wu n’wi tsakise swinene musa wa Timbhoni ni xinghana lexi a xi voneke. Lexi n’wi tsakiseke ngopfu i ndlela leyi ti tirhisaka Bibele ha yona. Hikwalaho ka sweswo nsati wa mina ni vana va mina lavakulu vambirhi va vanhwanyana va pfumele ku dyondza Bibele ni Timbhoni ta Yehovha. Wa nga vona ntsako lowu a ndzi ri na wona loko havanharhu ka vona va khuvuriwa eNtsombanweni wa Muganga wa “Rito ra Xikwembu ra Vuprofeta” hi 1999!

“Ina ku lavisisa ka mina ntiyiso ku enerisiwile. Sweswi ndyangu hinkwawo, ku katsa ni nsati wa mina ni vana va hina va mune hi gandzela swin’we evugandzerini byo tenga bya Yehovha.”