Tsakani Hi Ntshembo Wa Mfumo!

A KU ri nkarhi lowu tsakisaka swinene lowu a wu hlanganise vanhu va 5 784 hi March 10, 2001, etindhawini tinharhu leti tirhisiwaka hi ndyangu lowukulu wa Bethele le Dorobeni ra New York. A ku ri xiendlakalo xa ku thwasa ka ntlawa wa vu-110 wa xikolo xa vurhumiwa xa Gilead.

Carey Barber, xirho xa Huvo leyi Fumaka ya Timbhoni ta Yehovha, u amukele hinkwavo kutani a sungula xiyimiso hi ku vula leswi: “Swa hi tsakisa ku tiva leswaku swichudeni swa mintlawa ya 110 swa le Gilead se swi leteriwile leswaku swi ya va varhumiwa ni ku averiwa etinsin’wini to hambana-hambana emisaveni hinkwayo.”

Ndlela Yo Tshama U Tsakile

Endzhaku ka marito yo pfula ya Makwerhu Barber, Don Adams u vulavule ni ntshungu, ku katsa ni swichudeni leswi thwasaka swa 48, hi xihloko lexi nge, “Mikateko ya Yehovha Ya Hi Fuwisa.” Leswi a a sekele nkulumo ya yena eka Swivuriso 10:22, u tsundzuxe vayingiseri leswaku Yehovha u tiyisa malandza ya yena ni ku katekisa loko ma rhangisa swilaveko swa Mfumo evuton’wini bya wona. U khutaze swichudeni ku amukela swiavelo swa swona leswintshwa hi moya lowu fanaka ni lowu muapostola Pawulo a wu kombiseke loko a rhamberiwa ku ‘pelela eMakedoniya a ta pfuna.’ (Mintirho 16:9) Hambileswi a ku ri ni swiphiqo leswi a fanele a swi hlula, ku tiyimisela ka Pawulo ku chumayela laha a kombiweke kona swi endle leswaku a kuma mikateko yo tala leyi tsakisaka.

Ntlawa wa mathwasana wu hete tin’hweti ta ntlhanu wu dyondza Bibele ni ku leteriwa ntirho wa vurhumiwa. Hambiswiritano, Daniel Sydlik, xirho xa Huvo leyi Fumaka ya Timbhoni ta Yehovha, u va khutaze ku ya emahlweni va va vadyondzi. Loko a vulavula hi xihloko lexi nge “Vanani Vadyondzisiwa Va Ntiyiso,” u te: “Ku va mudyondzisiwa swi vula ku hambeta u yingisa marito ya Yesu. Swi katsa ku tiyimisela ka hina ku hambeta hi yingisa marito ya yena, rungula ra yena ni dyondzo ya yena.” U kandziyise yinhla ya leswaku vadyondzisiwa va Kreste a va endli xiboho va nga yingisanga rito ra N’wini wa vona; vutlhari bya Xikwembu byi boheleriwe evuton’wini bya Kreste. (Vakolosa 2:3) A nga kona eka hina loyi a nga twaka marito ya Yesu kan’we kutani a gimeta hi leswaku u tiva hinkwaswo malunghana na yena, kutani Makwerhu Sydlik u khutaze mathwasana ku hambeta ma dyondza, ma tirhisa ni ku dyondzisa ntiyiso wa Vukreste lowu yisaka entshunxekweni.—Yohane 8:31, 32.

Leswaku a tshama a tsakile entirhweni wa Xikwembu, munhu u fanele a tiyimisela ku amukela ku tshinyiwa ni ku tsundzuxiwa. “Xana Tinso Ta N’wina Ti Ta Mi Ololoxa?” i xivutiso lexi tlakusiweke hi muleteri wa le Gilead ku nga Lawrence Bowen. U kombise leswaku eBibeleni tinso to fanekisela ti fanisiwa ni mianakanyo leyi dzikeke ni mintlhaveko. Yi nga pfuna ku ololoxa munhu loko xitsundzuxo lexi huhuteriweke lexi humaka eRitweni ra Xikwembu xi fikelele endzeni-ndzeni ka munhu. (Pisalema 16:7; Yeremiya 17:10) Ku hanya vutomi byo tshembeka swi nga khumba na Yehovha hi ndlela leyi enteke. Endzhaku ko hlaya Swivuriso  23:15, 16 xivulavuri xi vutisile: “Xana tinso ta n’wina ti ta mi ololoxa?” U engeterile: “Hi khongelela leswaku ti mi ololoxa kutani mi ta endla leswaku Yehovha a tsaka swinene embilwini ya yena. Mi ta khumba mintlhaveko ya yena leyi enteke. Ina, mi ta endla tinso ta Xikwembu ti tsaka loko mi hambeta mi namarhela swiavelo swa n’wina hi ku tshembeka.”

Nkulumo yo hetelela eka xiyenge lexi yi nyikele hi Mark Noumair, loyi a a ri murhumiwa eKenya emahlweni ko va muleteri eGilead. Nkulumo ya yena leyi a yi ku “Swa Antswa Ku Vona Hi Mahlo” yi kandziyise nkoka wo hlakulela ku eneriseka. Hi ku pfumelelana na Eklesiasta 6:9 Makwerhu Noumair u khutazile: “Amukela xiyimo leswi xi nga xi swona. Sweswo i ‘ku vona hi mahlo.’ Ematshan’wini yo lorha hi swilo leswi u lavaka ku swi endla kambe u nga swi endli, tikarhatele ku endla leswi nga ematimbeni ya wena hi xiyimo xa wena xa sweswi. Ku hanya etikweni ra milorho, u langutela swilo leswi nga kotekiki, kumbe u tshamela ku ehleketa hi swilo leswi nga riki swinene exiavelweni xa wena swi to ku endla leswaku u nga eneriseki naswona u nga tsaki.” Ina, ku nga khathariseki leswaku hi le kwihi kumbe hi langutane ni swiyimo swa njhani, ku hlakulela ku eneriseka loku nga ni vukwembu eka swiyimo leswi hi langutanaka na swona swi tisa moya wa ntsako eku tirheleni ka Muvumbi wa hina Lonkulu.

Mintokoto Leyi Tsakisaka eNtirhweni Wa Mfumo Ni Le Gilead

Endzhaku ka ndzayo yoleyo leyi twisisekaka ya tinkulumo, swichudeni swi hlamusele mintokoto  leyi swi yi tsakeleke ensin’wini hi nkarhi wa dyondzo ya swona ya tin’hweti ta ntlhanu. Hi ku lerisiwa hi Wallace Liverance, loyi a nga yena muamukeri wa swichudeni swa Xikolo xa Gilead, swichudeni leswi thwaseke swi hlamusele ndlela leyi swi tibumabumeleke ha yona leswaku i vatirheli va Xikwembu. (2 Vakorinto 4:2) Swi kote ku koka rinoko ra ripfalo ra van’wana leri va ri nyikeke hi Xikwembu. Mintokoto ya swichudeni yi kombise ndlela leyi tidyondzo ta Bibele ti sunguriweke ha yona ni vanhu va timbilu letinene lava swi hlanganeke na vona eswitarateni, evutirhelini bya yindlu ni yindlu ni le tindhawini tin’wana. Minkarhi yo hambana-hambana, vanhu lava tsakelaka va vule leswaku tibuku leti sekeriweke eBibeleni ta nhlengeletano ya Yehovha ti ni nhlamuselo ya ntiyiso. N’wini wa muti un’wana u yi tsakele swinene ndzimana ya Bibele. Sweswi u dyondza Bibele ni Timbhoni ta Yehovha.

Ku landzele Joel Adams, a burisana ni mathwasana ya le Gilead ya khale. Xihloko xa yena a xi ku “U Nga Tshuki U Tshika Ku Dyondza, U Nga Tshuki U Tshika Ku Tirhela Yehovha.” Lava ku buriweke na vona a va ri ni ndzayo leyi nga enkarhini eka varhumiwa lavantshwa. Loko a vulavula hi ta masiku ya yena tanihi xirho xa ntlawa wa vu-26 xa Gilead, Harry Johnson u te: “Hi dyondzisiwe leswaku Yehovha nkarhi na nkarhi u kongomise vanhu va yena naswona u ta hambeta a va kongomisa. Ntshembo wolowo wu ve xikhutazo emalembeni lawa hinkwawo.” William Nonkes, xirho xa ntlawa wa vu-53 xa Gilead, u tsundzuxe mathwasana a ku: “Xa nkoka swinene, tshamani mi ri karhi mi tsundzuka misinya ya milawu ya Bibele kutani mi yi tirhisa eka swiboho hinkwaswo leswi mi faneleke mi swi endla evuton’wini sweswi ni hilaha ku nga heriki. Hikwalaho ka sweswo mi ta swi kota ku tshama exiavelweni xa n’wina kutani mikateko ya Yehovha leyi fuweke yi ta mi nela.”

Richard Rian u hlawule xihloko lexi nge, “Ku Hlomiseriwa Ku Hetisisa Ku Rhandza Ka Yehovha.” Un’wana wa lava ku vulavurisaniweke na vona a ku ri John Kurtz, thwasana ra ntlawa wa vu-30, loyi a heteke malembe ya 41 a ri murhumiwa eSpaniya. Loko a vutisiwa hi tidyondzo ta le Gilead, Makwerhu Kurtz u te: “Buku-nkulu i Bibele. Kutani hi ni tibuku-mpfuno ta Bibele leti hi pfunaka ku twisisa Bibele. Un’wana ni un’wana u na tona. A ku na rungula ra xihundla leri kumiwaka eGilead. A ndzi kalanga ndzi nga wu pfala nomu ndzi kandziyisa sweswo hikuva hinkwavo va ni rungula leri, emavokweni ya vona, leri nyikeriwaka le Gilead.”

Makwerhu Gerrit Lösch, xirho xa Huvo leyi Fumaka ya Timbhoni ta Yehovha, u katsakanye xiyimiso lexi xa swa moya hi ku vulavula hi xihloko lexi nge “Ku Va eTimpapeni Ta Yehovha Ni Le Hansi Ka Tona.” U hlamusele ndlela leyi nsirhelelo wa Xikwembu ni nseketelo wa malandza ya xona lama tshembekaka swi fanisiwaka kahle ha yona eBibeleni ni timpapa ta gama. (Deteronoma 32:11, 12; Pisalema 91:4) Gama lerikulu minkarhi yin’wana ri pfula timpapa ta rona nkarhi wo leha leswaku ri sirhelela mavondlo ya rona. Minkarhi yin’wana gama leri nga manana ri nga ha funengeta mavondlo ya rona hi timpapa ta rona leswaku ri ma sirhelela exirhamini. Hi ndlela leyi fanaka, hi ku pfumelelana ni xikongomelo xa yena, Yehovha a nga pfuna malandza ya yena lama tshembekaka, ngopfu-ngopfu loko ma langutane ni ndzingo wa swa moya. Yehovha a nga pfumeleli malandza ya yena ma ringiwa hi ndlela leyi tlulaka leswi ma nga swi tiyiselaka kambe u endla swi koteka leswaku ma kota ku tiyisela. (1 Vakorinto 10:13) Makwerhu Lösch u gimete hi ku: “Leswaku hi tshama hi sirhelelekile hi tlhelo ra moya, hi fanele hi tshama ehansi ka timpapa ta Yehovha. Leswi swi vula leswaku a hi fanelanga hi hlakulela moya wo tifuma. A hi tshameni hi ri kusuhi na Yehovha ni nhlengeletano ya yena leyi fanaka ni manana, hi nga tihambanisi ni nkongomiso wa yena ni ndzayo ya yena ya rirhandzu.”

Mutshama-xitulu u hlaye ti-thelegiramu ni marungula lama va navelelaka leswinene lama humaka emisaveni hinkwayo. Kutani ku fika nkarhi wa ku humesiwa ka tidiploma. Xikongomelo xa ku sunguriwa ka Xikolo xa Gilead, a ku ri leswaku ku va ni tidyondzo ti nga ri tingani eka malembe ya ntlhanu ntsena. Kambe ku ringana malembe ya 58 Yehovha Xikwembu u hambete a hlayisa xikolo lexi xi ri karhi xi tirha. Hilaha Makwerhu Barber a vuleke hakona eku sunguleni: “Mayana rhekhodo leyi endliweke hi mathwasana ya le Gilead ku sukela hi 1943 loko ku pfuriwa Gilead! Matshalatshala ya vona loko ma hlanganile ma endle leswaku ku engeteriwa vanhu lava titsongahataka va madzana ya magidi va misava hinkwayo enhlengeletanweni ya Yehovha leyi kwetsimaka.” Ina, xikolo lexi xa vurhumiwa xi pfune timiliyoni leswaku ti va ni ntsako wa ntshembo wa Mfumo.

[Bokisi eka tluka 24]

TINHLAYO TA NTLAWA

Nhlayo ya matiko lama yimeriweke: 8

Nhlayo ya matiko lawa va averiweke eka wona: 18

Nhlayo ya swichudeni: 48

Xiringaniso xa malembe: 34

Xiringaniso xa malembe entiyisweni: 18

Xiringaniso xa malembe evutirhelini bya nkarhi hinkwawo: 13

[Xifaniso eka tluka 25]

Ntlawa Wa Vu-110 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.