Swivutiso Swa Vahlayi

Vakolosa 1:16 yi vulavula hi N’wana wa Xikwembu leswaku “swilo leswin’wana hinkwaswo swi tumbuluxiwe ha yena naswona swi tumbuluxeriwe yena.” Xana swilo hinkwaswo swi “tumbuluxeriwe” N’wana wa Xikwembu, Yesu hi mongo wihi?

Yehovha u tirhise N’wana la tswariweke a ri swakwe tanihi mutirhi la nga ni vuswikoti eku tumbuluxeni ka swilo hinkwaswo leswin’wana, hi leswaku, swilo hinkwaswo handle ka Yesu hi byakwe. (Swivuriso 8:27-30; Yohane 1:3) Kutani ke, N’wana u kuma ntsako hi mintirho leyi, naswona hi mongo lowu swi “tumbuluxeriwe” yena.

Ha swi tiva leswaku vatswari lava nga vanhu va swi langutela, naswona hakanyingi va kuma ntsako lowukulu hi leswi va swi tswalaka—ku nga vana va vona. Xisweswo, xivuriso xa Bibele xi vulavula hi ‘n’wana la tsakisaka tata wakwe.’ (Swivuriso 3:12; 29:17) Hilaha ku fanaka, Yehovha Xikwembu u kume ntsako eIsrayele loko vanhu vakwe va tshembekile. (Pisalema 44:3; 119:108; 147:11) U tlhela a tsakisiwa hi vutshembeki bya lava n’wi rhandzaka enkarhini wa hina.—Swivuriso 12:22; Vaheveru 10:38.

Kutani, a swi fanerile leswaku Xikwembu xi endla mutirhi-kulobye wa xona,Yesu, a tsaka hi leswi a swi endleke. Entiyisweni, Swivuriso 8:31 yi vula leswaku N’wana a a ‘tsakile hikwalaho ka tiko leri noneke ra misava yakwe, naswona swilo leswi a swi rhandza a swi ri ni vana va vanhu.’ Hi mongo lowu Vakolosa 1:16 yi ri: “Swilo leswin’wana hinkwaswo swi tumbuluxiwe ha yena naswona swi tumbuluxeriwe yena.”