Xilotlelo Xa Ku Ya eMisaveni Ya Ntsako

MAGAZINI wa Time wu te: “Munhu la veke ni nkucetelo lowukulu—ku nga ri eka magidi ya malembe mambirhi ntsena kambe eka matimu ya munhu hinkwawo—a ku ri Yesu wa Nazareta.” Loko Yesu a ha ri emisaveni, vanhu va magidi lava nga ni timbilu letinene, a va xiyanga ntsena matimba yakwe, kambe va xiye ni ndlela leyi a a khathala ha yona hi vanhu van’wana. Kutani a swi hlamarisi leswi a va lava ku n’wi endla hosi. (Yohane 6:10, 14, 15) Hambiswiritano, Yesu u arile ku nghenelela eka politiki, hilaha swi boxiweke hakona exihlokweni lexi hundzeke.

NHLAMULO ya Yesu a yi sekeriwe eka tinhla tinharhu: langutelo leri Tata wakwe a nga na rona hi lunghelo ra munhu ra ku tihlawulela, leswi katsaka mfumo wa munhu; ku va Yesu a xiye leswaku ku ni mimoya ya matimba leyi nga vonakiki, leyi lwisanaka ni matshalatshala lamanene ya mfumo wa munhu; ni xikongomelo xa Xikwembu xo simeka hulumendhe ya le tilweni leyi nga ta fuma misava hinkwayo. Loko hi ri karhi hi kambisisa tinhla letinharhu hi vurhon’wana, hi ta swi vona leswaku ha yini munhu a tsandzekile ku endla leswaku misava leyi yi va yo antswa. Hi ta tlhela hi vona leswaku misava leyi yi ta lulamisiwa hi ndlela yihi.

Xana Vanhu Va Nga Swi Kota Ku Tifuma?

Loko Xikwembu xi vumba vanhu, xi va nyike matimba yo fuma swiharhi. (Genesa 1:26) Kambe vanhu a va fumiwa hi Xikwembu. Wanuna ni wansati wo sungula a va fanele va kombisa leswaku va yingisa Xikwembu hi ku ka va nga dyi mihandzu ya murhi wun’wana, ku nga “murhi wa ku tiva leswinene ni leswo biha.” (Genesa 2:17) Khombo ra kona, Adamu na Evha va tlange hi ntshunxeko wa vona wa ku tihlawulela, a va xi yingisanga Xikwembu. Ku dya mbhandzu lowu yirisiweke a ku nga ri ku yiva ntsena. Sweswo a ku ri ku xandzukela vuhosi bya Xikwembu. Nhlamuselo ya le hansi ya  Genesa 2:17 eka The New Jerusalem Bible yi vula leswaku Adamu na Evha a va “nga swi lavi ku lawuriwa hi munhu un’wana, xisweswo a va nga swi lavi ku titeka va lo vumbiwa . . . Xidyoho xo sungula a ku ri ku hlasela vuhosi bya Xikwembu.”

Hikwalaho ka leswi swilo a swi fanele swi fambisiwa hi nawu, Xikwembu xi pfumelele Adamu na Evha ni vatukulu va vona leswaku va hanya hi ndlela leyi va yi rhandzaka, naswona va tivekele milawu ya leswinene ni leswo biha. (Pisalema 147:19, 20; Varhoma 2:14) Kutani vanhu va sungule kwalaho ku tikongomisa. Xana swi va fambele kahle? Hi nga vula hi ku swi va fambele ximatsi, loko hi vona vuyelo lebyi veke kona endzhaku ka loko se ku hundze magidi ya malembe va ri karhi va kayakaya! Eklesiasta 8:9 yi ri: ‘Munhu u fuma munhu ku n’wi endla swo biha.’ Matimu yo biha ya ku tifuma ka munhu ma tiyisekisa marito ya Yeremiya 10:23: “Oho Yehovha, ndzi swi tiva kahle leswaku ndlela ya munhu wa la misaveni a yi le ka yena. Munhu loyi a fambaka a nga ka a nga wu kongomisi nkondzo wa yena.” Matimu ya vanhu ma kombise leswaku a va na byona vuswikoti bya ku tifuma hi ndlela leyinene handle ko kongomisiwa hi Muvumbi.

Yesu u swi pfumerile leswi. Yesu a a nga swi lavi ku hanya handle ka nkongomiso wa Xikwembu. U te: ‘A ndzi endli nchumu hi ku tisungulela. Nkarhi hinkwawo ndzi endla swilo leswi tsakisaka Xikwembu.’ (Yohane 4:34; 8:28, 29) Hikwalaho, leswi a ku nga ri Xikwembu lexi n’wi nyikaka mfumo, Yesu u arile. Hambiswiritano, leswi a swi vuli swona leswaku a a nga ri na mhaka ni vanhu-kulobye. Ematshan’weni ya sweswo, u endle hinkwaswo leswi nga ematimbeni yakwe leswaku a pfuna vanhu va kuma ntsako lowukulu hi nkarhi wolowo ni le nkarhini lowa ha taka. U tlhele a fela vanhu. (Matewu 5:3-11; 7:24-27; Yohane 3:16) Kambe Yesu a a swi tiva leswaku “xin’wana ni xin’wana xi ni nkarhi wa xona,” ku katsa ni nkarhi wa Xikwembu wa ku tlhoma vuhosi bya xona lebyi nga ta fuma vanhu. (Eklesiasta 3:1; Matewu 24:14, 21, 22, 36-39) Tsundzuka leswaku le Edeni vatswari va hina vo sungula va endle ku rhandza ka xivumbiwa xo homboloka xa moya, lexi vulavuleke na vona hi ku tirhisa nyoka ya xiviri. Leswi swi hi tisa eka xivangelo xa vumbirhi lexi endleke leswaku Yesu a nga hoxi xandla eka tipolitiki.

Mufumi Loyi A Nga Vonakiki Wa Misava

Bibele yi hi byela leswaku Sathana u tshembise Yesu “mimfumo hinkwayo ya misava ni ku vangama ka yona” loko a ta n’wi gandzela. (Matewu 4:8-10) Entiyisweni, a ku ri Diyavulosi loyi a a n’wi tshembisa mfumo. Hambiswiritano, Yesu a nga welanga endzingweni wolowo. Kambe, xana a ku ri ndzingo hakunene? Xana Sathana a a ta n’wi nyika nyiko yoleyo leyikulu? Ina, hikuva Yesu u vitane Diyavulosi leswaku i “mufumi wa misava”  naswona muapostola Pawulo u n’wi vule “xikwembu xa mafambiselo lawa ya swilo.”—Yohane 14:30; 2 Vakorinto 4:4; Vaefesa 6:12.

Ina, Yesu a a swi tiva leswaku Diyavulosi a a nga tiyimiselanga ku pfuna vanhu. U hlamusele Sathana tanihi “mudlayi” tlhelo “muhembi ni tata wa hinkwaswo leswi nga mavunwa.” (Yohane 8:44, The Amplified Bible) Swi le rivaleni leswaku misava leyi nga “le hansi ka matimba” ya moya wo tano lowo biha a yi nge pfuki yi wu kumile ntsako. (1 Yohane 5:19) Kambe Diyavulosi a nge tshami a ri mufumi hilaha ku nga heriki. Ku nga ri khale, Yesu loyi sweswi a nga xivumbiwa xa moya lexi nga ni matimba, u ta susa Sathana ni ku herisa vulawuri byakwe.—Vaheveru 2:14; Nhlavutelo 20:1-3.

Sathana u swi tiva kahle leswaku masiku ya yena ya ku va mufumi wa misava se ma hela. Hikwalaho, u endla hinkwaswo leswi a nga swi kotaka leswaku a onha vanhu hi ku helela, hilaha a endleke hakona emahlweni ka Ndhambi ya le nkarhini wa Nowa. (Genesa 6:1-5; Yudha 6) Nhlavutelo 12:12 yi ri: “Khombo eka misava ni lwandle, hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.” Vuprofeta bya Bibele ni swiendlakalo swa misava swi kombisa leswaku makumu ya ‘nkarhi lowu wo koma,’ ya kwala nyongeni. (2 Timotiya 3:1-5) Ntshunxeko wu kwala kusuhi.

Mfumo Lowu Nga Ta Tisa Ntsako

Xivangelo xa vunharhu lexi endleke leswaku Yesu a nga tingheni ta tipolitiki hileswi a a swi tiva leswaku enkarhini lowu Xikwembu xi wu vekeke, xi ta tumbuluxa mfumo wa le tilweni lowu nga ta fuma misava. Bibele yi wu vitana Mfumo wa Xikwembu, naswona a ku ri nhloko-mhaka-nkulu ya dyondzo ya Yesu. (Luka 4:43; Nhlavutelo 11:15) Yesu u dyondzise vadyondzisiwa vakwe leswaku va khongelela Mfumo lowu leswaku wu ta, hikuva hi wona ntsena lowu nga ta endla leswaku ‘ku rhandza ka Xikwembu ku ta endliwa emisaveni hilaha ku endlekaka hakona etilweni.’ (Matewu 6:9, 10) U nga ha tivutisa, ‘Loko Mfumo lowu wu ta fuma misava hinkwayo, xana ku ta humelela yini hi mimfumo ya vanhu?’

Nhlamulo ya kona yi kumeka eka Daniyele 2:44 leyi nge: “Emasikwini ya tihosi teto [leti fumaka emakumu ka mafambiselo lawa] Xikwembu xa le tilweni xi ta veka mfumo lowu wu nga ta ka wu nga lovisiwi. Mfumo lowu wu nga ka wu nga hundziseriwi eka vanhu van’wana. Wu ta pfotlosa kutani wu herisa mimfumo [ya vanhu] leyi hinkwayo, kambe wona wu ta tshama hilaha ku nga riki na makumu.” Hikwalaho ka yini Mfumo wa Xikwembu wu ta “pfotlosa” mimfumo ya misava leyi? Hikuva mimfumo leyi yi hlohlotela moya wa ku xandzukela Xikwembu lowu sunguriweke hi Sathana le ntangeni wa Edeni. Tlhandlakambirhi, lava va ringetaka ku haxa moya lowu va lwisana ni Muvumbi. (Pisalema 2:6-12; Nhlavutelo 16:14, 16) Hikwalaho, hi fanele hi tivutisa, ‘Xana hi lava ku fumiwa hi Xikwembu kumbe hi lava ku tifuma?’

Xana U Ta Lava Ku Fumiwa Hi Mani?

Leswaku a pfuna vanhu va endla xiboho lexi faneleke malunghana ni mfumo, Yesu u rhume vadyondzisiwa vakwe leswaku va ya chumayela ‘mahungu lamanene ya mfumo emisaveni hinkwayo leyi akiweke leswaku byi va vumbhoni ematikweni hinkwawo,’ makumu ya mafambiselo lawa ma nga si fika. (Matewu 24:14) I vamani namuntlha lava tiviwaka hi ku chumayela hi Mfumo wa Xikwembu emisaveni hinkwayo? I Timbhoni ta Yehovha. Entiyisweni magazini lowu, i khale wu ri ni marito lama nge, “Xi Huwelela Mfumo Wa Yehovha” eka xifunengeto xa wona. Namuntlha, Timbhoni ta kwalomu ka tsevu wa timiliyoni, ti pfuna vanhu leswaku va kuma vutivi lebyi kongomeke bya Mfumo lowu ematikweni lama tlulaka 230. *

Mikateko Leyi Nga Ta Kumiwa Hi Lava Va Nga Ta Va eHansi Ka Mfumo

Yesu a a endla swilo hi ku landza ku rhandza ka Xikwembu minkarhi hinkwayo. Hikwalaho, ematshan’weni yo ringeta ku tilawula kutani a seketela kumbe a antswisa mfumo wolowo hi tlhelo  ra tipolitiki, u tirhe hi matimba leswaku a twarisa Mfumo wa Xikwembu, ku nga wona ntsena wu nga ta tlhantlha swiphiqo swa vanhu. U hakeriwe hi xiluvelo xo kwetsima xa le tilweni leswaku a va Hosi ya Mfumo wolowo hikwalaho ka ku tshembeka kakwe. Mawaku hakelo leyikulu swonghasi hikwalaho ko titsongahata eka Xikwembu!—Daniyele 7:13, 14.

Namuntlha vanhu va timiliyoni lava tekelelaka Yesu hi ku rhangisa Mfumo wa Xikwembu ni ku endla ku rhandza ka xona na vona va ta kuma nyiko yo hlamarisa—lunghelo ra ku fumiwa hi Mfumo wa Xikwembu. (Matewu 6:33) Ehansi ka mfumo wolowo lowu nga ni rirhandzu, vanhu va ta endliwa lava hetisekeke, va va ni ntshembo wa vutomi lebyi nga heriki. (Nhlavutelo 21:3, 4) Yohane wo Sungula 2:17 yi ri: “Misava ya hundza ni ku navela ka yona, kambe loyi a endlaka ku rhandza ka Xikwembu u tshama hi masiku.” Loko Sathana ni malandza yakwe ma kukuriwile naswona misava hinkwayo yi cinciwile yi va paradeyisi leyi nga pandziwangiki hi vutiko, mafambiselo ya mabindzu lama onhakeke ni vukhongeri bya mavunwa, wa nga vona ndlela leyi swi nga ta tsakisa ha yona ku hanya laha misaveni hilaha ku nga heriki!—Pisalema 37:29; 72:16.

Ina, Mfumo wa Xikwembu hi wona wu nga tisaka ntsako wa xiviri emisaveni, naswona rungula leri va ri twarisaka ri vuriwa mahungu lamanene. Loko u nga si ya amukela mahungu lawa lamanene, hikwalaho ka yini u nga ma amukeli loko Timbhoni ta Yehovha ti ku tisela wona ekaya ra wena?

[Nhlamuselo ya le hansi]

[Swifaniso eka tluka 5]

Matimu ma kombisile leswaku vanhu va nge swi koti ku tifuma hilaha ku humelelaka loko va nga fumiwi hi Xikwembu

[Xifaniso eka tluka 5]

Leswi Sathana a fumaka mafambiselo lawa ya swilo, a a ta swi kota ku nyika Yesu “mimfumo hinkwayo ya misava”

[Swifaniso eka tluka 7]

Yesu u dyondzise leswaku ehansi ka lunghiselelo ra Mfumo wa Xikwembu, misava yi ta va ndhawu yo tsakisa swinene