Hlayisa Ripfalo Ra Wena

KU FAMBA hi xihaha-mpfhuka lexi kongomisiwaka hi rungula leri hoxeke ra khompyuta i khombo lerikulu. Ehleketa loko un’wana a tlanga-tlange hi fambiselo ro kongomisa xihaha-mpfhuka kumbe a nghenise rungula leri hoxeke hi vomu eka khompyuta ya kona! Hi ndlela yo fanekisela, sweswo hi leswi un’wana a ringetaka ku swi endla eka ripfalo ra wena. U ta a lume ni meno leswaku a hlasela nchumu lowu wu ku kongomisaka emahanyelweni. Xikongomelo xa yena i ku endla leswaku u fularhela Xikwembu!—Yobo 2:2-5; Yohane 8:44.

Xana i mani muhlaseri loyi wo kariha? EBibeleni, u vuriwa “nyoka ya khale, leyi vuriwaka Diyavulosi na Sathana, leyi xisaka misava hinkwayo leyi akiweke.” (Nhlavutelo 12:9) Mintirho yakwe yi vonake entangeni wa Edeni, loko a tirhisa mano ya vuxisi leswaku a susumetela Evha ku fularhela leswi a a swi tiva leswaku swi lulamile, kutani a xandzukela Xikwembu. (Genesa 3:1-6, 16-19) Ku sukela kwalaho, Sathana u ve mathwarivona eku simekeni ka minhlangano ya vukanganyisi leyi a yi ta endla leswaku vanhu vo tala va hundzuka valala va Xikwembu. Nhlangano lowu a wu tirhisaka swinene i vukhongeri bya mavunwa.—2 Vakorinto 11:14, 15.

Vukhongeri Bya Mavunwa Byi Dlaya Ripfalo

Ebukwini ya Bibele ya Nhlavutelo, vukhongeri bya mavunwa byi hlamuseriwa tanihi nghwavava yo fanekisela leyi vuriwaka Babilona Lonkulu. Tidyondzo ta byona ti dlaye mapfalo ya vanhu vo tala naswona ti va susumetele ku venga ni ku lwisana hi vukari ni lava va pfumelaka etidyondzweni leti hambanaka ni ta vona. Ku vula mhaka ya xiheri, hi ku ya Nhlavutelo, Xikwembu xi vona vukhongeri bya mavunwa nandzu lowukulu hikwalaho ka ngati “ya hinkwavo lava dlayiweke emisaveni,” ku katsa ni vagandzeri va Xikwembu.—Nhlavutelo 17:1-6; 18:3, 24.

Yesu u lemukise vadyondzisiwa va yena leswaku vukhongeri bya mavunwa a byi ta dlaya ripfalo ra vanhu vo tala, loko a ku: “Nkarhi wa ta lowu un’wana ni un’wana loyi a mi dlayaka a nga ta anakanya leswaku u endlele Xikwembu ntirho wo kwetsima.” Vanhu vo tano va fe mapfalo hakunene! Yesu u te: “A va n’wi tivanga Tatana kumbe mina.” (Yohane 16:2, 3) Loko Yesu a ha ku vula marito wolawo, a swi tekanga nkarhi a nga si dlayiwa hi vanhu lava hlohloteriweke hi varhangeri van’wana va vukhongeri, lava ripfalo ra vona ri va pfumeleleke ku endla xidyoho xo tano. (Yohane 11:47-50) Ku hambana ni sweswo, Yesu u vule leswaku valandzeri va yena va ntiyiso a va ta tiviwa hi rirhandzu leri va nga na rona exikarhi ka vona. Kambe rirhandzu ra vona ra ha ri rikulu, hikuva va rhandza ni valala va vona.—Matewu 5:44-48; Yohane 13:35.

Ndlela yin’wana leyi vukhongeri bya mavunwa byi dlayeke mapfalo ya vanhu vo tala ha yona i ku ndhundhuzela vudlakuta byihi na byihi lebyi rhandziwaka hi vanhu vo tala. Muapostola Pawulo u vulavule hi mhaka leyi ka ha ri emahlweni a ku: “Ku ta va ni nkarhi lowu va nga ta ka va nga tiyiseli eka dyondzo leyi hanyisaka, kambe, hi ku landza  ku navela ka vona, va ta tihlengeletela vadyondzisi leswaku tindleve ta vona ti ta nyangalatiwa.”—2 Timotiya 4:3.

Masiku lawa, varhangeri va vukhongeri va nyangalata tindleve ta vanhu hi ku vula leswaku ku va ni vuxaka bya rimbewu mi nga tekananga a swi hoxanga emahlweni ka Xikwembu. Van’wana va yimelela vusodoma. Kahle-kahle, vafundhisi van’wana i vasodoma lavakulu. Xihloko xin’wana eka phepha-hungu ra le Britain leri vuriwaka The Times, xi vule leswaku “vafundhisi va khume-nharhu lava nga vasodoma lava dumeke” va hlawuriwe leswaku va va swirho swa Huvo leyi Rhangelaka eKerekeni ya Nghilandhi. Loko varhangeri va kereke va tshika ku hanya hi milawu ya Bibele ivi kereke yi nga vuli nchumu hi swona, xana swirho swa yona swi ta hanyisa ku yini? A swi hlamarisi leswi vanhu va timiliyoni va nga ha xi tiviki lexi va faneleke va endla xona.

Swi antswa swinene ku hanya hi ku landza mahanyelo lamanene ni ntiyiso wa moya lowu dyondzisiwaka eBibeleni! (Pisalema 43:3; Yohane 17:17) Hi xikombiso, Bibele yi dyondzisa leswaku timbhisa ni vaoswi “a va nge yi dyi ndzhaka ya mfumo wa Xikwembu.” (1 Vakorinto 6:9, 10) Yi hi byela leswaku vavanuna ni vavasati lava hundzulaka “ntirho wa vona wa ntumbuluko wu va lowu lwisanaka ni ntumbuluko” va “endla leswi thyakeke” emahlweni ka Xikwembu. (Varhoma 1:26, 27, 32) Ntiyiso lowu a wu sunguriwanga hi vanhu lava nga hetisekangiki; i mimpimanyeto leyi huhuteriweke hi Xikwembu leyi xi nga si tshamaka xi yi hundzula. (Vagalatiya 1:8; 2 Timotiya 3:16) Kambe ku ni tindlela tin’wana leti Sathana a ti tirhisaka leswaku a hlasela ripfalo.

Hlawula Vuhungasi Hi Vuxiyaxiya

Swi bihe swinene ku sindzisa munhu ku endla leswo biha, kambe ku endla leswaku a navela ku endla swilo leswo tano swi bihe ni ku tlurisa. Sweswo hi leswi Sathana “mufumi wa misava” a lavaka u endla swona. Leswaku a byala moya wakwe wo biha emianakanyweni ni le timbilwini ta swihunguki kumbe lava nga xalamukangiki—ngopfu-ngopfu vantshwa—u tirhisa swilo swo tanihi minkandziyiso leyi nga basangiki, tifilimi, vuyimbeleri, mintlango ya le ka khompyuta ni swilo swo naveta rimbewu leswi nga eka Internet.—Yohane 14:30; Vaefesa 2:2.

Xiviko xa magazini lowu vitaniwaka Pediatrics, xi te: “Vantshwa [va le United States] va hlalela swiendlo swa madzolonga swa kwalomu ka 10000 hi lembe laha minongonoko leyi endleriweke vana yi nga ni madzolonga swinene.” Xiviko lexi xi tlhele xi hlamusela leswaku “lembe na lembe, vana va kondlo-a-ndzi-dyi va hlalela swilo swa kwalomu ka 15000 leswi vulavulaka hi rimbewu.” Xi te, ni minongonoko ya thelevhixini ya nkarhi wa maxuxo “yi kombisa swiendlo swa vuxaka bya rimbewu swo tlula 8 hi awara, leswi tlulaka leswi a swi ri xiswona hi 1976 hi minkarhi ya mune.” A swi hlamarisi leswi nkambisiso lowu wu tlheleke wu kuma leswaku “ku vulavula nhlambha se ku ya ku andza.” Kambe Bibele ni minkambisiso yo tala ya sayense yi lemukise leswaku loko vanhu va tolovela swilo swo tano va va ni timbilu to homboloka swinene. Hikwalaho loko u lava ku tsakisa Xikwembu hakunene naswona u lava ku vuyeriwa, u fanele u yingisa Swivuriso 4:23, leyi nge: “Hlayisa mbilu ya wena . . .  hikuva swihlovo swa vutomi swi le ka yona.”—Esaya 48:17.

Vuyimbeleri byo tala lebyi tolovelekeke byi dlaya ripfalo. Xiviko lexi nga eka phepha-hungu ra Australia leri vitaniwaka The Sunday Mail, xi lemuxile leswaku xiyimbeleri lexi tinsimu ta xona ti dumeke swinene naswona ti rhandziwaka ematikweni yo tala ya le Vupela-dyambu xi “tikarhate swinene leswaku xi tsema vanhu nhlana.” Xihloko xa kona xi vula leswaku “tinsimu ta yena ti ndhundhuzela swidzidzirisi, vuxaka bya rimbewu exikarhi ka maxaka ni ku pfinya,” nileswaku u “yimbelela hi ku dlaya nsati wa yena a ya n’wi hoxa etiveni.” Marito man’wana lawa a ma vuleke ma nyenyetsa swinene lerova a hi nge ma boxi. Kambe u fundzhiwile hikwalaho ka vuyimbeleri bya yena. Xana u nga rhandza ku byala moya wo tano wo biha emiehleketweni ni le mbilwini ya wena, hambiloko wu sasekisiwile hi vuyimbeleri? A hi nge swi rhandzi, hikuva lava endlaka swilo swo tano va thyakisa mapfalo ya vona naswona va hetelela va ve ni “mbilu yo homboloka,” leyi nga ta va endla valala va Xikwembu.—Vaheveru 3:12; Matewu 12:33-35.

Kutani hlawula vuhungasi bya wena hi vutlhari. Bibele ya hi khutaza: “Swilo swin’wana ni swin’wana swa ntiyiso, swilo swin’wana ni swin’wana swa ntikelo lowukulu, swilo swin’wana ni swin’wana swo lulama, swilo swin’wana ni swin’wana swo tenga, swilo swin’wana ni swin’wana leswi rhandzekaka, swilo swin’wana ni swin’wana leswi ku vulavuriwaka kahle ha swona, hinkwaswo leswi nga kona swa vunene ni hinkwaswo leswi nga kona leswi dzunekaka, hambetani mi xiya swilo leswi.”—Vafilipiya 4:8.

Vanghana Va Ri Khumba Ripfalo Ra Wena

Neil na Franz loko va ha ri vana a va ri na vanghana lavanene lava nga Vakreste va ntiyiso. * Neil u ri, kambe hi ku famba ka nkarhi “ndzi sungule ku va ni vanghana lavo biha.” Lexi a tisoleke hi xona hileswaku vuyelo bya kona u ve xigevenga ivi a helela ekhotsweni. Franz na yena u humeleriwe hi mhaka leyi fanaka. U ri: “A ndzi ehleketa leswaku ndzi nga va na vanghana va misava kambe va nga ndzi kuceteli. Kambe hilaha Vagalatiya 6:7 yi vulaka hakona, ‘Xikwembu a hi xa ku vungunyiwa. Hikuva xin’wana ni xin’wana lexi munhu a xi byalaka, u ta tlhela a tshovela xona.’ Ndzi dyondze hi ndlela yo vava leswaku a ndzi hoxisile kambe Yehovha a a tiyisile. Ndzi gweviwe ku tshama ekhotsweni vutomi hinkwabyo hikwalaho ka vubihi lebyi ndzi byi endleke.”

Vanhu vo fana na Neil na Franz a va lo na swi pfuketana va endla vugevenga; eku sunguleni a va ehleketa leswaku a va nge pfuki va byi endlile. Ku hambuka loku ku endleka hakatsongo-tsongo, kambe hakanyingi ku lumekiwa hi ku va ni vanghana vo biha. (1 Vakorinto 15:33) Ku nga ha landzela ku tirhisa swidzidzirisi hi ndlela yo biha kumbe ku nwa ku tlula mpimo. Kahle-kahle, van’wana va vule leswaku ripfalo i “nchumu lowu hluriwaka hi byalwa.” Sweswo swi nyika munhu xivindzi xa ku endla vugevenga kumbe ku tikhoma hi ndlela yo biha.

Kutani ha yini u fanele u va ni vanghana vo biha? Swi nga va swinene loko wo tolovelana ni  vanhu vo tlhariha lava rhandzaka Xikwembu hakunene. Va ta ku pfuna leswaku u va ni ripfalo lerinene leri nga ta ku kongomisa kahle, xisweswo u papalata maxangu yo tala. (Swivuriso 13:20) Hambileswi Neil na Franz va ha riki ekhotsweni, sweswi va swi vona leswaku ripfalo i nyiko leyi humaka eka Xikwembu, leyi faneleke yi leteriwa kahle ni leyi faneleke yi tlangeriwa hakunene. Ku tlula kwalaho, sweswi va wa va pfuka leswaku va va ni vuxaka lebyinene na Yehovha Xikwembu xa vona. Tlhariha, u dyondza eka swihoxo swa vona.—Swivuriso 22:3.

Hlayisa Ripfalo Ra Wena

Loko hi hlakulela rirhandzu ra hina eka Xikwembu hi tlhela hi va ni ripfumelo ni xichavo eka xona, hi ta va hi kombisa leswaku hi lava ku hlayisa ripfalo ra hina. (Swivuriso 8:13; 1 Yohane 5:3) Bibele yi komba leswaku ripfalo leri nga riki na wona nsusumeto wo tano, hakanyingi ri va ri file. Hi xikombiso, Pisalema 14:1 yi vulavula hi lava va tibyelaka etimbilwini ta vona va ku: “Yehovha a nga kona.” Xana ku pfumala ka vona ripfumelo ku ma khumba njhani mahanyelo ya vona? Ndzimana leyi yi ya emahlweni yi ku: “Va endle hi ndlela leyi onhakeke, va endle hi ndlela leyi nyenyetsaka eswiendlweni swa vona.”

Vanhu lava nga riki na ripfumelo ro tiya eka Xikwembu a va na ntshembo lowu tiyeke hi vumundzuku byo antswa. Hikwalaho, va hanyela swa namuntlha ntsena, va enerisa ku navela ka vona ka nyama. Va tibyela va ku: “A hi dyeni hi nwa, hikuva mundzuku hi ta fa.” (1 Vakorinto 15:32) Hi hala tlhelo, lava va tshamaka va ri karhi va anakanya hi hakelo ya vutomi lebyi nga heriki, a va hambukisiwi hi ku titsakisa loku hundzaka ka misava. Ku fana ni khompyuta leyi kongomisaka xihaha-mpfhuka hi mfanelo, ripfalo ra vona leri leteriweke ri endla leswaku va hambeta va endla leswi laviwaka hi Xikwembu.—Vafilipiya 3:8.

Leswaku ripfalo ra wena ri tshama ri ri leri hanyaka naswona ri tirha kahle, ri fanele ri kongomisiwa hi Rito ra Xikwembu nkarhi na nkarhi. Bibele yi hi byela leswaku vukongomisi byo tano byi kona, hikuva yi vula leswi landzelaka hi ndlela yo fanekisela: “Tindleve ta n’wina ti ta twa rito endzhaku ka n’wina ri ku: ‘Ndlela hi leyi. Fambani hi yona,’ loko mo tshuka mi ya exineneni kumbe mi tshuka mi ya eximatsini.” (Esaya 30:21) Kutani tivekele nkarhi wa ku hlaya Bibele siku ni siku. Sweswo swi ta ku tiyisa swi tlhela swi ku khutaza loko u ri karhi u lwela ku endla leswo lulama kumbe u phimpheriwe hi papa ra ku karhateka. Tiyiseka leswaku Yehovha u ta kongomisa mahanyelo ni vumoya bya wena loko u n’wi tshemba hi ku helela. Ina, tekelela mupisalema loyi a tsaleke a ku: “Ndzi veke Yehovha emahlweni ka mina nkarhi hinkwawo. Hikuva u le vokweni ra mina ra xinene, a ndzi nge tsekatsekisiwi.”—Pisalema 16:8; 55:22.

[Nhlamuselo ya le hansi]

[Swifaniso eka tluka 5]

Vukhongeri bya mavunwa, lebyi Bibele yi byi vulaka “Babilona Lonkulu,” hi byona byi dlayaka mapfalo ya vanhu vo tala

[N’wini wa Xifaniso]

Priest blessing troops: U.S. Army photo

[Swifaniso eka tluka 6]

Ku hlalela madzolonga na rigangugangu swi ta dlaya ripfalo ra wena

[Xifaniso eka tluka 7]

Ku kongomisiwa nkarhi na nkarhi hi Rito ra Xikwembu swi ta hlayisa ripfalo ra wena