“Siku Ro Dyondza Hi Vukhongeri Byin’wana”

HI KU tsakisiwa hi bulo leri yi veke na rona na Timbhoni ta Yehovha, nhloko ya xikolo xin’wana le Poland yi hlawule “Siku Ro Dyondza Hi Vukhongeri Byin’wana” exikolweni xa yona. U kombele swichudeni swa Makhatoliki, Mabudha na Timbhoni ta Yehovha leswaku swi lunghiselela rungula ro koma leri nga ta pfuna swichudeni-kulobye leswaku swi twisisa tidyondzo ni mahanyelo ya vukhongeri bya swona. Vana vanharhu lava nga Timbhoni ta Yehovha va hatle va tsarisa leswaku va hlanganyela.

Loko siku ri fika, loyi a sunguleke ku vulavula a ku ri Malwina wa malembe ya 15 hi vukhale. Hi ku komisa u te: “Vo tala va n’wina mi hi tive ni ku fika hi nga si fika exikolweni lexi, hileswi hi mi endzeleke emakaya ya n’wina. Kumbexana ma tivutisa leswaku ha yini hi phikelela hi mi endzela. Xivangelo hileswi hi landzelaka xikombiso xa Yesu Kreste, Musunguri wa Vukreste. A a chumayela mahungu lamanene ya Mfumo wa Xikwembu kwihi ni kwihi laha a ku ri ni vanhu. Vaapostola ni Vakreste van’wana vo sungula va endle leswi fanaka. Etindhawini to tala, Timbhoni ta Yehovha ti tiyisela miringo yo tala ya ripfumelo, kambe ha tsaka leswi exikolweni xa hina ku nga ni ku rhula loku hinkwenu ka n’wina mi lwelaka ku ku kondletela. Ha mi nkhensa hikwalaho ka sweswo!”

Loko a gimeta rungula rakwe, Malwina u te: “Ku ni xivangelo xin’wana xa ku va hi mi endzela emakaya ya n’wina. Ha khathala hi n’wina. Bibele yi vula leswaku ku nga ri khale vanhu hinkwavo va ta vona swiendlakalo leswi nga ta khumba misava hinkwayo. Kutani enkarhini lowu taka loko hi mi endzela emakaya, hi kombela leswaku mi tinyika nkarhi wa ku hi yingisela. Lexi hi lavaka ku mi byela xona hileswaku swi nga kotekisa ku yini leswaku hi hanya swin’we hilaha ku nga heriki eparadeyisini laha misaveni.”

Xivulavuri lexi landzeleke a ku ri Mateusz, loyi na yena a nga ni malembe ya 15. Mateusz u byele vayingiseri va yena leswaku emalembeni lama hundzeke, Timbhoni ta Yehovha ti tirhise maendlelo yo hambana-hambana leswaku ti twarisa mahungu lamanene. Hi xikombiso, hi 1914—hi nkarhi lowu a ku kombisiwa tifilimi leti a ti nga ri na mpfumawulo—Timbhoni a ti kombisa vanhu “Photo-Drama of Creation,” swifaniso leswi famba-fambaka ni nkombiso wa tislaydi lowu fambisanaka ni marito.

 Mateusz u hlamusele hi ndlela leyi xiya-ni-moya xi tirhisiweke ha yona ku twarisa rungula ra Mfumo a tlhela a hlamusela hi endlelo ro hlawuleka ra khompyuta ra elektroniki ro thayipa tindzimi to tala ([multilanguage electronic phototypesetting system] MEPS) leri Timbhoni ta Yehovha ti tiendleleke rona. U tlhele a hlamusela ndlela leyi Timbhoni ta Yehovha ti pfuneke ha yona ku tivisa madokodela hi vutshunguri lebyi ku nga tirhisiwiki ngati eka byona. U te: “Sweswi madokodela lama dumeke ya le Poland ma vulavula kahle hi xiyimo xa hina xa vutshunguri naswona ma vule leswaku lembe na lembe vavabyi vo tala swinene lava nga riki Timbhoni va endliwa vuhandzuri handle ko tirhisa ngati.”

Mateusz u gimete hi ku hlamusela hi ku akiwa ka Tiholo ta Mfumo kutani a ku: “Xana mi nga tsakela ku endzela holo ya hina? Ku ngheniwa mahala naswona a ku humesiwi minhlengo.” Loko a vulavula hi xivandla xa ntsombano lexi nga eSosnowiec, Mateusz u te: “Mi fanele mi ta vona muako lowu lowukulu ni lowu pfunaka swinene. Ha yini mi nga fambi na mina? Hi na xiringanyeto xo karhi, kutani munghana wa hina Katarzyna u ta mi hlamusela hi xona.”

Ku landzele Katarzyna wa malembe ya 15 hi vukhale, loyi a vulavuleke hi ku hiseka a ku: “Mi amukelekile ku ya entsombanweni wa muganga wa Timbhoni ta Yehovha le Sosnowiec. Ku ta buriwa hi mhaka leyi karhataka vantshwa.” Katarzyna u tlhele a vulavula hi nkhuvo wa Vakreste wa nkoka—ku nga Xitsundzuxo xa rifu ra Yesu Kreste. U khutaze vayingiseri va yena a ku: “N’wexemu vanhu vo tlula 14 wa timiliyoni emisaveni hinkwayo va wu tlangerile nkhuvo lowu. Ha yini mi nga hlanganyeli na hina enkarhini lowu taka?”

Endzhaku ko nyikela tinhlamuselo toleto, Malwina, Mateusz na Katarzyna va nyike vadyondzisi buku leyi nge Timbhoni ta Yehovha I Vahuweleri Va Mfumo Wa Xikwembu swin’we ni tikhasete timbirhi ta vhidiyo leti vulavulaka hi tidyondzo ni mintirho ya Timbhoni ta Yehovha. * Vadyondzisi lava va swi amukele hi mandla mambirhi kutani va va tshembisa leswaku va ta swi tirhisa eka dyondzo ya matimu.

Loko ku gimetiwa nongonoko, Martyna wa malembe ya 12 u tlangele hinkwavo lava a va ri kona risimu leri nge “Ha Ku Khensa, Yehovha.” Vantshwa lava va nga Timbhoni ‘va ve ni vurhena hikwalaho ka Xikwembu xa vona’ kutani va nyikela vumbhoni lebyinene. (1 Vatesalonika 2:2) Lexi i xikombiso lexinene ngopfu eka vantshwa hinkwavo lava nga Timbhoni!

[Nhlamuselo ya le hansi]

[Xifaniso eka tluka 26]

Malwina a ri karhi a lunghiselela rungula ra yena loko ka ha sele masikunyana leswaku a ri nyikela exikolweni

[Xifaniso eka tluka 26]

Katarzyna a ri karhi a hlawula matsalwa lawa a nga ta ma tirhisa