Tshemba Yehovha—Xikwembu Xa Ntiyiso

Xana u tshama u languta exibakabakeni nivusiku loko ku nga ri na mapapa, kutani u vona madzana ya tinyeleti? Xana vukona bya tona byi ku khumbisa ku yini?

SIKU rin’wana nivusiku, tinyeleti ti vulavule na Hosi Davhida wa tiko ra khale ra Israyele hi ndlela yo fanekisela, ti n’wi susumetela ku tsala a ku: “Matilo ma twarisa ku vangama ka Xikwembu; ni xibakabaka xi vula ntirho wa mavoko ya xona.” (Pisalema 19:1) Ina, Muvumbi hi yena a faneriwaka hi “ku amukela ku vangama ni ku xiximiwa ni matimba,” ku nga ri ntumbuluko.—Nhlavutelo 4:11; Varhoma 1:25.

Bibele yi ri: “Loyi a akeke swilo hinkwaswo i Xikwembu.” (Vaheveru 3:4) Ina, Xikwembu xa ntiyiso, ‘lexi vito ra xona ku nga Yehovha, hi La nge Henhla-henhla emisaveni hinkwayo.’ (Pisalema 83:18) Naswona a hi xinghunghumani. Yesu Kreste u vule leswi landzelaka malunghana ni Tata wakwe wa le tilweni Yehovha: “Loyi a ndzi rhumeke i wa xiviri.”—Yohane 7:28.

Yehovha I Muhetisisi Wa Swikongomelo

Vito ra Xikwembu ku nga Yehovha ri humelela kwalomu ka minkarhi ya 7 000 eMatsalweni ya Xiheveru ntsena. Vito rero ri kombisa leswaku i Xikwembu xa xiviri. Vito ra Xikwembu hi ku kongoma ri vula leswaku “U Endla Leswaku Swi Va Kona.” Hikwalaho Yehovha Xikwembu u tihlamusela tanihi Muhetisisi wa swikongomelo swa yena. Loko Muxe a vutise Xikwembu vito ra xona, Yehovha u ri hlamusele hi vuenti a ku: “Ndzi ta tikombisa ndzi ri lexi ndzi nga ta tikombisa ndzi ri xona.” (Eksoda 3:14) Vuhundzuluxeri bya Rotherham byi vula hi ku kongoma byi ku: “Ndzi ta va lexi ndzi lavaka ku va xona.” Yehovha u hlawula ku va xin’wana ni xin’wana lexi lavekaka leswaku a hetisisa swikongomelo ni switshembiso swa yena swo lulama. Hikwalaho u ni swithopo swo hlawuleka swo tanihi leswi nge, Mutumbuluxi, Tatana, Hosi leyi Lawulaka, Murisi, Yehovha wa mavuthu, Mutwi wa xikhongelo, Muavanyisi, Muleteri Lonkulu, Mukutsuri.—Vaavanyisi 11:27; Pisalema 23:1; 65:2; 73:28; 89:26; Esaya 8:13; 30:20; 40:28; 41:14.

I Xikwembu xa ntiyiso ntsena lexi nga ni mfanelo yo va ni vito leri nge Yehovha, hikuva vanhu va endla makungu lawa va nga tiyisekiki leswaku ma ta humelela. (Yakobo 4:13, 14) I Yehovha ntsena loyi a nga vulaka a ku: “Tanihi leswi mpfula yi naka ehansi, ni gamboko ku suka ematilweni, naswona yi nga tlheleriki endhawini yoleyo yi nga si tsakamisa misava yi yi endla yi mirisa yi tlhela yi hlukisa, kutani mbewu yi nyikiwa mubyari ni xinkwa xi nyikiwa la dyaka, hikwalaho ni rito ra mina leri humaka enon’wini wa mina ri ta endlisa sweswo. A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esaya 55:10, 11.

Yehovha u hetisisa xikongomelo xakwe hi ku helela lerova ni leswi vanhu va anakanyaka leswaku a hi swa xiviri, eka yena i swa xiviri. Loko ku hundze nkarhi wo leha Abrahama, Isaka na  Yakobo va file, Yesu u vulavule ha vona a ku: “[Yehovha] a hi Xikwembu xa lava feke, kambe i xa lava hanyaka, hikuva eka xona hinkwavo va hanya.” (Luka 20:37, 38) Vakokwa wa hina lava vanharhu lava tshembekaka va file, kambe xikongomelo xa Xikwembu xa ku va pfuxa xi ta hetiseka hakunene, lerova eka xona swi fana ni loko va ri lava hanyaka. Ku pfuxa malandza lawa yo tshembeka ya khale a ku nge vi ntirho wo tika eka Yehovha, tanihi leswi a koteke ku vumba munhu wo sungula hi ntshuri.—Genesa 2:7.

Muapostola Pawulo u hlamusela mhaka yin’wana leyi kombisaka leswaku Xikwembu xi endla leswi xi lavaka swona. EMatsalweni, Abrahama u vuriwa “tata wa matiko yo tala.” (Varhoma 4:16, 17) Loko Abrama a nga si va ni n’wana, Yehovha u cince vito rakwe a n’wi thya Abrahama, leswi vulaka “Tata wa Ntshungu (Vunyingi).” Yehovha u hetisise nhlamuselo ya vito rero hi ku endla singita ra leswaku Abrahama ni nsati wakwe la dyuhaleke, Sara va tlhela va kuma matimba ya ku tswala vana.—Vaheveru 11:11, 12.

Leswi Yesu Kreste a a ri ni matimba ni vulawuri lebyikulu, u vulavule hi swilo swa xiviri hi matwisiselo yo tlula ya vanhu. Hambileswi Lazaro munghana wakwe lonkulu a a file, Yesu u byele vadyondzisiwa vakwe a ku: “Lazaro nakulorhi u ye eku wiseni, kambe ndzi ya kona leswaku ndzi n’wi pfuxa evurhongweni.” (Yohane 11:11) Ha yini Yesu a vule leswaku munhu la feke u lo etlela ntsena?

Loko Yesu a fika emutini wa Betaniya, laha Lazaro a a tshama kona, u ye esirheni kutani a lerisa leswaku ku susiwa ribye leri a ri pfale nyangwa wa sirha. Endzhaku ko khongela hi rito leri tlakukeke, u huwelerile a ku: “Lazaro, huma!” Kutani loko vahlaleri va pfule mahlo hinkwawo va languta sirha, “munhu loyi a a file a huma, milenge yakwe ni mavoko swi boheleriwe hi swo tsondzela, naswona nghohe yakwe a yi tsondzeriwe hi lapi.” Hiloko Yesu a ku: “N’wi ntshunxeni, mi n’wi tshika a famba.” (Yohane 11:43, 44) Yesu u pfuxe Lazaro—loyi a a ri ni masiku ya mune a file! Kreste a a nga hundzeleti loko a vula leswaku munghana wakwe u etlele. Eka Yehovha ni le ka Yesu, mufi Lazaro a swi fana ni loko a lo etlela kunene. Ina, Yesu ni Tata wakwe wa le tilweni a va tlangi matshopetani.

Yehovha A Nga Swi Hetisisa Leswi Hi Swi Languteleke

Ku ni ku hambana lokukulu hakunene exikarhi ka swikwembu swa vuxisi na Xikwembu xa ntiyiso! Vagandzeri va swikwembu swa hava va vula leswaku swikwembu swa vona swi ni matimba lamakulu, kasi vo tixisa. Kambe, hambiloko vanhu va gandzela swikwembu swa hava va lume ni meno, a swi nge pfuki swi kote ku endla nchumu, hambi ko ba lexi dumaka. Hi hala tlhelo, Yehovha Xikwembu u ni mfanelo ya ku vulavula hi malandza ya yena lama feke khale swinene tanihi lama hanyaka hikuva a nga swi kota ku tlhela a ma pfuxa. “Entiyisweni Yehovha i Xikwembu,” naswona a nga va kanganyisi vanhu va yena.—Yeremiya 10:10.

Swa khutaza hakunene ku tiva leswaku Yehovha hi nkarhi wa yena lowu faneleke u ta pfuxa vanhu lava feke lava nga emianakanyweni ya yena! (Mintirho 24:15) Ina, ku pfuxiwa eku feni swi ta katsa ku kondleteriwa ka mahanyelo ya munhu. Ku tsundzuka mahanyelo ya vanhu lava feke ni ku va pfuxa a swi nge vi xiphiqo eka Muvumbi hikuva u ni vutlhari ni matimba lamakulu ngopfu. (Yobo 12:13; Esaya 40:26) Tanihi leswi Yehovha a nga ni rirhandzu lerikulu ngopfu, u ta tirhisa mianakanyo ya yena leyi hetisekeke leswaku a pfuxela vanhu emisaveni leyi nga paradeyisi  va ri ni vumunhu lebyi a va ri na byona loko va nga si fa.—1 Yohane 4:8.

Leswi makumu ya misava ya Sathana ma tshineleke, lava va tshembaka Xikwembu xa ntiyiso va ni vumundzuku lebyinene. (Swivuriso 2:21, 22; Daniyele 2:44; 1 Yohane 5:19) Mupisalema wa hi tiyisekisa: “Hi nkarhinyana, lowo homboloka a nge he vi kona; . . . kambe lavo rhula va ta dya ndzhaka ya misava, hakunene va ta kuma ntsako lowu heleleke eku rhuleni lokukulu.” (Pisalema 37:10, 11) Vugevenga ni madzolonga swi ta va swi nga ha ri kona. Ku ta fuma vululami naswona swiphiqo swa timali swi ta va swi herile. (Pisalema 37:6; 72:12, 13; Esaya 65:21-23) Swilo hinkwaswo leswi fambisanaka ni xihlawuhlawu swi ta herisiwa. (Mintirho 10:34, 35) Tinyimpi ni matlhari ya nyimpi swi ta va swi nga ha ri kona. (Pisalema 46:9) Enkarhini wolowo “ku hava munhu la tshamaka kona la nga ta ku: ‘Ndza vabya.’” (Esaya 33:24) Un’wana ni un’wana u ta va a hanye kahle. (Nhlavutelo 21:3, 4) Ku nga ri khale misava leyi yi ta va paradeyisi. Xexo i xikongomelo xa Yehovha!

Ina, hinkwaswo leswi tshembisiweke eBibeleni swi ta hetiseka ku nga ri khale. Xana i vutlhari ku pfumela ku kanganyisiwa hi swilo leswi gandzeriwaka emisaveni leyi, ematshan’weni yo tshemba Yehovha hi mbilu hinkwayo? U rhandza leswaku “vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:3, 4) Ematshan’weni yo tlanga hi nkarhi ni rifuwo ra hina hi landzelela swilo swa mafambiselo lawa ni swikwembu swa kona, a hi kuriseni vutivi bya hina bya Xikwembu lexi nga xa ntiyiso kutani hi xi tshemba hi timbilu ta hina hinkwato.—Swivuriso 3:1-6; Yohane 17:3.

[Xifaniso lexi nga eka tluka 6]

Eka Yehovha ni le ka Yesu, Lazaro a a fana ni munhu la etleleke vurhongo ntsena

[Swifaniso leswi nga eka tluka 7]

Ku nga ri khale misava leyi yi ta va paradeyisi