Misava Hinkwayo Yi Lovisiwa!

Languta misava leyi u nga eka yona, madoroba ya yona, mindhavuko ya yona, swilo swa yona swa sayense, vaaki va yona va magidi ya timiliyoni. Loko u yi languta wa tsaka hileswi yi tikombaka yi ta tshama hi masiku, a swi tano ke? Xana u anakanya leswaku mafambiselo ya misava leyi ma nga nyamalala hi ku helela siku rin’wana? Swi nga ha tika ku anakanya sweswo. Hambiswiritano, xana a wu swi tiva leswaku buku yin’wana leyi tshembekaka yi vula leswaku a ku ri ni mafambiselo man’wana ya misava emahlweni ka lawa ya namuntlha, naswona ma lovisiwe hi ku helela?

A HI vulavuli hi mafambiselo ya misava ya xikhale. Misava leyi lovisiweke a yi hluvukile, yi ri ni madoroba, yi ri ni swilo swa ntivo-vuxongi ni swa sayense. Kambe, rhekhodo ya Bibele yi hi byela leswaku hi xitshuketa, hi siku ra vu-17 hi n’hweti ya vumbirhi, ka ha sele malembe ya 352 leswaku ku velekiwa kokwa wa hina Abrahama, ku sungule ndhambi leyi loviseke mafambiselo hinkwawo ya misava. *

 Xana xiviko xexo i ntiyiso? Xana nchumu wo tano wu humelerile hakunene? Xana a ku ri ni mafambiselo ya khale ya misava emahlweni ka lawa ya namuntlha, lawa a ma ri ni swilo swa manyunyu kutani ma lovisiwa? Loko swi ri tano, ha yini ma lovisiwile? Swilo swi onheke kwihi? Naswona xana hi nga dyondza swo karhi eka ku lovisiwa ka wona?

Xana Misava Ya Khale Yi Lovisiwile Hakunene?

Loko khombo ro tano leri chavisaka ri humelerile hakunene, a ri nga ta rivariwa hi ku helela. Hikwalaho, ematikweni yo tala ku ni switsundzuxo swa ndzoviso wolowo. Hi xikombiso, anakanya hi siku leri kongomeke leri tsariweke eMatsalweni. N’hweti ya vumbirhi ya khalendara ya khale a yi sukela exikarhi ka n’hweti leyi sweswi hi yi vulaka October ku ya exikarhi ka n’hweti leyi hi yi vulaka November. Hikwalaho, siku ra vu-17 ri nga va ri fambisana ni siku ro sungula ra November. Kutani, swi nga endleka sweswo swi ri xivangelo xa ku va ematikweni yo tala ku tlangeriwa minkhuvo ya vafi hi nkarhi wolowo elembeni.

Swikombiso swin’wana swa Ndhambi swa ha ri kona emindhavukweni ya vanhu. Vanhu vo tala va khale va ni ntsheketo wa leswaku vakokwa wa vona va pone ndhambi ya misava hinkwayo. Vamanghimana va le Afrika, Macelt ya le Yuropa, Vainca va le Amerika Dzonga—hinkwavo va ni mintsheketo leyi fanaka, ku fana ni vanhu va le Alaska, Australia, Chayina, Indiya, Lithuania, Mexico, Micronesia, New Zealand ni tindhawu tin’wana ta le Amerika N’walungu, loko hi boxa ti nga ri tingani.

Ina, hi ku famba ka nkarhi mintsheketo leyi yi thatheriwile, kambe hinkwayo yi ni vuxokoxoko lebyi kongomaka nhlamuselo yin’we: Xikwembu a xi hlundzukisiwe hi vuhomboloki bya vanhu. Xi tise ndhambi leyikulu. Vanhu hinkwavo va lovisiwile. Hambiswiritano, ku hlayisiwe vanhu va nga ri vangani lavanene. Vanhu va kona va ake ngalava leyi nga ponisa vanhu ni swiharhi. Hi ku famba ka nkarhi, ku rhumeriwe tinyenyana leswaku ti ya lava ndhawu yo oma. Eku heteleleni, ngalava yi fike yi yima entshaveni. Loko vanhu lava poneke va chikile va endle gandzelo.

Xana leswi swi kombisa yini? Tinhlamuselo ta timhaka leti a ti lo kotlana ntsena. Vumbhoni hinkwabyo bya mintsheketo leyi byi tiyisa vumbhoni bya khale bya Bibele bya leswaku vanhu hinkwavo va huma eka vanhu lava poneke ndhambi leyi loviseke misava leyi nga vanhu. Hikwalaho, a hi boheki ku titshega hi mintsheketo leswaku hi tiva leswi humeleleke. Hi ni rhekhodo leyi vikiweke kahle eMatsalweni ya Bibele ya Xiheveru.—Genesa, tindzima 6-8.

Bibele yi ni rhekhodo leyi huhuteriweke ya matimu lama sukelaka eku sunguleni ka vutomi. Hambiswiritano, vumbhoni byi kombisa leswaku  a hi matimu ntsena. Vuprofeta bya yona lebyi tshembekaka ni vutlhari bya yona lebyi enteke i vumbhoni bya leswaku yi tiyisile eka leswi yi swi vulaka—leswaku yi tamele marito lawa Xikwembu xi ma byelaka vanhu. Ku hambana ni mintsheketo, Bibele yi ni mavito ni masiku swin’we ni vuxokoxoko bya vutomi bya vanhu ni bya tindhawu, eka marungula ya yona ya timhaka ta matimu. Yi hi hlamusela ndlela leyi vutomi a byi ri ha yona emahlweni ka Ndhambi naswona yi paluxa xivangelo xa ku lovisiwa ka mafambiselo ya misava hinkwayo hi xitshuketa.

A ku onhake yini hi vanhu volavo va le mahlweni ka ndhambi? Xihloko lexi landzelaka xi ta hlamula xivutiso xexo. I xivutiso xa nkoka eka lava va nga ha vaka va tivutisa leswaku vumundzuku bya misava ya hina leyi hluvukeke byi sirheleleke ku fikela kwihi.

[Nhlamuselo ya le hansi]

[Chati leyi nga eka tluka 4]

(Leswaku u vona rungula leri hleriweke hi ku helela, vona nkandziyiso wa kona)

Mintsheketo Ya Ndhambi eMisaveni Hinkwayo

Tiko Ku Yelana Ka Mhaka 1 2 3 4 5 6 7 8 9 10

Grikiya 7 ◆ ◆ ◆ ◆ ◆ ◆ ◆

Rhoma 6 ◆ ◆ ◆ ◆ ◆ ◆

Lithuania 6 ◆ ◆ ◆ ◆ ◆ ◆

Asiriya 9 ◆ ◆ ◆ ◆ ◆ ◆ ◆ ◆ ◆

Tanzania 7 ◆ ◆ ◆ ◆ ◆ ◆ ◆

Indiya - Mahindu 6 ◆ ◆ ◆ ◆ ◆ ◆

New Zealand - Vamaori 5 ◆ ◆ ◆ ◆ ◆

Micronesia 7 ◆ ◆ ◆ ◆ ◆ ◆ ◆

Washington U.S.A. - Vayakima 7 ◆ ◆ ◆ ◆ ◆ ◆ ◆

Mississippi U.S.A. - Vachoctaw 7 ◆ ◆ ◆ ◆ ◆ ◆ ◆

Mexico - Vamichoacan 5 ◆ ◆ ◆ ◆ ◆

Amerika Dzonga - Maquechua 4 ◆ ◆ ◆ ◆

Bolivia - Vachiriguano 5 ◆ ◆ ◆ ◆ ◆

Guyana - Vaarawak 6 ◆ ◆ ◆ ◆ ◆ ◆

1: Xikwembu xi hlundzukisiwe hi vuhomboloki

2: Ku lovisiwa hi ndhambi

3: Yi tisiwe hi Xikwembu

4: Xikwembu xi nyikele xitsundzuxo

5: Ku pone vanhu va nga ri vangani

6: Va ponisiwe hi ngalava

7: Swiharhi swi ponisiwile

8: Nyenyana kumbe xivumbiwa xin’wana xi rhumiwile

9: Ngalava yi hetelele yi yime entshaveni

10: Ku endliwe gandzelo