Swivutiso Swa Vahlayi

Loko munhu a lo tidlaya, xana swi nga va swinene leswaku mutirheli la nga Mukreste a nyikela nkulumo ya xilahlo?

Mutirheli un’wana ni un’wana la nga Mukreste u fanele ku tiendlela xiboho hi ku ya hi ripfalo ra yena lerinene, loko swi fanerile kumbe swi nga fanelanga ku nyikela nkulumo ya xilahlo xa munhu loyi swi vonakaka onge u lo tidlaya. Loko a endla xiboho xexo, u fanele ku anakanya hi swivutiso leswi landzelaka: Hi rihi langutelo ra Yehovha hi ku tidlaya? Xana munhu yoloye u lo tidlaya hi vomu hakunene? Xana u tidlaye hikwalaho ko pfilunganyeka emianakanyweni kumbe emintlhavekweni? Xana vanhu va ndhawu yoleyo va ku languta hi ndlela yihi ku tidlaya?

Tanihi Vakreste, ha swi lava ku tiva langutelo ra Yehovha hi ku tidlaya. Vutomi bya munhu i bya risima naswona bya kwetsima eka Yehovha. (Genesa 9:5; Pisalema 36:9) Ku tidlaya hi vomu ku bihile ematihlweni ya Xikwembu. (Eksoda 20:13; 1 Yohane 3:15) Xana mhaka yoleyo yi sivela ku nyikela nkulumo ya xilahlo xa munhu la nga lo tidlaya?

Anakanya hi mhaka ya Hosi Sawulo wa le Israyele. Loko swi va erivaleni leswaku a nge poni enyimpini ya yena yo hetelela ni Vafilista, ematshan’weni yo pfumelela valala va yena leswaku va n’wi khoma hi ndlela yo biha, “Sawulo [u teke] banga a wela ehenhla ka rona.” Loko Vafilista va kuma ntsumbu wa yena, va wu hayeke erirhangwini ra muti wa Beta-xani. Loko vaaki va Yabexe-giliyadi va twa leswi Vafilista va swi endleke, va teke ntsumbu wolowo va wu hisa. Hiloko va teka marhambu ya yena va ya ma celela. Va kale va titsona swakudya ku ringana masiku ya nkombo, ku nga mukhuva lowu tolovelekeke eka Vaisrayele wo rila mufi. (1 Samuwele 31:4, 8-13; Genesa 50:10) Loko mhaka leyi endliweke hi vaaki va Yabexe-giliyadi yi fika etindleveni ta Davhida, mutotiwa wa Yehovha, u te: “Onge mi nga katekisiwa hi Yehovha, hikuva mi kombise musa lowu wa rirhandzu eka hosi ya n’wina, eka Sawulo, hikwalaho ka leswi mi n’wi lahleke. Sweswi onge Yehovha a nga mi komba musa wa rirhandzu ni vutshembeki.” (2 Samuwele 2:5, 6) Rungula ra Bibele a ri kombisi leswaku vaaki va Yabexe-giliyadi va soriwile hi leswi va endleke leswi vonakaka swi ri ku rila rifu ra Hosi Sawulo. Ringanisa mhaka yoleyo ni ya lava va nga lahliwangiki hikwalaho ka swidyoho swa vona. (Yeremiya 25:32, 33) Mutirheli la nga Mukreste a nga anakanya hi rungula leri vulavulaka hi Sawulo, loko a lava ku endla xiboho xa loko swi fanerile kumbe swi nga fanelanga ku nyikela nkulumo ya xilahlo xa munhu la nga lo tidlaya.

Xin’wana lexi mutirheli a nga ha anakanyaka ha xona i xikongomelo xa nkulumo ya xilahlo. Timbhoni ta Yehovha a ti lahli vanhu hi xikongomelo lexi hoxeke lexi vanhu vo tala lava pfumelaka eka ku nga fi ka moya va nga na xona, ku nga ku rhumela mufi exivandleni xin’wana. Xikongomelo-nkulu xa ku nyikela nkulumo ya xilahlo a hi ku vuyerisa mufi kambe i ku chavelela lava feriweke ni ku chumayela lava nga kona, hi xiyimo xa mufi. (Eklesiasta 9:5, 10; 2 Vakorinto 1:3-5) Xivangelo xin’wana xa nkoka xo nyikela nkulumo ya xilahlo i ku pfuna vayingiseri leswaku va twisisa ku koma ka vutomi. (Eklesiasta 7:2) Xana nkulumo ya xilahlo xa munhu la nga lo tidlaya yi ta swi kota ku fikelela swikongomelo sweswo?

I ntiyiso leswaku van’wana va nga ha anakanya leswaku munhu yoloye u tidlaye hi vomu a ri karhi a swi tiva leswaku u dyohela Yehovha. Kambe, xana vonelo ro tano ra twala minkarhi hinkwayo? Xana swi nga ha endleka ku ve xiendlo xa xitshuketa? Van’wana lava nga tshama va ringeta ku tidlaya va swi xiyile leswaku a hi swinene kutani va namba va ku swi thyaa! Loko munhu a file, a nge hundzuki eka leswi a swi endleke.

Nchumu wun’wana wa nkoka i ku pfilunganyeka emianakanyweni ni le mintlhavekweni, loku vaka kona eka vanhu vo tala lava lavaka ku tidlaya. Volavo hi vona lava ku tidlaya ku tlangaka hi vona. Hi ku ya  hi minkambisiso yin’wana, tiphesente ta 90 ta lava va tidlayaka va va va ri ni swiphiqo swo karhi emianakanyweni ni le mintlhavekweni kumbe va godzomberiwile. Xana Yehovha u ta va rivalela vanhu lava tidlayaka va ri eka xiyimo xo tano xa mianakanyo? A hi swa hina ku vula leswaku mudyohi la feke u endle xidyoho lexi Yehovha a nga taka a nga n’wi rivaleli. Loko mutirheli la nga Mukreste a anakanya hi ku nyikela nkulumo ya xilahlo xa munhu la nga lo tidlaya, u fanele ku anakanya hi swiyimo ni mahanyelo ya mufi.

Ka ha ri ni mhaka yin’wana leyi lavaka ku dyeriwa marhambu ya nhloko: Xana vanhu va ndhawu yoleyo va ku languta hi ndlela yihi ku tidlaya ni rifu ra munhu wo tano? Vakulu va fanele ku anakanyisisa hi mhaka leyi hikuva a va lavi leswaku ndhuma ya vandlha ra ka vona ra Timbhoni ta Yehovha yi onhiwa. Vakulu va nga ha vona swi antswa ku va va nga yi nyikeli erivaleni nkulumo yo tano kumbe va nga yi nyikeli eHolweni ya Mfumo, hi ku ya hi langutelo leri tolovelekeke endhawini yoleyo hi munhu la nga lo tidlaya, ngopfu-ngopfu hi lexi endleke leswaku a tidlaya.

Hambiswiritano, loko mutirheli la nga Mukreste a komberiwa ku nyikela nkulumo ya xilahlo, naswona ripfalo ra yena ri n’wi pfumelela, a nga endla tano. Loko a endle xiboho xo tano, u fanele ku tirhisa vutlhari loko swi ta emhakeni ya ku vula hi ku tiyiseka leswaku munhu wo tano u ta pfuxiwa kumbe a nge pfuxiwi. Ntshembo wun’wana ni wun’wana hi vafi wu le mavokweni ya Yehovha, a nga kona ni un’we la nga vulaka loko lava feke va ta pfuxiwa kumbe va taka va nga pfuxiwi. Mutirheli a nga wu hlamusela hi vuenti ntiyiso wa Bibele malunghana ni rifu naswona a chavelela lava feriweke.