Mintsombano Ya Matiko Hinkwawo Hi 2003

HI Mugqivela, October 6, 2001, nhlangano wa lembe ni lembe wa swirho swa Watch Tower Bible and Tract Society of Pennsylvania wu khomeriwe eJersey City, le New Jersey, U.S.A. Endzhaku ka nhlangano wolowo, swirho swa wona ni vaendzi va swona va tiphine hi nongonoko wo hlawuleka. Hi siku leri tlhandlamaka, eka minhlangano yin’wana leyi khomeriweke emadorobeni ya mune le Canada ni le United States, swirho swa Huvo leyi Fumaka ya Timbhoni ta Yehovha swi endle xitiviso lexi landzelaka endzhaku ka nkulumo ya swona yo gimeta:

“Leswi hi languteleke vumundzuku, i swa nkoka swinene leswaku vanhu hinkwavo va Xikwembu va nga fularheli ku hlengeletana ka vona. Muapostola Pawulo u khutaze leswaku ku hlengeletana loku, swin’we ni ku khutazana, hi fanele hi swi endla hilaha ku engetelekeke ngopfu tanihi leswi hi vonaka siku ra Yehovha lerikulu ni leri chavisaka ri tshinela. (Vaheveru 10:24, 25) Hi ku pfumelelana ni xileriso lexi xa Matsalwa, hi lava ku va ni mintsombano ya muganga emisaveni hinkwayo haxawa [2002]. Kutani hi lembe ra 2003, loko Yehovha a swi rhandza, hi ta khoma mintsombano yo hlawuleka ya matiko hinkwawo etindhawini tin’wana. Sweswi i nkarhi wo tshama hi hitekile naswona hi xalamukile, hi xiya ndlela leyi swiendlakalo swa misava swi hundzukaka ha yona.”

Hambileswi vanhu va nga ni ku kanakana lokukulu ni mintshikilelo leswi fambiselo leri ri nga kusuhi ni ku herisiwa, ntirho wa vanhu va Xikwembu wu fanele wu ya emahlweni. Mahungu lamanene ya Mfumo, ku katsa ni rungula ra Bibele leri nga xitsundzuxo, swi fanele swi twarisiwa ematikweni hinkwawo ni tinyimba hinkwato ni tindzimi hinkwato ni vanhu hinkwavo, va tivisiwa leswaku va fanele va ‘chava Xikwembu va xi vangamisa, hikuva nkarhi wa ku avanyisiwa hi xona wu le kusuhi.’ (Nhlavutelo 14:6, 7) Hikwalaho, hi ku ya hi ku rhandza ka Tata wa hina wa le tilweni, mintsombano ya matiko hinkwawo ya lembe ra 2003 yi lunghiseleriwe etindhawini to hambana-hambana.

Xo sungula, minhlangano yo tano leyi nga si tiyisekisiwaka yi hleriwe leswaku yi khomiwa emadorobeni ma nga ri mangani ya le Amerika N’walungu ivi endzhakunyana ka sweswo yi ya va eYuropa. Endzhakunyana hi 2003, ku ta endliwa malunghiselelo ya leswaku mintlawa ya vapfhumba yi ya emadorobeni ma nga ri mangani ya Asiya; kutani loko lembe ri ya eku heleni, mintlawa yin’wana yi ta ya eAfrika, eAmerika Dzonga ni le tindhawini tin’wana ta Pacific. Marhavi man’wana ma ta komberiwa leswaku ma rhumela nhlayo yo karhi ya vapfhumba eka mintsombano yin’wana, kutani a swi nge koteki ku rhamba un’wana ni un’wana. Nilokoswiritano, swi ta khutaza ku va ni vapfhumba vo karhi lava yimelaka matiko yo hambana-hambana entsombanweni wun’wana ni wun’wana.

Ku nga ri khale mavandlha ya Timbhoni ta Yehovha ma ta kuma rungula leri vulavulaka hi minhlangano leyi. Rungula leri vulavulaka hi masiku swin’we ni madoroba lawa vapfhumba lava rhambiweke va nga ta ya eka wona swi ta rhumeriwa hi marhavi ya le matikweni ya ka vona. Hikwalaho, ma komberiwa leswaku mi nga tsaleli rhavi kumbe ku ri vutisa hi mhaka leyi sweswi.

Lava nga ta hetelela va hlawuriwile leswaku va ya va vapfhumba ku ta va Timbhoni leti tinyiketeleke ti tlhela ti khuvuriwa, leti nga ta veka xikombiso lexinene ni ku kombisa rirhandzu eka vamakwerhu va kwalaho. Vamakwerhu lava endzeriweke na vona va ta va ni nkarhi wo amukela vaendzi lava hi rirhandzu va tlhela va va kombisa malwandla ya xiviri. (Vaheveru 13:1, 2) Leswi swi ta endla leswaku va “khutazana.” (Varhoma 1:11, 12) Vuxokoxoko lebyi engetelekeke malunghana ni malunghiselelo lawa byi ta rhumeriwa hi marhavi lama komberiweke leswaku ma rhumela vapfhumba ematikweni yo karhi.

Mintsombano ya muganga ya masiku manharhu ya lembe ra 2003 yi ta lunghiseleriwa ematikweni yo tala, hilaha swi tolovelekeke hakona. Hinkwerhu hi ta va ni nkarhi wa ku ‘yingisa, ku dyondza ni ku khutaziwa’ loko hi hlengeletane swin’we. (Deteronoma 31:12; 1 Vakorinto 14:31) Leswi swi ta endla leswaku vanhu hinkwavo va Xikwembu va va ni nkarhi wa ku ‘nantswa va vona leswaku Yehovha hi lonene.’ (Pisalema 34:8) Emintsombanweni hinkwayo ya matiko hinkwawo, swin’we ni le mintsombanweni ya muganga, varhumiwa va ta va va ri kona, naswona van’wana va ta hlanganyela enongonokweni.

Lembe leri hi tiphina hi Ntsombano wa Muganga wa “Vachumayeri Va Mfumo Lava Hisekaka,” lowu hi khutazaka ku chumayela hi ku hiseka. Loko hi ri karhi hi tiphina ha wona, a swi kanakanisi leswaku ntshembo wa hina wu ta kula eka leswi Yehovha a hi khomeleke swona haxawa. Leswi swi ta hi pfuna leswaku hi ‘tshama hi rindzile, hi xalamukile naswona hi lunghekile’ hikwalaho ka minkarhi leyi yo nonon’hwa ni leyi nga ya nkoka.—Matewu 24:42-44.