Hinkwerhu Ha Swi Lava Ku Bumabumeriwa

A A KU ri siku lerinene eka xinhwanyetana xin’wana. Hambileswi minkarhi yin’wana a a xi fanele xi vuyisiwa endleleni, siku leri rona a a xi tikhome kahle ngopfu. Hambiswiritano, vusiku byebyo, endzhaku ka loko xinhwanyetana xexo xi latiwile, mana wa xona u xi twe xi rila. Loko a xi vutisile leswaku xi hlundzukise hi yini, xi hlamule xi ri karhi xi mpfikula xi ku: “Xana namuntlha a mi swi vonanga leswaku a ndzi nga karhati?”

Xivutiso xexo xi tlhave manana yoloye ku fana ni tlhari. Minkarhi hinkwayo a a tshamela ku xi holovela. Kambe siku leri, hambileswi a swi xiyeke leswaku xinhwanyetana xa yena xi ringete hi matimba leswaku xi tikhoma kahle, manana u lo swi nhwii, hi mahlo ntsena a nga vuli nchumu.

Swinhwanyetana a hi swona ntsena swi lavaka ku bumabumeriwa ni ku tiyisekisiwa. Hinkwerhu ha swi lava—ni ndzayo ni ku vuyisiwa endleni ha swi lava.

Xana hi titwa njhani loko hi bumabumeriwa swi huma embilwini? Xana a swi hi tsakisi? Entiyisweni ha swi vona leswaku un’wana u hi xiyile, naswona wa khathala hi hina. Swa hi tiyisekisa leswaku leswi hi swi endleke i swinene, naswona swi hi susumetela ku tirha hi matimba enkarhini lowu taka. A swi hlamarisi leswaku hakanyingi loko hi bumabumeriwa swi huma embilwini swi hi endla hi tsakela munhu loyi a hi byelaka leswi hi khutazaka.—Swivuriso 15:23.

Yesu Kreste a a xi twisisa xilaveko xo bumabumela. Exifanisweni xa titalenta, n’wini (loyi a fanekiselaka Yesu hi byakwe) u bumabumele mahlonga mambirhi layo tshembeka ha rin’we-rin’we, a ku: “U endle kahle, hlonga lerinene, ro tshembeka!” Hakunene swa khutaza! Hambileswi a ma ri ni vuswikoti lebyi nga faniki, ma bumabumeriwe hi ndlela leyi fanaka.—Matewu 25:19-23.

Kutani a hi tsundzukeni mana wa xinhwanyetana xolexo. A swi lavi hi yimela leswaku van’wana va kala va rila ku ri kona hi nga ta va bumabumela. Ematshan’weni ya sweswo, hi nga languta leswi hi nga va bumabumelaka eka swona. Kahle-kahle, hi ni xivangelo lexi twalaka xo bumabumela swi huma embilwini nkarhi wun’wana ni wun’wana.