Ndlela Leyi Yesu A Velekiweke Ha Yona Ni Xivangelo Xa Ku Velekiwa Kakwe

“A SWI nge endleki!” Vanhu vo tala lava nga riki Vakreste, va nga ha vula leswi loko va twa hi ta ku velekiwa ka Yesu. Va vona onge a swi fambisani na sayense leswaku wanhwana a nga tika a tlhela a veleka n’wana handle ko va ni vuxaka bya rimbewu ni tatana la nga munhu wa nyama. Xana wena u ri yini?

Hi 1984, The Times ya le London yi kandziyise papila leri vulavulaka hi mhaka leyi, ri ku: “A swi twali ku kaneta masingita hi ku vula leswaku a ma fambisani ni sayense. Ku pfumela leswaku masingita a ma nge humeleli swi lava ripfumelo, ni ku pfumela leswaku ma nga humelela, na swona swi lava ripfumelo.” Papila ra kona ri sayiniwe hi vaprofesa va sayense va 14, lava nga eka tiyunivhesiti ta le Britain. Va te: “Hi yi amukela hi mandla mambirhi mhaka ya wanhwana la velekeke n’wana, masingita lama nga eka Tievhangeli ni ku pfuxiwa ka Kreste leswaku i swiendlakalo swa matimu.”

Kambe, swa twisiseka loko munhu a hlamala, loko a sungula ku twa mhaka ya ku velekiwa ka Yesu hi wanhwana. Wanhwana, la veke mana wa Yesu, na yena u hlamarile loko ntsumi ya Xikwembu yi vulavule na yena yi ku: “Waswivo, u ta tika embelekweni wa wena, u ta veleka n’wana wa jaha, vito ra yena u ta n’wi thya Yesu.” Mariya u vutisile: “Xana leswi swi ta endlekisa ku yini, tanihi leswi ndzi nga tiviki wanuna hi tlhelo ra rimbewu?” Hiloko ntsumi yi hlamusela leswaku Xikwembu xi ta endla singita leri hi ku tirhisa moya wa xona lowo kwetsima, yi tlhela yi ku: “Ku hava lexi tivisiwaka hi Xikwembu lexi nga ta ka xi nga endleki.” (Luka 1:31, 34-37) Hakunene, Loyi a vumbeke endlelo ro hlamarisa ra leswaku munhu a veleka n’wana, a nga swi kota ku endla leswaku wanhwana a tika ni ku endla leswaku Yesu a velekiwa hi wanhwana la tengeke. Loko Xikwembu xi vumbe vuako hinkwabyo, ni milawu ya yona leyi hetisekeke, xi nga swi kota ku endla leswaku tandza ra Mariya ri humesa N’wana la hetisekeke, la nga munhu wa nyama.

Xivangelo Xa Ku Velekiwa Ka Yena

Yosefa, wanuna la chavaka Xikwembu, a a vutane na Mariya loko a ta tika. Ntsumi ya Xikwembu yi hlamusele Yosefa enorhweni, hi xivangelo lexi hlamarisaka lexi endleke leswaku wanhwana loyi a tshembisaneke na yena a tika. Ntsumi yi te: “U nga chavi ku teka Mariya nsati wa wena u famba na yena ekaya, hikuva leswi a xurheke swona swi vangiwe hi moya lowo kwetsima. Yena u ta veleka n’wana wa jaha, naswona u fanele u n’wi thya vito ra Yesu, hikuva u ta ponisa vanhu va ka vona eswidyohweni swa vona.” (Matewu 1:20, 21) Hi Xiheveru vito leri nge Yesu ri vula leswaku “Yehovha I Muponisi.” Ri hi tsundzuxa hi xilaveko xo ponisiwa eka xidyoho ni rifu ni  hi lunghiselelo ra Yehovha Xikwembu ra ku ponisa vanhu ha Yesu.

Leswi Adamu, munhu wo sungula a dyoheke, vana va yena hinkwavo va velekiwe va nga hetisekanga, va ri ni mboyamelo wo tlula milawu ya Xikwembu. (Varhoma 5:12) Xana vatukulu va Adamu a va ta ponisiwa njhani eka xidyoho kutani va endliwa lava hetisekeke? Leswaku ku hetisisiwa vululami, a ku laveka vutomi bya munhu un’wana la hetisekeke lebyi fanaka ni bya Adamu. Hi swona leswi endleke leswaku Xikwembu xi endla singita ra leswaku ku velekiwa munhu la hetisekeke, ku nga Yesu, nakambe hi swona swi endleke leswaku Yesu a tshika valala vakwe va n’wi dlaya. (Yohane 10:17, 18; 1 Timotiya 2:5, 6) Endzhaku ka loko Yesu a pfuxiwile niloko a tlhandlukele etilweni, u swi kotile ku vula a ku: “A ndzi file, kambe, waswivo, ndza hanya hi masiku ni masiku, naswona ndzi ni swilotlelo swa rifu ni swa Hayidesi [ku nga sirha leri tolovelekeke ra vanhu].”—Nhlavutelo 1:18.

Hi ku tirhisa swilotlelo swo fanekisela swa rifu ni Hayidesi, Yesu u pfule ndlela ya leswaku vanhu lava nga ni xidyoho va tlhela va kuma leswi lahliweke hi Adamu. Yesu u te: “Hi mina ku pfuka ni vutomi. Loyi a kombisaka ripfumelo eka mina, hambiloko a fa, u ta hanya; naswona un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo.” (Yohane 11:25, 26) Mawaku xitshembiso xo tsakisa swonghasi! Kambe, ka ha ri ni xivangelo xin’wana lexikulu xa leswaku ha yini Yesu a velekiwile.

Xivangelo Xa Nkoka Swinene

Loko Yesu a tikiwa embelekweni wa Mariya, a ku nga ri ro sungula a hanya. U swi veke erivaleni a ku: “Ndzi xike hi le tilweni.” (Yohane 6:38) Yesu u hanye exivandleni xa moya ni Tata wakwe wa le tilweni ku sukela eku sunguleni ka ntumbuluko. Kahle-kahle, Bibele yi n’wi vitana “masungulo ya ntumbuluko wa Xikwembu.” (Nhlavutelo 3:14) Loko a ri etilweni, Yesu u vone ku xandzuka ka ntsumi yo homboloka, leyi endleke leswaku vanhu vo sungula va xandzukela ku fumiwa hi Xikwembu. Leswi swi endle leswaku Yesu a swi navela swinene ku velekiwa tanihi N’wana wa Xikwembu la nga munhu wa nyama la hetisekeke. A xi ri xihi xivangelo xa kona?

A a lava ku kombisa leswaku Tata wakwe wa le tilweni u ni mfanelo yo fuma vuako hinkwabyo. Hi ku tshama a tshembekile ku sukela loko a velekiwile emisaveni ku kondza a fa, Yesu u kombise leswaku wa swi tsakela ku titsongahatela ndlela leyi Yehovha a fumaka swivumbiwa swa Yena ha yona. Loko valala va Xikwembu va nga si n’wi dlaya, Yesu u xi veke erivaleni xivangelo xa ku va a tsakela ku fa rifu ra gandzelo. U vule leswaku a a endlela leswaku misava yi swi tiva leswaku a a rhandza Tatana. (Yohane 14:31) Loko vanhu vambirhi vo sungula, Adamu na Evha, a va lo hlakulela rirhandzu ro tano, a va ta va va kombise ku tshembeka loko va ringiwa hi ndzingo lowu nga nyawuriki.—Genesa 2:15-17.

Nakambe ku tshembeka ka Yesu ku paluxe leswaku Sathana, ntsumi yo homboloka i muhembi. Sathana u lumbete Xikwembu ni vanhu hi ku vula leswi landzelaka emahlweni ka tintsumi  tin’wana le tilweni: “Hinkwaswo leswi munhu a nga na swona, a nga swi tshika; nchumu hi loko a kota ku hlayisa vutomi bya yena.” (Yobo 2:1, 4, Bibele—Mahungu Lamanene) Sathana u vule leswaku vanhu hinkwavo va nga landzula Xikwembu leswaku va ponisa vutomi bya vona.

Timhaka leti ta ha ku boxiwaka, ti tlhontlhe ku lulama swin’we ni mfanelo ya Xikwembu yo fuma. Leswaku a tlhantlha mphikamakaneta leyi, Yesu a a tiyimiserile leswaku a velekiwa tanihi munhu wa nyama, a tlhela a tshembeka ku fikela eku feni.

Xisweswo, Yesu u vule leswaku xivangelo-nkulu xa ku velekiwa ka yena emisaveni, a ku ri leswaku a “nyikela vumbhoni malunghana ni ntiyiso.” (Yohane 18:37) U swi kombise hi marito ni hi swiendlo leswaku vulawuri bya Xikwembu byi lulamile ni leswaku ku titsongahatela byona swi tisa ntsako lowu nga heriki. Nakambe Yesu u hlamusele leswaku u te emisaveni leswaku a ta nyikela hi vutomi bya yena byi “va nkutsulo wa lavo tala,” a pfulela vanhu lava nga ni xidyoho ndlela yo va lava hetisekeke ni ku kuma vutomi lebyi nga heriki. (Marka 10:45) Leswaku vanhu va twisisa nkoka wa timhaka leti, a swi fanerile leswaku va kuma rungula ra ku velekiwa ka Yesu. Ku engetela kwalaho, swiendlakalo leswi humeleleke loko Yesu a velekiwa, swi tamele tidyondzo tin’wana ta nkoka, hilaha xihloko lexi landzelaka xi nga ta swi kombisa hakona.

[Swifaniso leswi nga eka tluka 4]

Xana vatukulu va Adamu a va ta ponisiwa njhani exidyohweni?