Xana Ku Tshembeka Ku Ri Koxe Ku Nga Xi Tsakisa Xikwembu?

XANA hakunene swi fanerile ku tshembeka evuton’wini siku ni siku? Rito ku tshembeka ri vula ku pfumala vukanganyisi; ku va ni ntiyiso. Kahle-kahle, mfanelo leyi yi pfuna ku tiyisa vuxaka lebyinene ni van’wana. Muapostola Pawulo u tsundzuxile: “Eka xin’wana ni xin’wana yingisani lava nga vini va n’wina hi tlhelo ra nyama, ku nga ri hi ku tirha loko mi vekiwe tihlo, ku fana ni lava tsakisaka vanhu, kambe hi mbilu yo tshembeka, hi ku chava Yehovha.” (Vakolosa 3:22) I mani loyi a a nga ta tiphina hi ku va ni mutirhi wo tshembeka hi ndlela yoleyo? Namuntlha, vanhu vo tshembeka va nga ha kuma ntirho hi ku olova ni ku tlhela va hlayisa mintirho ya vona.

Hambiswiritano, lexi endlaka leswaku ku tshembeka ku tsakisa swinene, i ndlela leyi ku khumbaka vuxaka bya hina na Xikwembu ha yona. Vaisrayele va khale va tiphine hi nkateko wa Xikwembu loko va yi hlayisa hi vukheta milawu ni minkhuvo. Loko a vulavula hi ku basa ka vandlha, Pawulo u khutaze Vakreste a ku: “A hi hambeteni hi endla nkhuvo hi swinkwa leswo-ke-comela swa vutshembeki ni swa ntiyiso, ku nga ri hi comela xa khale, kumbe comela xa vubihi ni vuhomboloki.” (1 Vakorinto 5:8) Leswaku vugandzeri bya hina byi amukeleka eka Xikwembu, ku tshembeka a ko tsakisa ntsena kambe i ka nkoka. Kambe xiya leswaku ku tshembeka ntsena a swi enelanga. Ku fanele ku fambisana ni ntiyiso.

Vaendli ni vakhandziyi va xikepe xa Titanic va nga ha va va tshembe hi timbilu ta vona hinkwato leswaku xikepe lexi lexikulu lexi a xi rhwele vanhu a xi nge mbombomeli. Hambiswiritano, eka riendzo ra xona ro sungula hi 1912, xi be ntshava ya ayisi kutani ku fa vanhu vo ringana 1 517. Vayuda van’wana va lembe-xidzana va nga ha va va tshembe ndlela ya vona yo gandzela Xikwembu hi timbilu ta vona hinkwato, kambe ku hiseka ka vona a “ku nga ri hikwalaho ka vutivi lebyi kongomeke.” (Varhoma 10:2) Leswaku hi amukeleka eka Xikwembu, tidyondzo leti hi pfumeleka eka tona ti fanele ti titshega hi rungula leri kongomeke. Timbhoni ta Yehovha ta le ndhawini ya ka n’wina ti ta swi tsakela ku ku pfuna ku kambisisa leswi katsekaka eka ku tirhela Xikwembu hi ku tshembeka ni hi ntiyiso.